ޔޫރޯ 2020 ފައިނަލް މެޗުގެ ނަތީޖާ ދިމާކޮށް ލޮކްޑައުން ޔޫރޯ ފޯރީގެ 7 ވަނަ ބުރުގެ އެއްވަނަ އަހުމަދު ސާޖިދު ހާސިލްކޮށްފިއެވެ.
ޔޫރޯ 2020އާއި ދިމާކޮށްގެން އެމް.އެން.ޔޫ.އެސް.ޔޫއިން ކުރިޔަށްގެންދެވުނު ”ލޮކްޑައުން ޔޫރޯ ފޯރި“ މުބާރާތުގެ 7 ވަނަ ބުރުގައި އަހުމަދު ސާޖިދުގެ އިތުރުން 7 ބައިވެރިން ވަނީ ފައިނަލް މެޗުގެ ނަތީޖާ ދިމާކޮށްފައެވެ. އެހެންކަމުން އެއްވަނަ ބައިވެރިޔާ ހޮވާފައިވަނީ ނެގުނު ގުރުއަތަކުންނެވެ. 7 ވަނަ ބުރުގެ އެއްވަނަ ބައިވެރިޔާއަށް އިނާމު ހަވާލުކޮށްދެއްވީ އެމް.އެން.ޔޫ.އެސް.ޔޫގެ މީޑިއާ ކޯޑިނޭޓަރ ޝުއައިބު މުހައްމަދު އިގްބާލްއެވެ.
7 ބުރަކަށް ބަހާލައިގެން ކުރިއަށްގެންދިޔަ މި މުބާރާތުގެ ކޮންމެ ބުރެއްގައި އެންމެ ގިނަ ޕޮއިންޓް ހޯދާ ފަރާތަށް ”ސަޕްރައިޒް“ އިނާމެއް ހުށަހެޅިފައިވާއިރު މުޅި މުބާރާތުގައި އެންމެ ގިނަ ޕޮއިންޓް ހޯދާ 3 ފަރާތަށް އަގުހުރި އިނާމުތަކެއްވަނީ ހުށަހެޅިފައެވެ. ޖުމްލަ 51 މެޗު ކުޅެވި މުބާރާތުގެ 7 ބުރު ނިމިފައިވާއިރު މި މުބާރާތުގައި 124 ފަރާތަކުން ވަނީ ބައިވެރިވެފައެވެ.
މި މުބާރާތުން އެއްވަނަ އަށް ހޮވޭ ފަރާތަކަށް މި މުބާރާތުގެ މެއިން ސްޕޮންސަރ ”ޕްރޯ ސޮކާ“ ގެ ފަރާތުން ފުޓްސަލް ނުވަތަ ފުޓްބޯޅަ ބޫޓެއް ދިނުމަށް ވަނީ ނިންމާފައެވެ. ދެވަނަ އަށް ދާ ފަރާތަކަށް އެމް.އެން.ޔޫ.އެސް.ޔޫގެ ފަރާތުން ފުޓްސަލް ބޯޅައެއް ދިނުމަށް ނިންމާފައިވާއިރު، 3 ވަނަ އަށް ދާ ފަރާތަކަށް އެ ފަރާތަކަށް އެންމެ ކަމުދާ ޓީމެއްގެ ޖާޒީ ދިނުމަށް ވަނީ ނިންމާފައެވެ. އަދި މީގެން ކޮންމެ ފަރާތަކަށް ސަޕްރައިޒް އިނާމެއް ދިނުމަށްވެސް އެމް.އެން.ޔޫ.އެސް.ޔޫ އިން ވަނީ ނިންމާފައެވެ.
މި މުބާރާތުގެ މަޤްޞަދަކީ ޔޫރޯ މުބާރާތުގެ ފޯރި އާންމުންގެ ތެރޭގައި އިތުރުކުރުމާއި، މާލޭގެ ފުރަބަންދު ޙާލަތުގައި ގޭގައި ތިބެގެން ޝައުޤުވެރިކަމާއެކު ބައިވެރިވެވޭނެ ޙަރަކާތެއް ޢާންމުންނާ ހަމައަށް ގެނެސްދިނުމެވެ. މުބާރާތުގެ މެއިން ސްޕޮންސަރ އަކީ ”ޕްރޯ ސޮކާ“ އެވެ.
