އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީ ބޯޅަ މުބާރާތް ސެޕްޓެމްބަރު މަހު ފަށާއިރު ތަށި ދިފާއު ކުރުމުގެ އަޒުމުގައި ތަރަހައިގެ ފިރިހެން ވޮލީ ޓީމު ޕްރެކްޓިސް ފަށައިފިއެވެ.
އެމް.އެން.ޔޫ.އެސް.ޔޫ ވޮލީ މުބާރާތުގައި ނިމިދިޔަ ތިން އަހަރު ވެސް ތަރަހައިން ވަނީ ވާދަކޮށްފައެވެ. އަދި މި މުބާރާތުގެ ގްރޫޕް ސްޓޭޖް ފަހަނައަޅައި ތަރަހައިގެ ދެ ޓީމަށް ވެސް ސެމީ ފައިނަލާއި ހިސާބަށް 2019 ވަނަ އަހަރު ދެވިފައިވާ އިރު 2020 ވަނަ އަހަރު ތަރަހައިގެ ފިރިހެން ޓީމުން ވަނީ މުބާރާތުގެ ޗެމްޕިއަންކަން ހޯދާފައެވެ.
އެންމެ ފަހުގެ މުބާރާތުގެ ޗެމްޕިއަންކަން ތަރަހައިން ހޯދީ ކުޅުނު ހުރިހާ މެޗެއް ކާމިޔާބުކޮށްގެންނެވެ. އަދި އެ މުބާރާތުގައި ތަރަހައިން މެޗުތަކުން މޮޅުވެފައިވަނީ ސީދާ ދެ ސެޓުންނެވެ. އަދި ސެމީއާ ފައިނަލް ކާމިޔާބުކުރީ ސީދާ ތިން ސެޓުންނެވެ.
ތަރަހައިން މިއަހަރުގެ މުބާރާތަށް ނުކުންނައިރު އެޓީމުގެ ސްކޮޑް ފެނިގެންދާނީ މިދިޔަ އަހަރަށްވުރެ ވަރުގަދަ ކޮށެވެ. އެގޮތުން ފާއިތުވެދިޔަ މުބާރާތްތަކުގައި ކުޅެފައިވާ ބައެއް ކުޅުންތެރިންގެ އިތުރުން ހުނަރުވެރި އާ ކުޅުންތެރިން ވެސް ފެނިގެން ދާނެ އެވެ.
