ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ އަންހެން ޑިވިޝަނުގެ ސެމީ ފައިނަލަށް އެމް.އެން.ޔޫ ބިޒްނަސް ސްކޫލް (އެމް.އެން.ޔޫ.ބީ.އެސް) އާއި ފެކަލްޓީ އޮފް ހެލްތު ސައިންސަސް (އެފް.އެޗް.އެސް) ދަތުރުކޮށްފިއެވެ.
ހުކުރުދުވަހުގެރޭ 09:00ގައި ގްރައުންޑް 1 ގައި ކުޅުނު އަންހެން ޑިވިޝަނުގެ ތިންވަނަ ކުއާޓާ ފައިނަލުގައި ބައްދަލުކުރީ އެމް.އެން.ޔޫ.ބީ.އެސް އާއި ވިލާ ކޮލެޖެވެ. މި މެޗު 3 – 0 ން ކާމިޔާބު ކުރީ އެމް.އެން.ޔޫ.ބީ.އެސް އެވެ. މި މެޗުގެ މޮޅު ކުޅުންތެރިޔަކަށް ހޮވުނު އެމް.އެން.ޔޫ.ބީ.އެސްގެ ޖަރޒީ ނަންބަރު 11 ފިރުޝާނާ ނަސީރުވަނީ މެޗުގައި ދެ ގޯލު ޖަހާފައެވެ. ފިރުޝާނާގެ ގޯލުތައް ޖަހާފައިވަނީ މެޗުގެ ތިންވަނަ މިނެޓާއި 20 ވަނަ މިނެޓުގައެވެ. މި މެޗުގައި އެމް.އެން.ޔޫ.ބީ.އެސް އިން ދެން ގޯލު ޖަހާފައިވަނީ އެ ޓީމުގެ ޖަރޒީ ނަންބަރު 22 ހަނީފާ ޢަބްދުﷲ އެވެ. ހަނީފާ ގޯލުޖެހީ މެޗުގެ 25 ވަނަ މިނެޓުގައެވެ.
ގްރައުންޑް 2 ގައި ކުޅުނު ހަތަރުވަނަ ކުއާޓާ ފައިނަލުގައި ބައްދަލުކުރީ އެފް.އެޗް.އެސް އާއި އެމް.އައި ކޮލެޖެވެ. މި މެޗު 2 – 1ގެ ނަތީޖާއަކުން ކާމިޔާބު ކުރީ އެފް.އެޗް.އެސް އެވެ. މި މެޗުގެ ފުރަތަމަ މިނެޓުގައި އެފް.އެޗް.އެސްގެ ޖަރޒީ ނަންބަރު 10 ރަނާ މުހައްމަދު ސަޢީދު ވަނީ އެފް.އެޗް.އެސް އަށް ލީޑު ނަގައިދީފައެވެ. ނަމަވެސް މެޗުގެ 17 ވަނަ މިނެޓުގައި އެމް.އައިގެ ޖަރޒީ ނަންބަރު 12 ފާތިމަތު ޝުއާއު ވަނީ އެމް.އައި އަށް ނަތީޖާ ހަމަހަމަ ކޮށްދީފައެވެ. އެފް.އެޗް.އެސް މޮޅުވި ގޯލު ޖެހީ މެޗުގެ 29 ވަނަ މިނެޓުގައި ފުރަތަމަ ގޯލުވެސް ޖެހި ރަނާ އެވެ. މި މެޗުގެ މޮޅު ކުޅުންތެރިޔަކަށް ހޮވުނީ އެފް.އެޗް.އެސްގެ ގޯލުކީޕަރު މަރިޔަމް ރިޝްމާ އެވެ.
އަންހެން ޑިވިޝަނުގެ ސެމީ ފައިނަލުގައި އެއްކޮޅުން ވާދަކުރާނީ އެމް.އެން.ޔޫ.ބީ.އެސް އާއި ކްލިކް ކޮލެޖެވެ. އަނެއް މެޗުގައި ބައްދަލުކުރާނީ ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް) އާއި އެފް.އެޗް.އެސް އެވެ. ސެމީގެ މެޗުތައް ކުޅުމަށް ހަމަޖެހިފައިވަނީ އަންނަ ބުރާސްފަތި ދުވަހުގެރެޔެވެ.
ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ ޓައިޓްލް ސްޕޮންސަރަކީ އެމް.ޔޫ ސްޓޯރުން އެތެރެކުރާ ”ލެކްނޯ“ ބްރޭންޑެވެ. މުބާރާތުގެ ކޯ-ސްޕޮންސަރަކީ ޤައުމީ ޔުނިވަރސިޓީގެ ކުންފުނި ޔުނިވިޔަ ހޯލްޑިންގްސް އެވެ. ސަޕޯޓިންގ ޕާޓްނަރުންނަކީ މޯލްޑިވްސް ޓްރޭޑިންގ އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ)، މެންހަޓަން ބިޒްނަސް ހޮޓެލް، އޮންލައިން ނިއުސް ޢަދަދު، މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަމަންޓް އަދި ފުޓްބޯލް އެސޯސިއޭޝަން އޮފް މޯލްޑިވްސް (އެފް.އޭ.އެމް) އެވެ. ސްޕޯޓްސް ޕާޓްނަރަކީ ސޮނީ ސްޕޯޓްސް އެވެ. މުބާރާތުގެ ޑިޖިޓަލް ޕާޓްނަރަކީ ދިރާގު ކަމަށްވާއިރު، ކިޓް ޕާޓްނަރަކީ ޕްރިންޓް ކޯއެވެ. ޕްރިންޓިންގ ޕާޓްނަރަކީ އެމް ސެވަން އެވެ. އަދި އެސޯސިއޭޓިވް ޕާޓްނަރަކީ އަދަދު އޮންލައިންއެވެ.
އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ސާނަވީ ދާއިރާގައި ބާއްވާ އެންމެ ބޮޑު ކުޅިވަރު ޙަރަކާތެވެ. މި މުބާރާތް ރާވާ އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިންނެވެ. މި އަހަރު މި ބާއްވަނީ މީގެ 8 ވަނަ މުބާރާތެވެ. މިއަހަރުގެ މުބާރާތް މި ބޭއްވެނީ ކޮވިޑް-19ގެ ޢާލަމީ ވަބާއާއެކު 2 އަހަރުގެ މެދުކެނޑުމަކަށްފަހުއެވެ. އެންމެ ފަހުން 2019 ވަނަ އަހަރު ބޭއްވި މުބާރާތުގެ ފިރިހެން ޑިވިޝަނުގެ ޗެމްޕިއަނަކީ އެވިޑް ކޮލެޖެވެ. އަދި އަންހެން ޑިވިޝަނުގެ ޗެމްޕިއަނަކީ އެމް.އައި ކޮލެޖެވެ. މި މުބާރާތް އެންމެ ފުރަތަމަ ބޭއްވުނީ 2013 ވަނަ އަހަރެވެ. އެއަށްފަހު 2019 ވަނަ އަހަރާ ހަމައަށް މެދުކެނޑުމެއްނެތި ކޮންމެ އަހަރަކު މި މުބާރާތް ކުރިއަށް ގެންދެވިފައިވެއެވެ. މުބާރާތުގައި އަންހެން ޑިވިޝަން ތަޢާރަފު ކުރެވުނީ 2018 ވަނަ އަހަރެވެ. މި މުބާރާތުގެ އެންމެ ކާމިޔާބު ޓީމަކީ މުބާރާތުގެ ފިރިހެން ޑިވިޝަނުގެ ތަށި 3 ފަހަރު ޙާޞިލުކޮށްފައިވާ އެމް.އެން.ޔޫ ބިޒްނަސް ސްކޫލެވެ.
