ބީ.އެމް.އެލް އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2024ގެ ފިރިހެން ޑިވިޝަނުގެ ފައިނަލުގައި އެމްއައި ކޮލެޖާއި ފެކަލްޓީ އޮފް އެޑިޔުކޭޝަން (އެފް.އީ) ވާދަކުރި މެޗު އެމް.އައި ޓީމުން ކާމިޔާބުކޮށް މުބާރާތުގެ ޗެންޕިއަންކަން ހޯދައިފިއެވެ.
ހުކުރު ދުވަހުގެ ރޭ ހުޅުމާލޭ ރެހެންދި ފުޓްސަލް ދަނޑުގައި ކުޅުނު ފައިނަލް މެޗުގައި އެމްއައި ކޮލެޖުން ވަނީ 3-0 އިން އެފްއީ ބަލިކޮށްފައެވެ. މެޗުގައި މޮޅު ކުޅުމެއް ދެއްކި އެމްއައި ކޮލެޖުގެ ޓީމުގެ ކެޕްޓަން ޖާޒީ ނަމްބަރ 01 މުހައްމަދު މިންވާލް ވަނީ 2 ލަނޑު އެޓީމަށް ކާމިޔާބުކޮށްދީފައެވެ. އަދި އެ ޓީމުގެ ޖާޒީ ނަމްބަރ 30 އިބްރާހީމް ނޫރައްދީން އެވެ. މެޗުގައި މޮޅު ކުޅުންތެރިޔާގެ މަގާމު ހާސިލްކޮށްފައިވަނީ އެމް.އައި ޓީމުގެ މިންވާލް އެވެ.
މުބާރާތުގެ ފިރިހެން ޑިވިޝަންގެ އެންމެ މޮޅު ފަސް ކުޅުންތެރިންްގެ ތެރޭގައި ހިމެނުނީ ޗެމްޕިއަން އެމް.އައިގެ ޖާޒީ ނަމްބަރ 23 މުޙައްމަދު އަބާން އިމްރާންގެ އިތުރުން، އެފް.އީގެ ޖާޒީ ނަމްބަރ 10 ރައުހާާން ރިފްއަތު، ޖާޒީ ނަމްބަރ 41 މުޙައްމަދު ސާއިޙް އަޙުމަދު ޝިހާމް، ޖާޒީ ނަމްބަރ 96 އަޒުހަރު އާދަމް އަދި ވިލާ ކޮލެޖުގެ ޖާޒީ ނަމްބަރ މުޙައްމަދު އައިހަމް އިބްރާހިމްއެވެ. ފިރިހެން ޑިވިޝަންގެ އެންމެ އުންމީދީ ކުޅުންތެރިޔަކަށް ހޮވުނީ ވެސް ވިލާ ކޮލެޖުގެ ޖާޒީ ނަމްބަރ އަޙުމަދު އައުޝަމް ޙުސެއިން އެވެ. ފިރިހެން ޑިވިޝަންގެ އެންމެ މޮޅު ކޯޗަކަށް ހޮވުނީ ޗެމްޕިއަން އެމްއައި ކޮލެޖުގެ ކޯޗު މުޙައްމަދު ހައިދަރު އެވެ.
އެންމެ ގިނަ ލަނޑު ޖެހި ކުޅުންތެރިޔަކަށް އެމްއައި ކޮލެޖުގެ މިންވާލް ހޮވުނުއިރު، އޭނާ ވަނީ މުބާރާތުގައި ޖުމުލަ 22 ލަނޑު ޖަހައިފަ އެވެ. އަދި މުބާރާތުގެ ފިރިހެން ޑިވިޝަންގެ އެންމެ މޮޅު ކުޅުންތެރިޔަކަށް ވެސް ހޮވުނީ މިންވާލް އެވެ.
ފިރިހެން ޑިވިޝަނުގެ ފެއަރ ޕްލޭ ޓީމަކަށް ހޮވިފައިވަނީ ފެކަލްޓީ އޮފް އިންޖިނިއަރިންގ ސައިންސް އެނޑް ޓެކްނޮލަޖީއެވެ.
ރަނަރަޕް ޓީމް އެފް.އީ އަށް މެޑައްޔާއި 5000ރ ގެ ފައިސާގެ އިނާމް ހަވާލުކޮށްދެއްވީ އެމް.އެން.ޔޫގެ ވައިސް ޗާންސެލަރ ޑރ. އައިޝަތު ޝެހެނާޒް އާދަމް އެވެ. އަދި ޗެމްޕިއަންސް ޓީމަށް މެޑައްޔާއި 10000ރ ގެ ފައިސާގެ އިނާމް ހަވާލުކޮށްދެއްވީ މި ރަސްމިއްޔާތުގެ ޝަރަފްވެރި މެހެމާން ރައީސުލްޖުމްހޫރިއްޔާގެ ނައިބު އަލްއުސްތާޛް ޙުސެއިން މުޙައްމަދު ލަޠީފް އެވެ.
މިއަހަރުގެ މުބާރާތުގައި ޖުމުލަ 30 ޓީމަކުން ބައިވެރިވެފައިވާއިރު، ފިރިހެން ޑިވިޝަނުގައި 12 ޓީމަކުންވަނީ ވާދަކޮށްފައެވެ.
މި މުބާރާތަކީ ރާއްޖޭގެ މަތީ ތައުލީމު ދޭ ކޮލެޖު/ޔުނިވާސިޓީތަކުގެ މެދުގައި ބާއްވާ އެންމެ ބޮޑު ފުޓްސަލް މުބާރާތެވެ. އަދި އެމް.އެން.ޔޫ.އެސް.ޔޫ އިން އިންތިޒާމުކުރާ އެންމެ ޝަރަފުވެރި އަދި އެންމެ ބޮޑު ހަރަކާތް ވެސްމެއެވެ.
