ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)އިން އިންތިޒާމުކޮށްގެން ބާއްވާ ”އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2024″ގައި ބައިވެރިވުމުގެ ފުރުޞަތު ހުޅުވާލައިފިއެވެ.
އަންހެން އަދި ފިރިހެން ޑިވިޝަނަށް ބައިވެރިވުމުގެ ފުރުސަތު ހުޅުވާލެވިފައިވާ މި މުބުރާތަކީ ދިވެހިރާއްޖޭގެ މަތީ ތައުލީމު ދާއިރާއަށް އަމާޒުކޮށްގެން ބާއްވާ އެންމެ ބޮޑު ފުޓްސަލް މުބާރާތެވެ.
މި މުބާރާތުގައި ބައިވެރިވުމުގެ ސުންގަޑި އަކީ އަންނަ އޮކްޓޫބަރ މަހުގެ 06 ވަނަ ދުވަހެވެ. ބައިވެރިވުމަށް އެދޭ ފޯމާއި މުބާރާތުގެ ޤަވާއިދު އެމް.އެން.ޔޫ.އެސް.ޔޫ ވެބްސައިޓު އަދި ފޭސްބްކް ޕޭޖުން ލިބެން ހުންނާނެއެވެ.
މި އަހަރުގެ މުބާރާތް އޮކްޓޫބަރ މަހުގެ ފަހުކޮޅު ފެށުމަށް އަންނަނީ ތައްޔާރުވަމުންނެވެ.
ފާއިތުވި އަހަރު މި މުބާރާތުގެ އަންހެން ޑިވިޝަނުގައި 13 ޓީމު އަދި ފިރިހެން ޑިވިޝަނުގައި 18 ޓީމާއެކު ޖުމުލަ 31 ޓީމު ވަނީ ބައިވެރިވެފައެވެ. އަދި 2023 ވަނަ އަހަރުގެ މުބާރާތުގެ ޓައިޓަލް ސްޕޮންސަރ އަކީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމް.ޓީ.ސީ.ސީ)އެވެ.
އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދަރިވަރުންގެ ޔޫނިއަންގެ އެންމެ ބޮޑު އަދި އެންމެ ޝަރަފުވެރި ހަރަކާތެވެ. ސިލްސިލާގޮތެއްގައި ބޭއްވިގެންދާ މި މުބާރާތުގެ 10 ވަނަ މުބާރާތް މިއަހަރު ބޭއްވުމަށް ހަމަޖެހިފައިވާއިރު، 2013 ން ފެށިގެން 2019 އާ ހަމައަށް މެދުކެނޑުމެއްނެތި މި މުބާރާތް ވަނީ ކޮންމެ އަހަރަކުވެސް ކުރިއަށް ގެންދެވިފައެވެ. އަދި ކޮވިޑް-19ގެ ޢާލަމީ ވަބާއާއެކު 2 އަހަރުގެ މެދުކެނޑުމަކަށްފަހު މި މުބާރާތް އަލުން ކުރިއަށް ގެންދެވުނީ 2022 ވަނަ އަހަރެވެ. އަދި އެއަށްފަހު ނިމިދިޔަ 2023 ވަނަ އަހަރުވެސް މިވަނީ ކާމިޔާބުކަމާއެކު މި މުބާރާތް ނިންމާލާފައެވެ.
