ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ ފަރާތުން އިންތިޒާމުކޮށްގެން ބާއްވާ 2019 ވަނަ އަހަރުގެ ބަހުސް މުބާރާތުގެ ފުރަތަމަ ބުރުގެ ބަހުސްތައް މިއަދު ކުރިޔަށް ގެންގޮސްފިއެވެ.
މިއަދު ފުރަތަމަ ކުރިއަށް ދިޔައީ ފުރަތަމަ ބުރުގެ 3 ވަނަ ބަހުސްއެވެ. މި ބަހުސްގައި ވާދަކުރީ ފެކަލްޓީ އޮފް ލޯ އެންޑް އިސްލާމިކް ސްޓަޑީޒްގެ އޭ ޓީމާއި ސެންޓަރ ފޯ ފައުންޑޭޝަން ސްޓަޑީޒްއެވެ. މި ބަހުސްއިން 596 ޕޮއިންޓާއެކު ކުރި ހޯދާފައިވަނީ ފެކަލްޓީ އޮފް ލޯ އެންޑް އިސްލާމިކް ސްޓަޑީޒްގެ އޭ ޓީމެވެ.މި ބަހުސްގެ އެންމެ މޮޅު ބަހުސްކުރުންތެރިއަކަށް ހޮވިފައިވަނީ ފެކަލްޓީ އޮފް ލޯ އެންޑް އިސްލާމިކް ސްޓަޑީޒްގެ ދަރިވަރު ޢާއިޝަތު ޒަހާއެވެ.
މިއަދުގެ ދެވަނަ ބަހުސް ގައި ވާދަކޮށްފައިވަނީ ސްކޫލް އޮފް ނާރސިންގ އާއި އެމް.އެން.ޔޫ ބިޒްނަސް ސްކޫލެވެ. 689 ޕޮއިންޓާއެކު އެމް.އެން.ޔޫ ބިޒްނަސް ސްކޫލް ބަހުސް ކާމިޔާބު ކޮށްފައިވާއިރު ބަހުސްގެ އެންމެ މޮޅު ބަހުސް ކުރުންތެރިއަކަށް ހޮވިފައިވަނީ އެމް.އެން.ޔޫ ބިޒްނަސް ސްކޫލުގެ ދަރިވަރު ފާޠިމަތު މާޝާއެވެ. މިއީ މިމުބާރާތުގެ ފުރަތަމަ ބުރުގައި މިހާތަނަށް ކުރިއަށް ދިޔަ 4 ބަހުސްގެ ތެރެއިން ވަކި ބަހުސްކުރުންތެރިއަކަށް ލިބުނު އެންމެ ގިނަ ޕޮއިންޓެވެ.
ފުރަތަމަ ބުރުގެ ބާކީ އޮތް ދެބަހުސްގައި ބުދަ ދުވަހު 4 ޓީމު ވާދަކުރާނެއެވެ. ފުރަތަމަ ބުރުގެ ބަހުސްތަކުން މޮޅުވާ 6 ޓީމު ދެން ވާދަކުރަން ޖެހޭނީ ދެވަނަ ބުރުގެ ބަހުސްތަކުގައެވެ. ދެވަނަ ބުރުގައި 3 ބަހުސެއް ކުރިއަށް ގެންދާގޮތަށް ވަނީ ހަމަޖެހިފައެވެ.
ލިޔުނީ:ޝީޒާ މުޙައްމަދު
އެމް.އެންޔޫ.އެސްޔޫ މީޑިޔާ
