ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އާއި ސްޓޫޑެންޓްސް އިނީޝިއޭޓިވް އޮފް އާރޓްސް (ސިއާ) ގުޅިގެން ބޭއްވި އެމް.އެން.ޔޫ.އެސް.ޔޫ ސިއާ މަދަޙަ މުބާރާތުގެ ފަޚުރުވެރި އެއްވަނަ ސްކޫލް އޮފް ނާރސިންގެ ދަރިވަރު ޢާއިޝަތު ނަދާއަށް ލިބިއްޖެއެވެ.
މަދަޙަ މުބާރާތުގެ ވަނަތައް އިޢުލާންކޮށް އެވޯޑާއި ހަނދާނީ ލިޔުން ދީފައިވަނީ ހޮނިހިރުދުވަހުގެރޭ ފެކަލްޓީ އޮފް އެޑިއުކޭޝަންގެ އޮޑިޓޯރިއަމްގައި ބޭއްވުނު ރަސްމިއްޔާތެއްގައެވެ. މި ރަސްމިއްޔާތަކީ ރަމަޟާން މަހަށް ޚާއްޞަކޮށްގެން އެމް.އެން.ޔޫ.އެސް.ޔޫ އާއި ބައެއް ގޮފިތަކުން ގުޅިގެން ބޭއްވި ބައެއް މުބާރާތްތަކުގެ ނިމުން ފާހަގަކުރުމަށް ބޭއްވުނު ރަސްމިއްޔާތެކެވެ.
މަދަޙަ މުބާރާތުގެ އެންމެ މޮޅު 5 ދަރިވަރުންނަށް ހޮވިފައިވަނީ؛
މަރިޔަމް ޙުވައިނާ ހަސަން – ފެކަލްޓީ އޮފް އިންޖިނިއަރިންގ، ސައިންސް އެންޑް ޓެކްނޮލޮޖީ
މާރިޔަތު އުނޫޝާ – ސްކޫލް އޮފް ނާރސިންގ
ޢާއިޝަތު އަޝްގާ – އެމް.އެން.ޔޫ ބިޒްނަސް ސްކޫލް
ޢާއިޝަތު ނަބާހަތު ވަހީދު – އެމް.އެން.ޔޫ ބިޒްނަސް ސްކޫލް
ފާޠިމަތު މާސާ ސަޢީދު – ސެންޓަރ ފޯ ފައުންޑޭޝަން ސްޓަޑީޒް
މި ދަރިވަރުންނަށް ޓްރޮފީ ހަވާލުކޮށްދެއްވާފައިވަނީ އެމް.އެން.ޔޫ ޑީން އޮފް ސްޓޫޑެންޓްސް ލީލާ އަހްމަދެވެ.
މަދަޙަ މުބާރާތުގެ އެއްވަނަ ފެކަލްޓީއަކަށް ހޮވިފައިވަނީ ސްކޫލް އޮފް ނާރސިންގ އެވެ. ދެވަނަ ފެކަލްޓީއަކީ ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް ކަމަށްވާއިރު ތިންވަނަ ލިބިފައިވަނީ ސެންޓަރ ފޯ ފައުންޑޭޝަން ސްޓަޑީޒް އަށެވެ. މި ފެކަލްޓީތަކަށް ޓްރޮފީ ހަވާލުކޮށްދެއްވާފައިވަނީ އެމް.އެން.ޔޫ.އެސް.ޔޫގެ ރައީސް ޢަބްދުﷲ ޝަހުނީޒް އެވެ.
މި ރަސްމިއްޔާތުގައިވަނީ މުބާރާތަށް އެކިގޮތްގޮތުން އެހީތެރިވެދެއްވާފައިވާ ފަރާތްތަކުގެ އަގު ވަޒަންކޮށް ހަނދާނީ ލިޔުން ދީފައެވެ. މިގޮތުން މުބާރާތުގެ މަދަޙަތައް ބްރޯޑްކާސްޓް ކޮށްދެއްވާފައިވާތީ ދިވެހި ޗެނަލްއަށް ހަނދާނީ ލިޔުން ދީފައިވާއިރު، މުބާރާތުގެ ފަނޑިޔާރުކަން ކޮށްދެއްވި ޝަލަބީ އިބްރާހީމް، ޢާއިޝަތު ޙުސައިން މަނިކު އަދި ސައިނާ ރަޝީދުގެ އަގު ވަޒަންކޮށް ހަނދާނީ ލިޔުން އަރުވާފައިވެއެވެ.
މުޅި މުބާރާތުގެ 3 ވަނަ އަށް ހޮވިފައިވަނީ ފެކަލްޓީ އޮފް ޝަރީޢާ އެންޑް ލޯގެ ދަރިވަރު މަރިޔަމް އީނާސްކަމަށްވާއިރު 2 ވަނަ އަށް ހޮވިފައިވަނީ ސްކޫލް އޮފް ނާރސިންގެ ދަރިވަރު ފާޠިމަތު ވިފާދާ ވިޝާމް އެވެ. މުބާރާތުގެ އެއްވަނަ، ދެވަނަ އަދި ތިންވަނަ އަށް ޓްރޮފީ ހަވާލުކޮށްދެއްވާފައިވަނީ އެމް.އެން.ޔޫ ޑެޕިއުޓީ ވައިސް ޗާންސެލަރ ޢާއިޝަތު ޝާހީން އެވެ.
މުބާރާތުގެ އެއްވަނަ ލިބުނު ޢާއިޝަތު ނަދާއަށް ޝަލަބީގެ ހިދާއީ ނޫރު އަލްބަމަށް މަދަހައެއް ކިޔުމުގެ ފުރުޞަތު ޝަލަބީގެ ފަރާތުންވަނީ ދީފައެވެ.
މި މުބާރާތަކީ އެމް.އެން.ޔޫ.އެސް.ޔޫ އިން ބޭއްވި 3 ވަނަ މަދަޙަ މުބާރާތެވެ. 2 ވަނަ މުބާރާތް ބޭއްވީ 2019 ގައި ކަމަށްވާއިރު، ފުރަތަމަ މުބާރާތް ބޭއްވީ 2013ގައެވެ.
