ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އާއި ސޮސައިޓީ އޮފް ޝަރީޢާ އެންޑް ލޯ (އެސް.އެސް.އެލް) ގުޅިގެން ބޭއްވި އެމް.އެން.ޔޫ.އެސް.ޔޫ އެސް.އެސް.އެލް ޤުރުއާން މުބާރާތުގެ ފަޚުރުވެރި އެއްވަނަ ފެކަލްޓީ އޮފް އާޓްސްގެ ދަރިވަރު އަލް އުސްތާޛް މުޙައްމަދު ޔާމީން އިބްރާހީމް އަށް ލިބިއްޖެއެވެ.
މުޅި މުބާރާތުގެ އެއްވަނަ އަށް އިނާމާއި ހަނދާނީ ލިޔުން ޙަވާލުކޮށްދެއްވާފައިވަނީ އެމް.އެން.ޔޫގެ ޑެޕިއުޓީ ވައިސް ޗާންސެލަރ ޢާއިޝަތު ޝާހީން އިސްމާޢީލް އެވެ.
ޤުރުއާން މުބާރާތުގެ ވަނަތައް އިޢުލާންކޮށް އެވޯޑާއި ހަނދާނީ ލިޔުން ދީފައިވަނީ ހޮނިހިރުދުވަހުގެރޭ ފެކަލްޓީ އޮފް އެޑިއުކޭޝަންގެ އޮޑިޓޯރިއަމްގައި ބޭއްވުނު ރަސްމިއްޔާތެއްގައެވެ. މި ރަސްމިއްޔާތަކީ ރަމަޟާން މަހަށް ޚާއްޞަކޮށްގެން އެމް.އެން.ޔޫ.އެސް.ޔޫ އާއި ބައެއް ގޮފިތަކުން ގުޅިގެން ބޭއްވި ބައެއް މުބާރާތްތަކުގެ ނިމުން ފާހަގަކުރުމަށް ބޭއްވުނު ރަސްމިއްޔާތެކެވެ.
މާލޭ ކެމްޕަސް ދަރިވަރުންގެ ތެރެއިން މާލޭގައި ތިބި ދަރިވަރުން މަރުކަޒަށް ހާޒިރުކޮށްގެން ކިޔެވުން ކުރިއަށް ގެންގޮސް އަދި މާލޭ ކެމްޕަސް ދަރިވަރުންގެ ތެރެއިން މާލޭގައި ނެތް ދަރިވަރުންނާއި އަތޮޅުތެރޭ ކެމްޕަސްތަކުގައި ކިޔަވާ ދަރިވަރުންގެ ކިޔެވުން އޮންލައިންކޮށް ކުރިއަށް ގެންދިޔަ މި މުބާރާތުގެ ގަދަ 5 ދަރިވަރުންނަށް ހޮވިފައިވާ ދަރިވަރުންނަކީ:
ޢާއިޝަތު އިނާޔާ ބިންތު އަލީ ރައުފް – ސްކޫލް އޮފް ނާރސިންގ
މޫސާ އީމާން އަބްދުއްރަޙްމާން – ސެންޓަރ ފޯ ފައުންޑޭޝަން ސްޓަޑީޒް
ޙައްވާ ނަދާ – ފެކަލްޓީ އޮފް އެޑިއުކޭޝަން
ފާޠިމަތު ވިފާދާ – ސްކޫލް އޮފް ނާރސިންގ
މަރިޔަމް މަލަކާ މާހިރު – ސްކޫލް އޮފް ނާރސިންގ
މި ދަރިވަރުންނަށް އިނާމާއި ހަނދާނީ ލިޔުން ހަވާލުކޮށްދެއްވާފައިވަނީ އެމް.އެން.ޔޫ.އެސް.ޔޫގެ 6 ވަނަ ދައުރުގެ ރައީސް އަދި އެޑްވައިޒަރީ ބޯޑުގެ މެންބަރު އަރުޝަދު އަޝްރަފެވެ.
ނުބަލައި ކިޔެވުމުގެ ގޮފިން 3 ވަނަ އަށް ހޮވިފައިވަނީ ސްކޫލް އޮފް މެޑިސިންގެ ދަރިވަރު ތައިމާ ޙަސަން އެވެ. 2 ވަނަ އަށް ހޮވިފައިވަނީ ފެކަލްޓީ އޮފް އެޑިއުކޭޝަންގެ ދަރިވަރު ޝަހިއްޔާ އަބްދުލް ޣަނީ ކަމަށްވާއިރު ނުބަލައި ކިޔެވުމުގެ ގޮފިން 1 ވަނަ އަށް ހޮވިފައިވަނީ އެމް.އެން.ޔޫ ބިޒްނަސް ސްކޫލްގެ ދަރިވަރު އާދަމް އަތޫފް އެވެ. މި ދަރިވަރުންނަށް އިނާމާއި ހަނދާނީ ލިޔުން ހަވާލުކޮށްދެއްވީ ދަރިވަރުންގެ އަމީދު އަލްފާޟިލާ ލީލާ އަޙްމަދެވެ.
ބަލައިގެން ކިޔެވުމުގެ ގޮފިން 3 ވަނަ އަށް ހޮވިފައިވަނީ ސްކޫލް އޮފް ނާރސިންގެ ދަރިވަރު ޖަމީލާ އަފްނާން ޙުސައިން އެވެ. 2 ވަނަ އަށް ހޮވިފައިވަނީ ފެކަލްޓީ އޮފް ޝަރީޢާ އެންޑް ލޯގެ ދަރިވަރު ޢާއިޝަތު މަޢާނީ އިބްރާހީމް ކަމަށްވާއިރު ބަލައިގެން ކިޔެވުމުގެ ގޮފިން 1 ވަނަ އަށް ހޮވިފައިވަނީ ފެކަލްޓީ އޮފް އާރޓްސްގެ ދަރިވަރު އަލް އުސްތާޛް މުޙައްމަދު ޔާމީން އިބްރާހީމް އެވެ. މި ދަރިވަރުންނަށް އިނާމާއި ހަނދާނީ ލިޔުން ހަވާލުކޮށްދެއްވީ އެމް.އެން.ޔޫ.އެސް.ޔޫގެ ރައީސް ޢަބްދުﷲ ޝަހުނީޒް އެވެ.
މުބާރާތުގެ އެންމެ މޮޅު ފެކަލްޓީއަކަށް ހޮވިފައިވަނީ ސްކޫލް އޮފް ނާރސިންގ އެވެ. ދެވަނަ އަށް ހޮވުނީ ސެންޓަރ ފޯ ފައުންޑޭޝަން ސްޓަޑީޒް ކަމަށްވާއިރު ތިންވަނަ ލިބިފައިވަނީ ސްކޫލް އޮފް މެޑިސިންއަށެވެ. ފެކަލްޓީތަކަށް އިނާމާއި ހަނދާނީލިޔުން ޙަވާލުކޮށްދެއްވާފައިވަނީ އެސް.އެސް.އެލްގެ ރައީސް އަޙްމަދު އިޔާޒް އެވެ.
މި މުބާރާތަކީ އެމް.އެން.ޔޫ.އެސް.ޔޫ އިން ބޭއްވި މިފަދަ 8 ވަނަ މުބާރާތެވެ. 2013 ވަނަ އަހަރުން ފެށިގެން 2019 ވަނަ އަހަރާ ހަމައަށް މެދުކެނޑުމެއްނެތި ކޮންމެ އަހަރަކުވެސް މި މުބާރާތްވަނީ ކުރިއަށް ގެންގޮސްފައެވެ. 2020 ވަނަ އަހަރު މުބާރާތް ބޭއްވިފައި ނުވަނީ މުޅި ދުނިޔެއަށް ކުރިމަތިވި ކޮވިޑް-19ގެ ޢާލަމީ ވަބާއާއެކު ދިމާވި ގޮންޖެހުންތަކާ ގުޅިގެންނެވެ.
