ދިވެހިރާއްޖޭގެ ޤައުމީ ޔުނިވަސިޓީ ދަރިވަރުންގެ ޔޫނިއަނުން ބާއްވާ “ ބީ.އެމް.އެލް އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2024 “ ފެށުމުގެ ގޮތުން މިއަހަރު މުޅިން އަލަށް ތައާރަފް ކުރެވުނު ވިކްޓްރީ ޝީލްޑް މެޗް މެޕްސް ކޮލެޖުން ކާމިޔާބުކޮށްފިއެވެ.
މިރޭ ރެހެނދި ފުޓްސަލް ދަނޑުގައި ކުޅެވިގެންދިޔަ މި ފޯރިގަދަ މެޗު ކުޅެވިފައިވަނީ ފާއިތުވި އަހަރުގެ ޗެމްޕިއަންކަމުގައިވާ އެމް.އެން.ޔޫ ބިޒްނަސް ސްކޫލް (އެމް.އެން.ޔޫ ބީ.އެސް) އާއި މެޕްސް ކޮލެޖެވެ. 03-01 ގެ ނަތީޖާ އަކުން މި މެޗުގައި އެމް.އެން.ޔޫ ބީ.އެސްގެ މައްޗަށް ކުރިހޯދައި މެޕްސް ކޮލެޖުން މިވަނީ ތާރީހީ ކާމިޔާބެއްހޯދާފައެވެ.
ދެ ޓީމުގެ ފަރާތުން ވެސް ވާދާވެރި ކުޅުމެއް ފެނިގެން ގޮސްފައިވާ މި މެޗުގެ ފުރުތަމަ ލީޑް ނަގާފައިވަނީ އެމް.އެން.ޔޫ ބީ.އެސްގެ ޓީމުންނެވެ. ނަމަވެސް މެޕްސް ކޮލެޖުގެ ކުޅުން އިތުރަށް ވަރުގަދަކޮށް ފަހަތުން އަރާ ވަނީ 3 ލަނޑު ޖަހައި މެޗުން މޮޅުވެފައެވެ.
އެމް.އެން.ޔޫ ބީ.އެސް ޓީމަށް ލަނޑު ކާމިޔާބުކޮށްދީފައިވަނީ ޖާޒީ ނަމްބަރ 11 އަހްމަދު އަނާންއެވެ. ފުރަތަމަ ހާފް ނިމެން ކައިރިވެފައި ވަނިކޮށް މެޕްސް ކޮލެޖުގެ ޖާޒީ ނަމްބަރ 05 އަބްދުﷲ ހިޝާން ވަނީ މެޕްސް ކޮލެޖަށް ނަތީޖާ ހަމަހަމަކޮށްދީފައެވެ. ދެވަނަ ހާފުގައި މެޕްސް އިން ވަނީ އިތުރު ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. އަދި މިލަނޑު އެޓީމަށް ކާމިޔާބުކޮށްދިނީ ޖާޒީ ނަމްބަރ 23 ސައިފުﷲ މުހައްމަދު އެވެ. މެޗުގެ ފަހު ވަގުތުގައި ތިންވަނަ ލަނޑު މެޕްސް އަށް ކާމިޔާބު ކޮށްދިނީ ޖާޒީ ނަމްބަރ 08 މުހައްމަދް ސަނީމްއެވެ. މި މެޗުގެ މޮޅު ކުޅުންތެރިޔާއަށް ހޮވިފައިވަނީ މެޕްސް ކޮލެޖުގެ ޖާޒީ ނަމްބަރ 05 އަބްދުﷲ ހިޝާންއެވެ.
މިމެޗަށްފަހު މުބާރާތުގެ ގުރޫޕް ސްޓޭޖުގެ ދެ މެޗު ކުޅެވިގެންދާނެއެވެ. ފުރަތަމަ މެޗުގައި ބައްދަލު ކުރާނީ ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީސް (އެފް.އެޗް.ޓީ.އެސް) އާއި މޯލްޑިވްސް ޕޮލިޓެކްނިކްއެވެ. އަދި ދެވަނަ މެޗުގައި ސެންޓަފ ފޯ ފައުންޑޭޝަން ސްޓަޑީޒް (ސީ.އެފް.އެސް) ނިކުންނާނީ ފެކަލްޓީ އޮފް އިންޖިނިއަރިންގ ސައިންސް އެންޑް ޓެކްނޮލަޖީ (ފެސްޓް) އާއި ދެކޮޅަށެވެ.
