”މެކްސްކޮމް އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީ ބޯޅަ މުބާރާތް 2018“ މިދިޔަ ހޮނިހިރު ދުވަހު ނިމިގެން ދިޔައިރު މި މުބާރާތްވެގެންދިޔައީ ގިނަ ޢަދަދަކަށް ސަޕޯޓަރުން ޙާޟިރުވި މުބާރާތަކަށެވެ. ފޯރިގަދަ މެޗުތަކެއްގައި ފޯރިގަދަ ސަޕޯޓެއްދޭތަން ފެނިގެންދިޔަ މި މުބާރާތުގައި އެންމެ ފާހަގަކޮށްލެވުނު އެއްކަމަކީ އެއްޓީމެއްގެ ސަޕޯޓަރުން ބަރާބަރަށް ހޯލަށް ޙާޟިރުވެ އެ ޓީމު ކުޅުނު ކޮންމެ މެޗެއްގައި ފޯރިގަދަ ސަޕޯޓެއްދިންކަމެވެ. މުބާރާތުގެ މެޗުތައް ބަލަން އައި ބަޔަކަށްނަމަ އެއީ ކޮން ބައެއްކަން ވަރަށް ސާފުކޮށް އެނގޭނެއެވެ. އާދެ! ”މެކްސްކޮމް އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީ ބޯޅަ މުބާރާތް 2018″ގެ ”ބެސްޓް ސަޕޯޓަރސް އެވޯޑް“ ޙާޞިލުކުރި ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (އެފް.އެޗް.ޓީ.އެސް)ގެ ސަޕޯޓަރުންނެވެ.
ހުދުކުލައިގެ ބޯޑުތަކެއްގައި ނޫކުލައިން ބޮޑު އަކުރުން ”FHTS“ ޖަހާފައިހުރި ބޯޑުތަކަކީ ”އެފް.އެޗް.ޓީ.އެސް“ ޓީމު ކުޅުނު ކޮންމެ މެޗެއްގައި ފެނިގެންދިޔަ ބޯޑުތަކެކެވެ. އެ ބޯޑުތަކާއިއެކު ހޯލަށް ޙާޟިރުވެތިބި ސަޕޯޓަރުން ދައްކަމުންދިޔައީ އާދަޔާޚިލާފު ހިތްވަރެކެވެ. ހޯލު ގުގުމާލާފަދަ އަޑެކެވެ. އެ ޓީމާއި ވާދަކޮށް ކުޅުނު އެހެން ކޮންމެ ޓީމެއްގެ ސަޕޯޓަރުން ތިބެންޖެހުނީ އެފް.އެޗް.ޓީ.އެސްގެ ސަޕޯޓަރުންނާއި ދިމާއަށް ބަލާށެވެ. އެ ސަޕޯޓަރުންގެ އަޑުން ދެން އެހެން ހުރިހާ އަޑެއް ކަނޑުވާލައެވެ.
ގިނަ ޢަދަދެއްގެ ދަރިވަރުންގެ އިތުރުން އެ ފެކަލްޓީގެ އެކި މުވައްޒަފުންވެސް ފޯރިއާއިއެކު ޓީމަށް ހިތްވަރުދެމުންދިޔަ މަންޒަރު ފެނުނެވެ. އެއް ސެޓު ނިމި އަނެއް ސެޓު ފެށުމާއި ދެމެދު ލިބޭ ހުސްވަގުތުކޮޅު ލަވައެއް ކިޔާލާ ފަހަރުވެސްދެއެވެ. މިފަދަ ވަރުގަދަ ސަޕޯޓެއް ޓީމަށް ދިނުމަކީ އެ ޓީމަށް ލިބުނު ވަރަށް ބޮޑު ހިތްވަރަކަށް ވާނެކަން ޔަޤީނެވެ. ޚާއްޞަގޮތެއްގައި އެފް.އެޗް.ޓީ.އެސްގެ ލެކްޗަރަރ ނަދީމާ މިސް، އެފް.އެޗް.ޓީ.އެސް ޓީމުގެ މެނޭޖްމަންޓްގައާއި ޓީމަށް ސަޕޯޓުކުރުމުގައި ދެއްކެވި ހިތްވަރަކީ ފާހަގަކޮށްލަންޖެހޭ ކަމެކެވެ. އެ ޓީމަށް މުބާރާތް ކާމިޔާބު ނުކުރެވުނެއްކަމަކު، ޓީމަށް ލިބުނީ ބޮޑު ކާމިޔާބެކެވެ. ސަޕޯޓަރުން އެކަން ހަމަ ރަނގަޅަށްވެސް ޘާބިތުކޮށްދީފިއެވެ. ފައިނަލު މެޗުގައި އެފް.އެޗް.ޓީ.އެސް އާއި ވާދަކޮށް ތަށި އުފުލާލި އެފް.އެލް.އައި.އެސް އިން ފައިނަލުމެޗުގެ ފުރަތަމަ 2 ސެޓު ނަގާފައިވަނިކޮށް ފަހަތުން އަރާ 2 ސެޓު ހޯދާ ހަމަކުރީ ސަޕޯޓަރުންގެ މެދުކެނޑުމެއްނެތް އަޑުގެ ވެސް އެހީތެރިކަމާއި އެކުކަން ޔަޤީނެވެ. މިފަދަ ސަޕޯޓަކީ ހަމަ ކޮންމެ ޓީމަކަށްވެސް ބޭނުންވާނޭ ސަޕޯޓެވެ. ކޮންމެ ޓީމެއްގެ ކުޅުންތެރިންވެސް އެދި އެދި ތިބޭނޭ ސަޕޯޓެވެ. އެހެން ޓީމުތަކުގެ ސަޕޯޓަރުންނަށް ނަމޫނާ ސަޕޯޓެކެވެ.
– މުޙައްމަދު ޝާން ޢާމިރު –
(މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ)
