ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުގެ ޔޫނިއަން (އެމް.އެން.ޔޫ.އެސް.ޔޫ) އިން ރަމަޟާން މަހު އެމް.އެން.ޔޫ.އެސް.ޔޫގެ ގޮފިތަކާއި ގުޅިގެން ބޭއްވި މުބާރާތްތަކުގެ ނިންމުމުގެ ރަސްމިއްޔާތު ބާއްވައިފިއެވެ.
ފެކަލްޓީ އޮފް އެޑިއުކޭޝަން އޮޑިޓޯރިއަމްގައި މި ކަމަށްޓަކައި ބޭއްވި ރަސްމިއްޔާތުގައި، ދިވެހިރާއްޖޭގެ ގައުމީ ޔުނިވަރސިޓީގެ ޑެޕިއުޓީ ވައިސް ޗާންސެލަރ އައިޝަތު ޝާހީން އިސްމާއިލް އާއި، ދަރިވަރުންގެ ޔޫނިއަންގެ ހިންގާ ކޮމެޓީ މެމްބަރުންނާއި، މުބާރާތްތަކުގައި އިންސާފުކުރި ޖަޖުންގެ އިތުރުން ދަރިވަރުން ވަނީ ބައިވެރިވެފައެވެ.
މި ރަސްމިއްޔާތުގައި ވާހަކަ ދައްކަވަމުން އެމް.އެން.ޔޫގެ ޑެޕިއުޓީ ވައިސް ޗާންސެލަރ، އައިޝަތު ޝާހީން އިސްމާއީލް ވަނީ އެވޯޑްތައް ހާސިލްކުރި ދަރިވަރުންނަށް ތަހުނިޔާ ދަންނަވާފައެވެ. ޝާހީން ވިދާޅުވީ، ކޮވިޑްގެ ދަތި ހާލުގައިވެސް މިފަދަ މުބާރާތްތައް ބޭއްވުނީ އެމް.އެން.ޔޫ.އެސް.ޔޫގެ ހީވާގި ލީޑަރޝިޕުން ކުރި މަސައްކަތުން ކަމަށާއި، އެހެންކަމުން ޔޫނިއަންއަށް ޝުކުރުއަދާ ކުރާ ކަމަށެވެ.
މި ރަސްމިއްޔާތުގައި ވާހަކަ ދައްކަވަމުން އެމް.އެން.ޔޫ.އެސް.ޔޫގެ ރައީސް އަބްދުﷲ ޝަހުނީޒް ވިދާޅުވީ ކޮވިޑްގެ ހާލަތުގައި މިފަދަ މުބާރާތްތަކެއް ބޭއްވުމަށް ހުއްދަ ދެއްވީތީ އެމް.އެން.ޔޫގެ މެނޭޖްމަންޓަށް ޝުކުރު ދަންނަވާފައެވެ. މީގެ އިތުރުން ޝަހުނީޒް ވިދާޅުވީ މިފަދަ މުބާރާތްތަކެއް ބޭއްވިގެން ދަނީ އެމް.އެން.ޔޫ މެނޭޖްމަންޓުން ވެދެއްވާ އެހީގެ ސަބަބުން ކަމަށެވެ. ހާއްސަކޮށް ވައިސް ޗާންސެލަރ ޑރ. މުޙައްމަދު ޝަރީފް އެމް.އެން.ޔޫ،އެސް.ޔޫގެ ކަންކަމުގައި ވެދެއްވާ އެހީއަށް ޝުކުރު އަދާކުރާ ކަމަށެވެ.
ރަމަޟާން މަހު އެމް.އެން.ޔޫ.އެސް.ޔޫއިން ގޮފިތަކާއި ގުޅިގެން ހަތަރު މުބާރާތެއް ކުރިޔަށް ގެންގޮސްފައިވެއެވެ. އެއީ އެމް.އެން.ޔޫ.އެސް.ޔޫ ސިއާ މަދަހަ މުބާރާތް 1442، އެމް.އެން.ޔޫ.އެސް.ޔޫ ސެޓްސް ކެރަމް ޓޯނަމެންޓް، އެމް.އެން.ޔޫ.އެސް.ޔޫ އެސް.އެސް.އެލް ޤުރުޢާން މުބާރާތް 1442 އަދި ސެޓްސް ސުފުރާ މަތިންނެވެ.
