ދިވެހި ރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމު ކޮށްގެން ކުރިއަށް ގެންދިޔަ، ބީ.އެމް.އެލް އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2024ގެ އަންހެން ޑިވިޝަންގެ ޗެމްޕިއަންކަން ފުރަތަމަ ފަހަރަށް މޯލްޑިވްސް ބިޒްނަސް ސްކޫލް (އެމް.ބީ.އެސް) އިން ހޯދައިފި އެވެ.
ހުކުރު ދުވަހުގެ ރޭ ކުޅުނު ފައިނަލް މެޗުގައި ސެންޓަ ފޯ ފައުންޑޭޝަން ސްޓަޑީޒް (ސީ.އެފް.އެސް)ގެ މަަށްޗަށް އެމް.ބީ.އެސްގެ ޓީމުން ކުރި ހޯދާފައިވަނީ 6-0 ގެ ތަފާތު ބޮޑު ނަތީޖާ އަކުންނެވެ. ފައިނަލް މެޗުގެ މޮޅު ކުޅުންތެރިޔަކަށް ހޮވުނީ އެމް.ބީ.އެސްގެ ޖާޒީ ނަމްބަރ 09 ސާއިނާ އެވެ.
މިއަހަރުގެ މުބާރާތުގެ ފައިނަލް މެޗު ޝަރަފުވެރި ކޮށްދެއްވީ ރައީސުލްޖުމްހޫރިއްޔާގެ ނައިބު އަލްއުސްތާޛް ޙުސެއިން މުޙައްމަދު ލަޠީފް އަދި ކުޅިވަރާއި ހަށިހެޔޮކަމާ ބެހޭ ވަޒީރުޢަބްދުﷲ ރާފިޢު އެވެ.
މުބާރާތުގެ އަންހެން ޑިވިޝަންގެ އެންމެ މޮޅު ކުޅުންތެރިންގެ ތެރޭގައި ހިމެނުނީ ޗެމްޕިއަން އެމްބީއެސްގެ ޖާޒީ ނަމްބަރ 17 ސަނިއްޔާ އަބްދުލް ސަމަދު، ޖާޒީ ނަމްބަރ 05މަރިޔަމް މަލްދާގެ އިތުރުން، ސީ.އެފް.އެސް.ގެ ޖާޒީ ނަމްބަރ 22 ޖަފްނާ ޢީސާ، ޖާޒީ ނަމްބަރ 16 ސަދާ އަންވަރ އަދި ސްކޫލް އޮފް ނާސިން (އެސް.އެން)ގެ ޖާޒީ ނަމްބަރ 05މަރިޔަމް ޝަހާ އެވެ. އަންހެން ޑިވިޝަންގެ އެންމެ އުންމީދީ ކުޅުންތެރިޔަކަށް ހޮވުނީ ސީ.އެފް.އެސްގެ ޖާޒީ ނަމްބަރ 11 އާމިނަތު ރައިޝާ ރަމީޒު އެވެ. އެންމެ މޮޅު ކޯޗަކަށް އެމްބީއެސްގެ ކޯޗު ހޮވުނުއިރު، އެންމެ ގިނަ ލަނޑު ޖެހި ކުޅުންތެރިޔަކީ އެމް.ބީ.އެސްގެ ޖާޒީ ނަމްބަރ 17 އައިޝަތު ނަސްމާ އަޙުމަދު އެވެ. އޭނާ ވަނީ މުބާރާތުގައި 10 ލަނޑު ޖަހައިފަ އެވެ. މީގެ އިތުރުން އަންހެން ޑިވިޝަންގެ އެންމެ މޮޅު ކުޅުންތެރިޔާ އަށް ހޮވުނީ ޗެމްޕިއަން އެމްބީއެސްގެ ޖާޒީ ނަމްބަތ 09 ފާތިމަތު ސައިނާ އެވެ.
އަންހެން ޑިވިޝަނުގެ ފެއަރ ޕްލޭ ޓީމަކަށް ހޮވިފައިވަނީ ސްކޫލް އޮފް ނާރސިންގ އެވެ.
ރަނަރަޕް ޓީމް ސީ.އެފް.އެސް. އަށް މެޑައްޔާއި 5000ރ ގެ ފައިސާގެ އިނާމް ހަވާލުކޮށްދެއްވީ އެމް.އެން ޔޫގެ ވައިސް ޗާންސެލަރ ޑރ. އައިޝަތު ޝެހެނާޒް އާދަމް އެވެ. އަދި ޗެމްޕިއަންސް ޓީމަށް މެޑައްޔާއި 10000ރ ގެ ފައިސާގެ އިނާމް ހަވާލުކޮށްދެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އެވެ.
އެމް.އެން.ޔޫ.އެސް.ޔޫ އިން އިންތިޒާމުކުރާ އެންމެ ޝަރަފުވެރި އަދި އެންމެ ބޮޑު ހަރަކާތްކަމުގައިވާ ފުޓްސަލް ސިއެސްޓާއަކީ 2012 ވަނަ އަހަރުން ފެށިގެން ބާއްވަމުން އަންނަ މުބާރާތެކެވެ. އަދި މި މުބާރާތަކީ ރާއްޖޭގެ މަތީ ތައުލީމު ދޭ ކޮލެޖު/ޔުނިވާސިޓީތަކުގެ މެދުގައި ބާއްވާ އެންމެ ބޮޑު ފުޓްސަލް މުބާރާތެކެވެ.
