ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން 1442 ވަނަ އަހަރުގެ ރަމަޟާން ކުއިޒް މުޅިން ތަފާތު ގޮތަކަށް ފަށައިފިއެވެ.
މިއިީ ބަރަކާތްތެރި ރަމަޟާން މަހާ ގުޅުވައިގެން އާންމުން ހޭލުންތެރި ކުރުމަށް ކޮންމެ އަހަރަކުވެސް ގެނެސްދޭ ދީނީ ސުވާލު މުބާރާތެކެވެ. ވޭތުވެދިޔަ އަހަރުތަކުގައި ރޯދަމަހު ގެނެސްދެވުނު ”ޑެއިލީ އިންސައިޓްސް“، “ ހިކުމަތުގެ ބަސް“ އަދި މިފަދަ ދީނީ މައުލޫމާތުތައް ހިމެނޭ ޕްރޮގުރާމްތައް އެކައްޗެއްގެ ސިފައިގައި މިފަހަރުގެ ކުއިޒްގައި ވަނީ ހިމެނިފައެވެ. އެގޮތުން ސުވާލު ގެނެސްދެވެނީ ދީނީ ޢިލްމުވެރިއެއްގެ ދަރުހަކަށްފަހުއެވެ. މި ދަރުސްގައި އެދުވަހެއްގެ ސުވާލާ ގުޅޭ މަޢުލޫމާތު ދެއްވާނެއެވެ. ހަފްތާގެ 3 ދުވަހު މި ކުއިޒް ގެނެސްދިނުމަށް ހަމަޖެހިފައިވަނީ ކޮންމެ ދުވަހަކުވެސް ތަފާތު މައުޟޫއަކަށެވެ.
މި މުބާރާތުގައި އެންމެ ގިނަ ސުވާލުގެ ޖަވާބު ދިމާކުރައްވާ ބޭފުޅުންގެ ތެރެއިން ގުރުއަތުން ހޮވޭ ފަރާތަކަށް ޚާއްޞަ އިނާމެއް ދިނުމަށް ހަމަޖެހިފައިވެއެވެ. އަދި ކޮންމެ ހަފްތާއެއް ނިމުމުން، އެ ހަފްތާގެ ސުވާލުތަކުގެ ތެރެއިން އެންމެ ގިނަ ސުވާލުތަކުގެ ޖަވާބު ދިމާކުރައްވާފައިވާ ފަރާތްތަކުގެ ތެރެއިން ގުރުއަތުން ހޮވޭ ފަރާތަކަށް އިނާމު ދިނުމަށް ހަމަޖެހިފައިވެއެވެ.
މި ރަމަޟާންމަހު އެމް.އެން.ޔޫ.އެސް.ޔޫ ގޮފިތަކުން ހިންގާ ބައެއް ޙަރަކާތްތަކުގެ ތެރޭގައި ދީނީ މައުލޫމާތު ފޯރުކޮށްދޭ ޙަރަކާތްތަކާއި އާންމު ދިރިއުޅުމާ ގުޅޭ މައުލޫމާތު ފޯރުކޮށްދޭ ޙަރަކާތްތައް ހިމެނެއެވެ. އަދި އެމް.އެން.ޔޫގެ ދަރިވަރުންނަށް ހުޅުވާލައިގެން ބޭއްވުނު މަދަހަ މުބާރާތާއި ޤުރުއާން މުބާރާތް މި ރަމަޟާންމަހު ދެއްކުމަށް ވަނީ ހަމަޖެހިފައެވެ. ހަމައެއާއެކު، ކާބޯތަކެއްޗާއި ގުޅޭ ޕުރޮގުރާމުތަކާއި، މުނިފޫހިފިލުވުމުގެ ޕުރޮގުރާމުތައްވެސް ކުރިއަށް ގެންދިއުމަށް ވަނީ ހަމަޖެހިފައެވެ.
2018 ވަނަ އަހަރުން ފެށިގެން ސިލްސިލާކޮށް ކޮންމެ ރަމަޟާން މަހެއްގައި ބާއްވަމުން އަންނަ ”އެމް.އެން.ޔޫ.އެސް.ޔޫ ރަމަޟާން ކުއިޒް“ އަކީ އެމް.އެން.ޔޫ.އެސް.ޔޫ ގެ މީޑިއާ ޓީމުން ކުރިއަށް ގެންދާ ހަރަކާތެެކެވެ. ނަމަވެސް 2020 ވަނަ އަހަރު ހާލަތު ތަން ނުދިނުމުގެ ސަބަބުން މި ކުއިޒް ދަރިވަރުންގެ ޔޫނިއަންގެ އިންސްޓަގުރާމް މެދުވެރިކޮށް އެއްވެސް އިނާމަކާއި ނުލައި ވާނީ ގެނެސްދެވިފައެވެ.
