ވާދަވެރިގޮތަކަށް ގުރޫޕް ސްޓޭޖްގެ ފަހު ބުރުގެ އެއްވަނަ އިބްރާހީމް ހާމިދު ހާސިލްކޮށްފިއެވެ.
ޔޫރޯ 2020އާއި ދިމާކޮށްގެން އެމް.އެން.ޔޫ.އެސް.ޔޫއިން ކުރިޔަށްގެންދާ ”ލޮކްޑައުން ޔޫރޯ ފޯރި“ މުބާރާތުގެ ތިންވަނަ ބުރުގެ އެއްވަނަ އިބްރާހީމް ހާމިދު ހާސިލްކުރީ އިތުރު ދެބައިވެރިޔަކާއި ޕޮއިންޓު ގޮތުން އެއްވަރުވުމުން ނެގި ގުރުއަތަކުންނެވެ. އިބްރާހީމް ހާމިދުގެ އިތުރުން ފުރަތަމަ ބުރު ކާމިޔާބުކުރި މުހައްމަދު މައިޝާންއާއި ދެވަނަ ބުރު ކާމިޔާބުކުރި މުހައްމަދު ޝަރީފް ވަނީ 18 ޕޮއިންޓާއެކު އެއްވަނައަށް ވާދަކޮށްފައެވެ. 3 ވަނަ ބުރުގެ އެއްވަނަ ބައިވެރިޔާއަށް އިނާމު ހަވާލުކޮށްދެއްވީ އެމް.އެން.ޔޫ.އެސް.ޔޫގެ ރައީސް ޢަބްދުﷲ ޝަހުނީޒެވެ.
ޖުމްލަ 18 ޕޮއިންޓާއެކު ތިން ބައިވެރިން އެއްވަނައަށް ވާދަކޮށްފައިވާއިރު، 16 ޕޮއިންޓާއެކު ދެވަނަ ހޯދާފައިވަނީ ހަސަން ފިރާގެވެ. އަދި 15 ޕޮއިންޓާއެކު ތިންވަނައަށް ދިޔައީ ހުސައިން ރާއިފެވެ.
7 ބުރަކަށް ބަހާލައިގެން ކުރިއަށްގެންދާ މި މުބާރާތުގެ ކޮންމެ ބުރެއްގައި އެންމެ ގިނަ ޕޮއިންޓް ހޯދާ ފަރާތަށް ”ސަޕްރައިޒް“ އިނާމެއް ހުށަހެޅިފައިވާއިރު މުޅި މުބާރާތުގައި އެންމެ ގިނަ ޕޮއިންޓް ހޯދާ 3 ފަރާތަށް އަގުހުރި އިނާމުތަކެއްވަނީ ހުށަހެޅިފައެވެ. ޖުމްލަ 36 މެޗު ކުޅެވި މުބާރާތުގެ 3 ބުރު ނިމިފައިވާއިރު މިހާތަނަށް މި މުބާރާތުގައި 111 ފަރާތަކުން ވަނީ ބައިވެރިވެފައެވެ.
މި މުބާރާތުން އެއްވަނަ އަށް ހޮވޭ ފަރާތަކަށް މި މުބާރާތުގެ މެއިން ސްޕޮންސަރ ”ޕްރޯ ސޮކާ“ ގެ ފަރާތުން ފުޓްސަލް ނުވަތަ ފުޓްބޯޅަ ބޫޓެއް ދިނުމަށް ވަނީ ނިންމާފައެވެ. ދެވަނަ އަށް ދާ ފަރާތަކަށް އެމް.އެން.ޔޫ.އެސް.ޔޫގެ ފަރާތުން ފުޓްސަލް ބޯޅައެއް ދިނުމަށް ނިންމާފައިވާއިރު، 3 ވަނަ އަށް ދާ ފަރާތަކަށް އެ ފަރާތަކަށް އެންމެ ކަމުދާ ޓީމެއްގެ ޖާޒީ ދިނުމަށް ވަނީ ނިންމާފައެވެ. އަދި މީގެން ކޮންމެ ފަރާތަކަށް ސަޕްރައިޒް އިނާމެއް ދިނުމަށްވެސް އެމް.އެން.ޔޫ.އެސް.ޔޫ އިން ވަނީ ނިންމާފައެވެ.
ފުރަތަމަ ދެ ބުރުގެ އެއްވަނަ ހާސިލްކުރި ބައިވެރިންނަށް މިހާރު ވާނީ އިނާމު ހަވާލުކުރެވިފައެވެ. މުބާރާތުގެ ފުރަތަމަ ބުރުގެ އެއްވަނައަށް އިނާމު ހަވާލުކޮށްދެއްވީ އެމް.އެން.ޔޫ.އެސް.ޔޫގެ 6 އަދި 7 ވަނަ ދައުރުގެ ސެކްރެޓަރީ، އަނާ އަހުމަދެވެ. މި އިނާމު ހަވާލުކޮށްފައިވަނީ ށ.ފޯކައިދޫގައެވެ. އަދި، ލ.ގަމުގައި ހުރި ދެވަނަ ބުރުގެ އެއްވަނަ ބައިވެރިޔާއަށް އިނާމު ހަވާލުކޮށްދެއްވީ އެމް.އެން.ޔޫ.އެސް.ޔޫގެ 6 އަދި 7 ވަނަ ދައުރުގެ ނައިބު ރައީސް (އިތުރު ހަރަކާތް)، ހަސަން ޝާހެވެ.
މުބާރާތުގެ 4 ވަނަ ބުރު ހޮނިހިރު ދުވަހު (26 ޖޫން 2021) ފެށޭނެއެވެ. ފުރަތަމަ ތިން ބުރުގައި 12 މެޗު ކުޅެވުނު ނަމަވެސް، 4 ވަނަ ބުރުގައި ކުޅޭނީ 8 މެޗެވެ. މުބާރާތުގެ ބައިވެރިންގެ ޖުމްލަ ޕޮއިންޓް ޓޭބަލް އަދި ރައުންޑްގެ ޕޮއިންޓް ޓޭބަލް ބަލާލެވޭު އެމް.އެން.ޔޫ.އެސް.ޔޫ ފޭސްބުކް ޕޭޖަށް އަރުވާ މުބާރާތުގެ ޕޯސްޓްތަކާއެކު ހިމެނިފައިވާނެއެވެ.
މި މުބާރާތުގެ މަޤްޞަދަކީ ޔޫރޯ މުބާރާތުގެ ފޯރި އާންމުންގެ ތެރޭގައި އިތުރުކުރުމާއި، މާލޭގެ ފުރަބަންދު ޙާލަތުގައި ގޭގައި ތިބެގެން ޝައުޤުވެރިކަމާއެކު ބައިވެރިވެވޭނެ ޙަރަކާތެއް ޢާންމުންނާ ހަމައަށް ގެނެސްދިނުމެވެ. މުބާރާތުގެ މެއިން ސްޕޮންސަރ އަކީ ”ޕްރޯ ސޮކާ“ އެވެ.
