2019ވަނަ އަހަރު ފުރަތަމަ ސެމިސްޓަރއިން ފެށިގެން ސްކޮލާސް ގާލާ ނައިޓްގެ ނަމުގައި ބާއްވަމުން އަންނަ މި ޙަރަކާތް މިއަހަރު ބީއެސްއެސްއޭ އާއި ތަރަހަ ގުޅިގެން ބާއްވައިފިއެވެ.
އެމް.އެން.ޔޫ ބިޒްނަސް ސްކޫލާއި އަދި ސެންޓަރ ފޯ ފައުންޑޭޝަން ސްޓަޑީސްގެ ކޯސްތަކަށް އަލަށް ގުޅުނު ދަރިވަރުންގެ ތެރެއިން 100އަށްވުރެ ގިނަ ދަރިވަރުން މިޙަރަކާތުގައި ބައިވެރިވިއެވެ. ފެބްރުއަރީ 8 ވީ ހޮނިހިރުދުހުރޭ އެމް.އެން.ޔޫ ބިޒްނަސް ސްކޫލްގެ އޮޑިޓޯރިއަމްގައި މިޙަރަކާތް ކުރިޔަށްގެންދިޔަ އިރު އަލަށްގުޅުނު ދަރިވަރުންގެ އިތުރުން ބީއެސްއެސްއޭ އަދި ތަރަހައިގެ ގިނަ ލީޑަރުންތަކެއް ބައިވެރިވިއެވެ. މީގެ އިތުރުން އެމް.އެން.ޔޫ.އެސް.ޔޫ ހިންގާކޮމެޓީގެ މެމްބަރުންނާއި އަދި އެމް.އެން.ޔޫ.އެސް.ޔޫގެ ކުރީގެ ރައީސް ބައިވެރިވެލެއްވިއެވެ.
ތަފާތު އެކި ގޭމްތަކާއެކު ކުރިޔަށްދިޔަ މި ޙަރަކާތް ފެށިގެންދިޔައީ އަލަށް ގުޅުނު ދަރިވަރުންނަށް ހާއްސަ ބޮޑުބެރު ލަވަޔަކުންނެވެ. އެމް.އެން.ޔޫ.އެސް.ޔޫ ބޮޑުބެރު ގްރޫޕްގެ ލަވަތަކުގެ އިތުރުން ބީ.އެސް ގޮމަ ގްރޫޕްގެ ހާއްސަ ޙަރަކާތެއްވެސް މިރޭ ފެނިގެންދިޔައެވެ. މީގެ އިތުރުން އެމް.އެން.ޔޫ.އެސް.ޔޫގެ ރައީސް އަދި ކުރީގެ ރައީސްގެ އިތުރުން އެމް.އެން.ޔޫ ކައުންސިލްގައި ދަރިވަރުން ތަމްސީލުކުރާ މެމްބަރުވަނީ ދަރިވަރުންނާ މުޙާތަބުކޮށް ވާހަކަދައްކާފައެވެ.
”އަޅުގަނޑުމެން ދަރިވަރުންގެ ޔުނިއަންގެ ފަރާތުން އަބަދުވެސް މަސައްކަތްކުރަނީ އެމް.އެން.ޔޫ ދަރިވަރުންގެ ކުރިއެރުމަށް. އެކުރިއެރުމަށް ދަރިވަރުންނަށް އަބަދުވެސް ފުރުޝަތު އޮންނާނެ އަދި އެފުރުޝަތުގެ ބޭނުން ހިފަން ބޭނުންވާ ދަރިވަރުންނަށް އެފުރުޝަތު އަބަދުވެސް ލިބިގެންދާނެ“
-އެމް.އެން.ޔޫ.އެސް.ޔޫގެ ކުރީގެ ރައީސް މުހައްމަދު ޝާން އާމިރު-
ސްކޮލާސް ގާލާ ނައިޓަކީ މިއަހަރު އެމް.އެން.ޔޫ.ބީއެސް އަދި ސީ.އެފް.އެސް އާއި އަލަށް ގުޅުނު ދަރިވަރުންނާއެކު މަޖާ އުފާވެރި ވަގުތުކޮޅެއް ހޭދަކުރުމުގެ ބޭނުމުގައި ބީއެސްއެސްއޭ އަދި ތަރަހައިން އިންތިޒާމުކޮށްގެން ބޭއްވި ޙަރަކާތެކެވެ. ބީއެސްއެސްއޭ އަދި ތަރަހައިން ގުޅިގެން މިދިޔަ އަހަރު އެނުއަލް ޓްރިޕެއް ގޮސްފައިވާއިރު ސްކޮލާސް ގާލާ ނައިޓަކީ މިއަހަރު މި ދެގޮފިން ގުޅިގެން ބޭއްވި ފުރަތަމަ ޙަރަކާތެވެ.
ލިޔުނީ : ފާތިމަތު ޒަހްރާ
މީޑިއާ ކޯޑިނޭޓަރ، ބީއެސްއެސްއޭ، އެމް.އެން.ޔޫ.އެސް.ޔޫ
