ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން ބާއްވާ ދެވަނައަށް އެންމެ ބޮޑު މުބާރާތް ކަމަށްވާ އެމް.އެން.ޔޫ.އެސް.ޔޫ ވޮލީ މުބާރާތުގެ އޯގަނައިޒިންގ ޓީމާއި ވޮލީ މުބާރާތުގެ ހިންގާ ކޮމެޓީން ބައްދަލުކޮށްފިއެވެ.
17 ސެޕްޓެމްބަރު 2021 ވަނަ ދުވަހުގެރޭ އެފް.އީ އޮޑިޓޯރިއަމްގައި އޮތް މި ބައްދަލުވުމުގައި މުބާރާތުގެ ހިންގާ ކޮމެޓީ މެމްބަރުން ވަނީ ބައިވެރިވެފައެވެ. އަދި މުބާރާތުގެ އޯގަނައިޒިންގ ޓީމުގެ މެމްބަރުންނާއި، ޑިސިޕްލިނަރީ ކޮމެޓީގެ މެމްބަރުންވެސް ވަނީ ބައިވެރިވެފައެވެ.
މިއީ ކުރިޔަށް އޮތް ވޮލީ މުބާރާތުގައި އޯގަނައިޒިންގ ޓީމުން ކުރަންޖެހޭ މަސައްކަތާއި، އޯގަނައިޒިންގ ޓީމުގެ މެމްބަރުން ގްރޫޕްތަކަށް ބަހާލުމުގެ ގޮތުން ބޭއްވުނު ބައްދަލުވުމެކެވެ. އެގޮތުން މީޑިއާ ޓީމަށާއި، ފިޒިކަލް ޓީމަށާއި، ލައިންސްމަންސް ޓީމަށް ކުދިން ވަނީ ބަހާފައެވެ.
އަދި ޓްރެއިނިންގ ސެޝަންތަކެއް ކުރިޔަށް ގެންދިޔުމުގެ އިތުރުން ޕްރެކްޓިސް މެޗުތަކުގައި ތަޖުރިބާ ހޯދުމުގެ ގޮތުން ކުދިން ބޭނުން ކުރަމުން ގެންދިޔުމަށް ވަނީ ނިންމާފައެވެ.
މިއަހަރުގެ ވޮލީ މުބާރާތުގައި ފިރިހެން 7 ފެކަލްޓީއަކުން ބައިވެރިވެފައިވާއިރު، އަންހެން ޑިވިޝަނުގައި 7 ފެކަލްޓީއަކާއި ލ. ގަމު ކެމްޕަހުން ވަނީ ބައިވެރިވެފައެވެ.
މުބާރާތް ކުރިޔަށްދާނީ ސެޕްޓެމްބަރު މަހުގެ 24 ވަނަ ދުވަހުން ފެށިގެން 30 ސެޕްޓެމްބަރުގެ ނިޔަލަށެވެ.
