ނަރުހުންގެ ދުވަސް ފާހަގަކުރުމުގެގޮތުން ތަރާވީހެއް

ބައިނަށްލަގުވާމީ ނަރުހުންގެ ދުވަސް ފާހަގަކުރުމުގެގޮތުން ތަރާވީހެއް ބާއްވައިފިއެވެ. ނިޔަރެސް(އެމް.އެން.ޔޫ.އެސް.ޔޫ) އިން މިތަރާވީސް ބާއްވައިފައިވަނީ ސުކޫލް އޮފް ނާސިންގެ ކޮންފަރެންސް ހޯލްގައި 19 މެއި 2019 ވީ އާދީއްތަ ދުވަހުގެ ރޭގަނޑު 9-10 އަށެވެ. މި ތަރާވީސް ޝަރަފުވެރި ކޮއްދެއްވީ ސުކޫލް އޮފް ނާސިންގެ ޑީން އާސިޔާ އިބްރާހީމް އެވެ.

މި ތަރާވީހަށް ސުކޫލް އޮފް ނާސިންގެ ގިނަލެކްޗަރާއިންނާއި ދަރިވަރުންނަށް، އެމް.އެން.ޔޫ.އެސް.ޔޫގެ ބޯޑް މެންބަރުންނަށާއި ނިއުއެޑިސަން(ނޯޓް ކޮސްމެޓިކްސް)ގެ ބޭފުޅުންނަށް ވަނީ ދައުވަތު އެރުވިފައެވެ. އަދި މިދައުވަތު ޤަބޫލު ކުރައްވައި ވަރަށް ގިނަ ބޭފުޅުން ވަނީ މި ތަރާވީހުގައި ބައިވެރިވެފައެވެ.

މި ތަރާވީހަށް ތެރެއިން ވަރަށް ގިނަހަރަކާއްތައް ކުރިއަށްގެންގޮސްފައިވެއެވެ. އެންމެ ފުރަތަމަ ކަމެއްގެ ގޮތުން، އައި.ޖީ.އެމް.އެޗްއިން، ބައިނަށްލަގުވާމީ ނަރުހުންގެ ދުވަސް ފާހަގަކުރުމުގެގޮތުން ބޭއްވި ހޭންޑުބޯލް މުބާރާތުގައި ވާދަކުރި ސުކޫލް އޮފް ނާސިން ޓީމްގެ ހުރިހާ ކުޅުންތެރިންނަށާއި އެހީތެރިންނަށް މި ހޭންޑްބޯލް މުބާރާތުގައި ބައިވެރިވިކަމުގެ ހަދާނީ ލިޔުމެއް ނިއަރެސްގެ ފަރާތުން ވަނީ އަރުވާފައެވެ. މި ހަދާނީ ލިޔުންތައް ހުރިހާ ބޭފުޅުންނަށް ހަވާލުކޮށް ދެއްވީ މި މި ތަރާވީހުގެ ޝަރަފުވެރި މެހެމާން ސުކޫލް އޮފް ނާސިންގެ ޑީން އާސިޔާ އިބްރާހީމް އެވެ.

ދެވަނަ ކަމެއްގެގޮތުން، ބައިނަށްލަގުވާމީ ނަރުހުންގެ ދުވަސް ފާހަގަކުރުމުގެގޮތުން ނިޔަރެސްގެ ފާރާތުން ބޭއްވި ޕޯސްޓަރ މުބާރާތުގެ ވަނަ ވަނައަށްދިޔަބޭފުޅުންނަށް އިނާމް ހަވާލުކުރުމެވެ. މިމުބާރާތުގެ ތިންވަނައަށް ގޮސްފައިވަނީ ސުކޫލް އޮފް ނާސިންގެ ލެކްޗަރާ ސިޒްނާ މުހައްމަދުއެވެ. މިމުބާރާތުގެ ދެވަނައަށް ގޮސްފައިވަނީ ސުކޫލް އޮފް ނާސިންގެ ދަރިވަރު  ފާތިމަތު އަބޫބަކުރެވެ. މިމުބާރާތުގެ އެއްވަނައަށް ގޮސްފައިވަނީވެސް ސުކޫލް އޮފް ނާސިންގެ ދަރިވަރެއްކަމުގައިވާ ހަފްނާ ޝަކީބެވެ. މިމުބާރާތުގެ ގަދަ ފަސްބައިވެރިންނަށްވެސް ވަނީ އިނާމް ހަވާލުކުރެވިފައެވެ. މި އިނާމްތައް ހަވާލުކޮއްދެއްވީ މި ތަރާވީހުގެ ސްޕޮންސަރ ނިއުއެޑިސަން(ނޯޓް ކޮސްމެޓިކްސް)ގެ މާކެޓިން މެނޭޖަރ އަބުދުއްލާ ނަޒީހްއެވެ.

ތިންވަނަ ހަރަކާތެއްގެ ގޮތުން މި ތަރާވީހުގެ ބައިވެރިންގެ މެދުގައި ކުއިޒް މުބާރާތެއް ބޭއްވުނެވެ. އަދި މިކުއިޒްގެ ވަނަ ވަނައަށް ދިޔަ ޓީމްތަކައް އިނާމް ހަވާލް ކޮއްދެއްވީ އެމް.އެން.ޔޫ.އެސް.ޔޫގެ ރައީސް އަރުޝަދު އަޝްރަފްއެވެ.

ނިޔަރެސްގެ ފަރާތުން ބޭއްވުނު މި ތަރާވީހުގެ މަގުސަދެއް ކަމުގައިވެފައިވަނީ އެންމެންގެ މެދުގައި އެކުވެރިކަން ބަދަހިކުރުމާއެކު ހުރިހާ އެންމެންނަށްވެސް އުފާވެރި މަޖާކޮއްލެވޭނެ ވަގުތުކޮޅެއް ފޯރުކޮށްދިނުމެވެ. މި ތަރާވީސް ކާމިޔާބީއާއެކު ނިންމައި ލެވުނީ ސްކޫލް އޮފް ނާސިންގެ ވަރަށް ގިނަ ބޭފުޅުންގެ އެހީއާއެކުގައިކަންވެސް ފާހަގަކޮއްލަމެވެ.

ލިޔުނީ:ފާތިމަތު އަބޫބަކުރު

މީޑިޔާ ކޯޑިނޭޓަރ، ނިޔަރެސް، އެމް.އެން.ޔޫ.އެސް.ޔޫ