4 ވަނަ ބުރުގެ އެއްވަނަ ހަސަން ފިރާޤަށް

4 ވަނަ ބުރުގެ އެއްވަނަ ހަސަން ފިރާޤް ހާސިލްކޮށްފިއެވެ.

ޔޫރޯ 2020އާއި ދިމާކޮށްގެން އެމް.އެން.ޔޫ.އެސް.ޔޫއިން ކުރިޔަށްގެންދާ ”ލޮކްޑައުން ޔޫރޯ ފޯރި“ މުބާރާތުގެ ހަތަރު ވަނަ ބުރުގެ އެއްވަނަ ހަސަން ފިރާޤް ހާސިލްކުރީ އިތުރު ދެބައިވެރިޔަކާއި ޕޮއިންޓު ގޮތުން އެއްވަރުވުމުން ނެގި ގުރުއަތަކުންނެވެ. 9 ޕޮއިންޓާއެކު މި ގުރުއަތުގައި އެއްވަނައަށް ވާދަކޮށްފައިވަނީ މުހައްމަދު މައިޝާންއާއި މައިޔަމް ޖައުދާ މައުމޫންގެ އިތުރުން ހަސަން ފިރާޤެވެ. 4ވަނަ ބުރުގެ އެއްވަނަ ބައިވެރިޔާއަށް އިނާމު ހަވާލުކޮށްދެއްވީ އެމް.އެން.ޔޫ.އެސް.ޔޫގެނައިބު ރައީސް (ގޮފިތައް) ޙުސައިން ޒައިދެވެ.

ޖުމްލަ 8 ޕޮއިންޓާއެކު ދެވަނަ އިބްރާހިމް ހާމިދު ހާސިލްކޮށްފައިވާއިރު، 6 ޕޮއިންޓާއެކު ތިންވަނައަށް 3 ބައިވެރިއެއް ގޮސްފައިވެއެވެ. އެއީ ޠަޙާ ޢަބްދުއްރައްޒާޤާއި ޙުސައިން ފިރާޤުގެ އިތުރުން މޫސާ އީމާން ޢަބްދުއްރަހްމާނެވެ.

7 ބުރަކަށް ބަހާލައިގެން ކުރިއަށްގެންދާ  މި މުބާރާތުގެ ކޮންމެ ބުރެއްގައި އެންމެ ގިނަ ޕޮއިންޓް ހޯދާ ފަރާތަށް  ”ސަޕްރައިޒް“ އިނާމެއް ހުށަހެޅިފައިވާއިރު މުޅި މުބާރާތުގައި އެންމެ ގިނަ ޕޮއިންޓް ހޯދާ 3 ފަރާތަށް އަގުހުރި އިނާމުތަކެއްވަނީ ހުށަހެޅިފައެވެ. ޖުމްލަ 44 މެޗު ކުޅެވި މުބާރާތުގެ 4 ބުރު ނިމިފައިވާއިރު މިހާތަނަށް މި މުބާރާތުގައި 115 ފަރާތަކުން ވަނީ ބައިވެރިވެފައެވެ.

މި މުބާރާތުން އެއްވަނަ އަށް ހޮވޭ ފަރާތަކަށް މި މުބާރާތުގެ މެއިން ސްޕޮންސަރ ”ޕްރޯ ސޮކާ“ ގެ ފަރާތުން ފުޓްސަލް ނުވަތަ ފުޓްބޯޅަ ބޫޓެއް ދިނުމަށް ވަނީ ނިންމާފައެވެ. ދެވަނަ އަށް ދާ ފަރާތަކަށް އެމް.އެން.ޔޫ.އެސް.ޔޫގެ ފަރާތުން ފުޓްސަލް ބޯޅައެއް ދިނުމަށް ނިންމާފައިވާއިރު، 3 ވަނަ އަށް ދާ ފަރާތަކަށް އެ ފަރާތަކަށް އެންމެ ކަމުދާ ޓީމެއްގެ ޖާޒީ ދިނުމަށް ވަނީ ނިންމާފައެވެ. އަދި މީގެން ކޮންމެ ފަރާތަކަށް ސަޕްރައިޒް އިނާމެއް ދިނުމަށްވެސް އެމް.އެން.ޔޫ.އެސް.ޔޫ އިން ވަނީ ނިންމާފައެވެ.

މުބާރާތުގެ 5 ވަނަ ބުރު ހުކުރު ދުވަހު (2 ޖުލައި 2021) ފެށޭނެއެވެ. 5 ވަނަ ބުރުގައި ހިމެނޭނީ ކުއާޓާ ފައިނަލްގެ 4 މެޗެވެ. މުބާރާތުގެ ބައިވެރިންގެ ޖުމްލަ ޕޮއިންޓް ޓޭބަލް އަދި ރައުންޑްގެ ޕޮއިންޓް ޓޭބަލް ބަލާލެވޭ ު އެމް.އެން.ޔޫ.އެސް.ޔޫ ފޭސްބުކް ޕޭޖަށް އަރުވާ މުބާރާތުގެ ޕޯސްޓްތަކާއެކު ހިމެނިފައިވާނެއެވެ.

މި މުބާރާތުގެ މަޤްޞަދަކީ ޔޫރޯ މުބާރާތުގެ ފޯރި އާންމުންގެ ތެރޭގައި އިތުރުކުރުމާއި، މާލޭގެ ފުރަބަންދު ޙާލަތުގައި ގޭގައި ތިބެގެން ޝައުޤުވެރިކަމާއެކު ބައިވެރިވެވޭނެ ޙަރަކާތެއް ޢާންމުންނާ ހަމައަށް ގެނެސްދިނުމެވެ. މުބާރާތުގެ މެއިން ސްޕޮންސަރ އަކީ ”ޕްރޯ ސޮކާ“ އެވެ.