މި ސެމިސްޓާގެ ދެވަނަ ލީޑާރސް ނައިޓް ކާމިޔާބު ކަމާއިއެކު ނިންމާލައިފި

2021 ވަނަ އަހަރުގެ ދެވަނަ ސެމިސްޓާގެ ދެވަނަ ލީޑާރސް ނައިޓް ކާމިޔާބުކަމާއިއެކު ނިންމާލައިފި އެވެ.

ހުކުރު ދުވަހުގެރޭ ފެކަލްޓީ އޮފް އެޑިއުކޭޝަންގެ އޮޑިޓޯރިއަމްގައި ކުރިޔަށްދިޔަ ލީޑަރސް ނައިޓްގައި ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ހިންގާ ކޮމެޓީގެ މެމްބަރުންނާއި، އެޑްވައިޒަރީ ބޯޑުގެ މެމްބަރުންގެ އިތުރުން، ކުރީގެ ލީޑަރުންވެސް ވަނީ ބައިވެރިވެފައެވެ.

ލީޑަރސް ނައިޓްގައި ވާހަކަ ދައްކަވަމުން އެމް.އެން.ޔޫ.އެސް.ޔޫގެ ރައީސް އަބްދުﷲ ޝަހުނީޒް ވަނީ އެމް.އެން.ޔޫ.އެސް.ޔޫގެ ފުރިހަމަ ތައާރަފެއް ދެއްވައިފައެވެ. އަދި ލީޑަރސް ގްރޫޕްގެ ތައާރަފެއްވެސް ޝަހުނީޒް ވަނީ ދެއްވައިފައެވެ.

މި ރަސްމިއްޔާތުގައި ވާހަކަ ދައްކަވަމުން އެމް.އެން.ޔޫ.އެސް.ޔޫގެ އެޑްވައިޒަރީ ބޯޑުގެ މެމްބަރު އަދި ހަ ވަނަ ދައުރުގެ ރައީސް އަރުޝަދު އަޝްރަފް ވަނީ ޔުނިވަރސިޓީގެ މާހައުލުގައި ދަރިވަރުންނަށް ދިމާވާ ގޮންޖެހުންތަކުން އަރައިގަންނާނެ ގޮތް ކިޔައިދީފައެވެ. އަދި ލީޑަރުންގެ މުހިންމު ކަމާއި، ކަންކަމުގައި އިސްނެގުމުގެ މުހިންމުކަން އަރުޝަދުގެ ވާހަކައިގައި ފާހަގަކޮށްފައިވެއެވެ.

މި ބައްދަލުވުމުގައި ވާހަކަ ދައްކަވަމުން އެމް.އެން.ޔޫ.އެސް.ޔޫގެ އެޑްވައިޒަރީ ބޯޑުގެ މެމްބަރު އަދި ކުރީގެ ރައީސް މުޙައްމަދު ޝާން އާމިރު ވިދާޅުވީ އެމް.އެން.ޔޫ.އެސް.ޔޫ އަކީ ދަރިވަރުންނަށް އިތުރު ކަންކަން ދަސްކޮށްދޭނެ ތަނެއްކަމުގައެވެ. އެގޮތުން އެމް.އެން.ޔޫ.އެސް.ޔޫގައި ދަރިވަރުންނަށް މީޑިއާގެ ދާއިރާއިންނާއި، ހަރަކާތްތައް އިންތިޒާމްކުރުމުގައި ހަރަކާތްތެރިވާން ދަސްކޮށްދޭނެ ކަމަށް ޝާން ވިދާޅުވިއެވެ. އަދި ލީޑަރުންގެ ގޮތުގައި މިއަދު އަލަށް ގުޅުނު ދަރިވަރުންނަށް މުސްތަގުބަލުގައި އެމް.އެން.ޔޫ.އެސް.ޔޫގެ ހިންގާ ކޮމެޓީގައި ހަރަކާތްތެރިވުމުގެ ފުރުސަތު އެބައޮތް ކަމުގައި ޝާން ވިދާޅުވިއެވެ.

ދަރިވަރުންނާއި އެކުވެރި މާހައުލެއްގައި ކުރިޔަށްދިޔަ މި ބައްދަލުވުމުގައި އައު ލީޑަރުންގެ ޝުއޫރުފާޅުކޮށްފައިވެއެވެ. އެގޮތުން އައު ލީޑަރުންގެ ތެރެއިން ވާހަކަ ދެއްކި ދަރިވަރުން ވަނީ އެމް.އެން.ޔޫ.އެސް.ޔޫގެ ހަރަކާތްތަކުން ކުރިޔަށް އޮތް ތަނުގައި ބައިވެރިވާނެ ކަމަށް ބުނެފައެވެ.

މި ބައްދަލުވުމުގައި ބައިވެރިވި ދަރިވަރުންގެ ތެރެއިން ލަކީ ޑްރޯއިން ހޮވުނު ދަރިވަރުންނަށް ވަނީ އެމް.އެން.ޔޫ.އެސް.ޔޫއިން އިނާމު ހަވާލުކޮށްފައިވެއެވެ. އަދި އިނާމު ނުލިބޭ ދަރިވަރުންނަށް ސަޕްރައިޒިންގ ގިފްޓެއްގެ ގޮތުގައި މޭރީ ބްރައުންއިން ކެޔުން ހަދިޔާކުރުމަށް ވަނީ ނިންމާފައެވެ.

އެމް.އެން.ޔޫ.އެސް.ޔޫ ލީޑަރސް ގްރޫޕަކީ އެމް.އެން.ޔޫ.އެސްޔޫގެ ޙަރަކާތްތަކުގައި އިސްވެ އުޅުމަށް ޝަޢުޤުވެރިވާ ދަރިވަރުންނަށް އަމާޒުކޮށް 2018ވަނަ އަހަރު ހަދާފައިވާ ގްރޫޕެކެވެ. މި ގްރޫޕަށް ވަނުމަށް އެމް.އެން.ޔޫގެ ކޮންމެ ދަރިވަރަކަށްވެސް ފުރުސަތު އޮވެއެވެ. އެމް.އެން.ޔޫ.އެސް.ޔޫ ލީޑަރސް ގްރޫޕްގައި މިވަގުތު 500ށް ވުރެ ގިނަ ކުދިން ހަރަކާތްތެރިވެއެވެ.