އަހަރެމެންވެސް ފަލަސްތީނާއިއެކު – ފަންޑްރައިސިންގ އިވެންޓް ހޮނިހިރު ދުވަހުވެސް ކުރިއަށްދާނެ

މާރސީ ޖަމިއްޔާ އާއި ހަޔަރ އެޑިއުކޭޝަން ދަރިވަރުން އިސްނަގައިގެން ކުރިޔަށް ގެންދާ ”އަހަރެމެންވެސް ފަލަސްތީނާއެކު“ ފަންޑްރައިސިންގ އިވެންޓް ހޮނިހިރު ދުވަހުވެސް ކުރިޔަށް ގެންދިޔުމަށް ނިންމައިފިއެވެ.

މިހަރަކާތުގައި ޓީޝާޓް ވިއްކުމާއި، މާސްކު ވިއްކުމާއި، ފަންޑުފޮށި ބަހައްޓައިގެން ފައިސާ ހޯދުންވެސް ހިމެނެއެވެ. އަދި އެ ފައިސާ މާރސީ މެދުވެރިކޮށް އިންޓަނޭޝަނަލް އެއިޑް ކެމްޕެއިން (އައި.އޭ.ސީ) މެދުވެރިކޮށް ފަލަސްޠީނުގެ ރައްޔިތުންނަށް ފޯރުކޮށްދޭނެއެވެ.

ހުކުރު ދުވަހު ކުރިޔަށް ގެންދިޔަ ހަރަކާތަށް އާންމުންގެ ބޮޑު ތަރުހީބެއް ލިބިފައިވާއިރު، ހުކުރު ދުވަހުގެ ހަރަކާތަށް ލިބުނު ތަރުހީބާއި ގުޅިގެން ހޮނިހިރު ދުވަހުވެސް މި ހަރަކާތް ކުރިޔަށް ގެންދިޔުމަށް ނިންމީ ކަމަށް، ހަރަކާތް އިންތިޒާމް ކުރާ ފަރާތްތަކުން ވަނީ ބުނެފައެވެ.

އަދި ހޮނިހިރު ދުވަހުގެ ހަރަކާތުގައި އިތުރުކަންކަން ކުރުމަށް ވަނީ ނިންމާފައެވެ.

މަތީ ތައުލީމު ހާސިލްކުރާ ދަރިވަރުންނާއި މާސީ ގުޅިގެން ކުރިޔަށް ގެންދާ މިހަރަކާތުގައި މިހާތަނަށް އެމް.އެން.ޔޫ.އެސް.ޔޫގެ އިތުރުން އިސްލާމިކް ޔުނިވަރސިޓީ އޮފް މޯލްޑިވްސް (އައި.ޔޫ.އެމް)، ވިލާ ކޮލެޖް، ކްލިކް ކޮލެޖް، ސައިރެކްސް ކޮލެޖް، މެޕްސް ކޮލެޖް، އެމްއައި ކޮލެޖް އަދި އެވިޑް ކޮލެޖުން ވަނީ ބައިވެރިވެފައެވެ. އަދި ކުރިޔަށް އޮތްތަނުގައި އިތުރު ކޮލެޖުތަކުން ބައިވެރިވާނެ ކަމަށް ހަރަކާތް އިންތިޒާމް ކުރާ ފަރާތުން ވަނީ ބުނެފައެވެ.