ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން ”އެމް.އެން.ޔޫ.އެސް.ޔޫ ރޯދަ ރަން“ ގެ ނަމުގައި ދުވުމުގެ ޗެލެންޖެއް އޭޕްރީލް 16 ވީ ހުކުރު ދުވަހު ފަށައިފިއެވެ.
ފާހަގަކޮށްލެވޭ ގޮތުގައި މި ޗެލެންޖަކީ 2021 އޭޕްރީލް 16 އިން މެއި 20 ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ) ގެ ހުރިހާ ދަރިވަރުންނާއި މުވައްޒަފުންގެ އިތުރުން މުޅި ރާއްޖޭގެ ރައްޔިތުންނަށް ހުޅުވާލައިގެން ބާއްވާ ޗެލެންޖެކެވެ. މި ދުވުމުގެ ޗެލެންޖު ފުރިހަމަކުރާ ކޮންމެ ފަރާތަކަށް މެޑައްޔެއް ދިނުމަށް ހަމަޖެހިފައިވާއިރު، 1 ވަނަ، 2 ވަނަ އަދި 3 ވަނަ އަށް ހޮވޭ ފަރާތްތަކަށް ޚާއްސަ އިނާމެއް ދިނުމަށް އެމް.އެން.ޔޫ.އެސް.ޔޫ އިން ވަނީ ކަނޑައަޅާފައެވެ.
”މި ހަރަކާތަކީ ޔޫނިއަންގެ 9 ވަނަ ދައުރުން އިސްކަންދޭނެ ދާއިރާތަކުގެ ތެރޭގައާއި އެމް.އެން.ޔޫގެ ސްޓްރެޓީޖިކް ޕްލޭންގައިވާ ލަނޑުދަނޑިއެއް ކަމުގައިވާ ދުޅަހެޔޮ ސިއްހަތަށް އިސްކަން ދިނުމުގެ ގޮތުން އަދި އެ.މް.އެން.ޔޫގެ އަހަރީ ދުވަހު ބޭއްވުމަށް ރާވަމުންދާ ދިގު ހިނގުމުގެ ރޭހަށް ތައްޔާރުވުމުގެ ގޮތުން ކުރިއަށް ގެންދާ ހަރަކާތެއް. ހަމައެއާއެކު، ބަލިތަކުން ދިފާއު ވުމަށް މިފަދަ ކަންކަމަކީ ކުރުން މުހިންމު ކަމެއްކަން ފާހަގަ ކުރަން“
– ޔޫނިއަންގެ ރައީސް ޢަބްދުﷲ ޝަހުނީޒް –
މި ހަރަކާތް ކުރިއަށް ގެންދިއުމަށް ހަމަޖެހިފައިވަނީ ނައިކް ރަން އެޕްލިކޭޝަން މެދުވެރިކޮށެވެ. މި ހަރަކާތުގައި ބައިވެރިވުމަށް؛
MNUSU Roadha Run Challenge
NRC Challenge Invite
މީގެ އިތުރުން ”އެމް.އެން.ޔޫ ދިގު ހިނގުން“ ގެ ނަމުގައި އެމް.އެން.ޔޫ ގެ ދަރިވަރުންނާއި މުވައްޒަފުންނަށް ހުޅުވާލައިގެން ވަނީ ހިނގުމުގެ ހަރަކާތެއް ފަށާފައެވެ. މި ހަރަކާތަކީ ”ދުޅަހެޔޮ އެމް.އެން.ޔޫ، ދުޅަހެޔޮ މުޖުތަމަޢު“ ޝިޢާރުގެ ދަށުން ހިންގޭ ހަރަކާތެކެވެ. އަދި މި ހަރަކާތުގެ މަޤްސަދަކީ ދުޅަހެޔޮ ސިއްހަތެއްގައި ދެމިހުރުމަށް އާދަ ކުރުވާ އުފާވެރި އެކުވެރި މާޙައުލެއް ޤާއިމްކުރުމެވެ. މި ހަރަކާތަކީ އެމް.އެން.ޔޫގެ ސްޓްރެޓީޖިކް ޕްލޭން 2020-2025 ގެ 8.7 ވަނަ މާއްދާގެ ދަށުން ޙާޞިލްކުރަން ކަނޑައަޅާފައިވާ ލަނޑުދަނޑިއެކެވެ.
މިފަދަ ހަރަކާތްތައް އެމް.އެން.ޔޫ.އެސް.ޔޫ އިން އަބަދުވެސް އަންނަނީ ބާއްވަމުންނެވެ. މިފަދަ ހަރަކާތްތައް ބޭއްވުމުގެ މަޤްސަދަކީ އެމް.އެން.ޔޫ ދަރިވަރުންނާއި އާއްމުން ސިއްހީ ކަންކަމަށް އިސްކަންދިނުމަށް ބާރުއެޅުމާއި، އެކުވެރިކަމާއި އުފާވެރި މާޙައުލެއް ކަށަވަރުކުރުމެވެ.
