ކޮވިޑް-19 ގެ ހާލަތުގައިވެސް ގޮފިތަކުން ކުރި މަސައްކަތްތަކަކީ ތައުރީފު ހައްގު މަސައްކަތްތަކެއް ކަމަށް ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) ގެ މީޑިއާ ކޯޑިނޭޓަރު ޝުއައިބް މުޙައްމަދު އިގުބާލް ވިދާޅުވެއްޖެ އެވެ.
ރަމަޟާން މަހު އެމް.އެން.ޔޫ.އެސް.ޔޫ އާއި ގުޅިގެން ގޮފިތަކުން ބޭއްވި މުބާރާތްތަކުގެ ނިންމުމުގެ ރަސްމިއްޔާތުގައި ވާހަކަ ދައްކަވަމުން ޝުއައިބް ވިދާޅުވީ، ކޮވިޑްގެ ހާލަތުގައި ވެސް ޔޫނިއަންގެ މަސައްކަތް މެދު ކެނޑުމެއް ނެތި ކުރިޔަށް ގެންދެވުނު ކަމަށެވެ. އަދި ޔޫނިއަންގެ މަސައްކަތްތަކުގެ އިތުރުން ގޮފިތަކުން ކުރި މަސައްކަތްތަކަކީ ފާހަގަކޮށްލެވޭ މަސައްކަތްތަކެއް ކަމަށް ޝުއައިބް ވިދާޅުވިއެވެ.
ޝުއައިބް ވިދާޅުވީ ރަމަޟާން މަހު ބޭއްވި ހަރަކާތްތަކުގައި ގޮފިތަކުގެ ލީޑަރޝިޕްގެ ފުރިހަމަކަން ފެނިގެންދިޔަ ކަމަށާއި، އެގޮތުން ދިމާވި ގޮންޖެހުންތަކުން އަރައިގަތުމަށް ގޮފިތަކުން ކުރި މަސައްކަތަކީ ފާހަގަކުރާ މަސައްކަތްތަކެއް ކަމަށެވެ.
އެމް.އެން.ޔޫ.އެސް.ޔޫ އިން އަބަދުވެސް ގޮފިތަކަށް ދިމާވާ ގޮންޖެހުންތަކުން އަރައިގަތުމަށް މަސައްކަތް ކޮށްދޭނެ ކަމަށާއި، އެމް.އެން.ޔޫ.އެސް.ޔޫއިން އެދެނީ ލާމަރުކަޒުކޮށް ކަންކަން ހިންގުން ކަމަށް ޝުއައިބް ވިދާޅުވިއެވެ.
ރަމަޟާން މަހު ބޭއްވި ހަރަކާތްތަކުގައި އެމް.އެން.ޔޫގެ މެނޭޖުމަންޓުން ދެއްވި ފުރިހަމަ އެއްބާރުލުމަށް ޝުއައިބް ވަނީ ޝުކުރު ދަންނަވާފައެވެ. އެގޮތުން ޝުއައިބް ވިދާޅުވީ މެނޭޖުމަންޓްގެ އެހީއާއި ނުލާ ކަންކަން ކުރުމަކީ އެމް.އެން.ޔޫ.އެސް.ޔޫއަށް އުނދަގޫ ކަމެއް ކަމަށާއި، ރަމަޟާން މަހު ބޭއްވުނު މުބާރާތްތައް ކާމިޔާބުކަމާއިއެކު ނިންމާލެވުނީ މެނޭޖުމަންޓްގެ ފުރިހަމަ އެއްބާރުލުމާއިއެކުގައި ކަމަށެވެ.
ރަމަޟާން މަހު އެމް.އެން.ޔޫ.އެސް.ޔޫއިން ގޮފިތަކާއި ގުޅިގެން ހަތަރު މުބާރާތެއް ކުރިޔަށް ގެންގޮސްފައިވެއެވެ. އެއީ އެމް.އެން.ޔޫ.އެސް.ޔޫ ސިއާ މަދަހަ މުބާރާތް 1442، އެމް.އެން.ޔޫ.އެސް.ޔޫ ސެޓްސް ކެރަމް ޓޯނަމެންޓް، އެމް.އެން.ޔޫ.އެސް.ޔޫ އެސް.އެސް.އެލް ޤުރުއާން މުބާރާތް 1442 އަދި ޝެޓްސް ސުފުރާ މަތިންނެވެ.
