އެމް.އެން.ޔޫ.އެސް.ޔޫ ޝެޓްސް ކެރަމް މުބާރާތް 2021ގެ ސިންގަލްސް ބައިން ފިރިހެން ޗެމްޕިއަންކަން ފެކަލްޓީ އޮފް އާޓްސްގެ ދަރިވަރު އާދަމް ޝާއިއު އަދި އަންހެން ޗެމްޕިއަންކަން އެމް.އެން.ޔޫ ބިޒްނަސް ސްކޫލްގެ ދަރިވަރު ފިރުޝާނާ ނަސީރަށް ލިބިއްޖެއެވެ.
ކެރަމް މުބާރާތުގެ ނަތީޖާ ފާޅުކޮށް އެވޯޑު ދީފައިވަނީ ހޮނިހިރުދުވަހުގެރޭ ފެކަލްޓީ އޮފް އެޑިއުކޭޝަންގެ އޮޑިޓޯރިއަމްގައި ބޭއްވުނު ރަސްމިއްޔާތެއްގައެވެ. މި ރަސްމިއްޔާތަކީ ރަމަޟާން މަހަށް ޚާއްޞަކޮށްގެން އެމް.އެން.ޔޫ.އެސް.ޔޫ އާއި ބައެއް ގޮފިތަކުން ގުޅިގެން ބޭއްވި ބައެއް މުބާރާތްތަކުގެ ނިމުން ފާހަގަކުރުމަށް ބޭއްވުނު ރަސްމިއްޔާތެކެވެ.
ހަތަރު ކެޓަގަރީއަކަށް ބަހާލައިގެން ކުރިއަށް ގެންދިޔަ ކެރަމް މުބާރާތުގައި އަންހެން އަދި ފިރިހެން ޑިވިޝަންގެ ކޮންމެ ބަޔަކުންވެސް ވަނަތައް ހޮވާފައިވެއެވެ.
އަންހެން ޑިވިޝަންގެ ސިންގަލްސް ބައިން ރަނަރަޕަކަށް އެސް.އެންގެ ދަރިވަރު ފާތިމަތު އަމްނާ ހޮވިފައިވާއިރު ފިރހެން ސިންގަލްސް ޑިވިޝަންގެ ރަނަރަޕް ކަން ހާސިލުކޮށްފައިވަނީ އެމް.އެން.ޔޫ.ބީ.އެސް ގެ ދަރިވަރު އިސްމާއިލް އަރީޝް ރަޝީދެވެ. މި ދަރިވަރުންނަށް ޓްރޮފީ އާއި މެޑަލް ހަވާލުކޮށްދެއްވާފައިވަނީ އެމް.އެން.ޔޫ ޑީން އޮފް ސްޓޫޑެންޓްސް ލީލާ އަޙްމަދެވެ.
އަންހެން ޑިވިޝަންގެ ސިންގަލްސް ބައިން ތިންވަނައަށް ސްކޫލް އޮފް ނާސިން (އެސް.އެން)ގެ ދަރިވަރު މަރިޔަމް ޖައުދާ މައުމޫން ހޮވިފައިވާއިރު، ފިރިހެން ޑިވިޝަންގެ ސިންގަލްސް ބައިން ތިންވަނައަށް ހޮވިފައިވަނީ އެމް.އެން.ޔޫ ބިޒްނަސް ސްކޫލް (އެމް.އެން.ޔޫ.ބީ.އެސް)ގެ ދަރިވަރު އަލީ ނިހާދެވެ. މި ދަރިވަރުންނަށް ޓްރޮފީ އާއި މެޑަލް ހަވާލުކޮށްދެއްވާފައިވަނީ އެމް.އެން.ޔޫ.އެސް.ޔޫގެ ނައިބު ރައީސް (ގޮފިތައް) ޙުސައިން ޒައިދެވެ.
މީގެ އިތުރުން މުބާރާތުގެ ޓީމު އިވެންޓްގެ އަންހެން ޑިވިޝަންގެ ޗެމްޕިއަންކަން ސްކޫލް އޮފް ނާސިންގ އިން ހޯދާފައިވާއިރު، ފިރިހެން ޑިވިޝަންގެ ޗެމްޕިއަންކަން ހޯދާފައިވަނީ ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް އެވެ. މި ފަރާތްތަކަށް މެޑަލް އާއި ޓްރޮފީ ހަވާލުކޮށްދެއްވާފައިވަނީ ވަން ޝޮޓް އިވެންޓްސްގެ މެނޭޖިންގ ޑިރެކްޓަރ އަދި އެމް.އެން.ޔޫ.އެސް.ޔޫގެ ޝަރަފުވެރިކަމުގެ އިނާމު ޙާސިލުކޮށްފައިވާ ޝަރަފުލް އަމީރެވެ.
ޓީމް އިވެންޓުގެ އަންހެން އަދި ފިރިހެން ޑިވިޝަންގެ ރަނަރަޕްކަންވެސް ހޯދާފައިވަނީ އެމް.އެން.ޔޫ.ބީ.އެސް އިންނެވެ. މި ފަރާތަށް މެޑަލް އާއި ޓްރޮފީ ހަވާލުކޮށްދެއްވާފައިވަނީ އެމް.އެން.ޔޫ.އެސް.ޔޫގެ ރައީސް ޢަބްދުﷲ ޝަހުނީޒެވެ.
މުބާރާތުގައި ބައިވެރިވެފައިވަނީ ސްކޫލް އޮފް ނާސިންގ، އެމް.އެން.ޔޫ ބިޒްނަސް ސްކޫލް، ފެކަލްޓީ އޮފް ޝަރީއާ އެންޑް ލޯ، ފެކަލްޓީ އޮފް އިންޖިނިއަރިންގ ސައިންސް އެންޑް ޓެކްނޮލޮޖީ، ސްކޫލް އޮފް މެޑިސިން، ފެކަލްޓީ އޮފް ހޮސްޕިޓަލިޓީ އެންޑް ޓުއަރިޒަމް ސްޓަޑީސް އަދި ފެކަލްޓީ އޮފް ހެލްތު ސައިންސަސް އެވެ. ބައިވެރިވި ފެކަލްޓީތަކަށް ހަނދާނީ ލިޔުން ހަވާލުކޮށްދެއްވާފައިވަނީ ޝެޓްސްގެ ނައިބު ރައީސް (އިތުރު ޙަރަކާތް) ސުޢައިދު ޔޫނުސް އެވެ.
މިއަހަރުގެ މުބާރާތުގައި 7 ފެކަލްޓީއަކުން ޖުމްލަ 68 ދަރިވަރުން ވަނީ ބައިވެރިވެފައެވެ. މިއީ މި މުބާރާތް ބޭއްވުނު 2 ވަނަ ފަހަރެވެ. އެމް.އެން.ޔޫ.އެސް.ޔޫ ޝެޓްސް ކެރަމް މުބާރާތް ފުރަތަމަ ބާއްވާފައިވަނީ 2019 ވަނަ އަހަރެވެ. މި މުބާރާތް ކުރިއަށް ގެންދަނީ ކެރަމް އެސޯސިއޭޝަން އޮފް މޯލްޑިވްސްގެ ފުރިހަމަ އެއްބާރުލުމާއެކުއެވެ. މި މުބާރާތަކީ އެމް.އެން.ޔޫގެ ހުރިހާ ދަރިވަރުންނަށް ހުޅުވާލައިގެން ބާއްވާ މުބާރާތެކެވެ.
