ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ހުސްވެފައިވާ ނައިބު ރައީސް (އިތުރު ހަރަކާތް) މަޤާމަށް މާޒިން މުޙައްމަދު އިންތިޚާބުވެއްޖެ އެވެ.
ނައިބު ރައީސްގެ މަޤާމު ހުސްވީ ކުރިން މި މަޤާމުގައި ހުންނެވި ހުސެން އަލީ އިސްތިއުފާ ދެއްވުމާއި ގުޅިގެންނެވެ.
ނައިބު ރައީސްގެ މަޤާމު ހުސްވުމާއި ގުޅިގެން އޮގަސްޓު މަހުގެ 19 ން ފެށިގެން 1 ސެޕްޓެމްބަރުގެ ނިޔަލަށް މި މަޤާމަށް ކުރިމަތިލުމުގެ ފުރުސަތު ހުޅުވާލިއިރު، މި މަޤާމަށް ކުރިމަތިލާފައިވަނީ މާޒިން އެކަންޏެވެ. އެހެންކަމުން މާޒިން ވަނީ އިންތިޚާބަކާއި ނުލާ މަޤާމަށް ހޮވިފައެވެ.
މާޒިންއަށް މަޤާމު ހަވާލުކޮށްދެއްވީ ހޯމަ ދުވަހުގެ މެންދުރު އެމް.އެން.ޔޫ ކޮންފަރެންސް ރޫމްގައި މިކަމަށްޓަކައި ބޭއްވި ރަސްމިއްޔާތުގައި އެމް.އެން.ޔޫގެ ވައިސް ޗާންސެލަރ ޑރ. މުޙައްމަދު ޝަރީފެވެ.
މި ރަސްމިއްޔާތުގައި ވައިސް ޗާންސެލަރގެ އިތުރުން ޑީން އޮފް ސްޓޫޑެންޓްސް ލީލާ އަޙްމަދު ބައިވެރިވެފައިވެއެވެ. މީގެ އިތުރުން އެމް.އެން.ޔޫ.އެސް.ޔޫގެ ހިންގާ ކޮމެޓީގެ މެމްބަރުންވެސް މި ރަސްމިއްޔާތުގައި ބައިވެރިވެފައިވެއެވެ.
