ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން ކުރިޔަށް ގެންދާ ދެވަނައަށް އެންމެ ބޮޑު މުބާރާތް ކަމުގައިވާ އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތް 2021 ގެ ގުރުއަތުލުން ކުރިޔަށް ގެންގޮސްފިއެވެ.
ދެ ޑިވިޝަނަކަށް ބަހާލައިގެން ކުރިޔަށް ގެންދާ މި މުބާރާތުގެ އަންހެން ޑިވިޝަނުގައި 7 ފެކަލްޓީއަކުން ބައިވެރިވެފައިވާއިރު، ފުރަތަމަ ފަހަރަށް އަތޮޅު ކެމްޕަހަކުން ވަނީ ބައިވެރިވެފައެވެ. އެއީ ލ. ގަން ކެމްޕަހެވެ. އަދި މި މުބާރާތުގެ ފިރިހެން ޑިވިޝަނުގައި 7 ފެކަލްޓީއަކުން ވަނީ ބައިވެރިވެފައެވެ.
މުބާރާތުގެ ގުރުލުން އެފް.އީ އޮޑިޓޯރިއަމްގައި ކުރިޔަށް ގެންދިޔައިރު ދެ ޑިވިޝަނުގެ ޓީމުތައް ވަނީ ދެ ގްރޫޕަކަށް ބަހާލައިފައެވެ. ގުރުލުމުގެ ރަސްމިއްޔާތުގައި ޓީމުތަކުގެ މެނޭޖަރުންނާއި، ކެޕްޓަނުންގެ އިތުރުން މުބާރާތުގެ ހިންގާ ކޮމެޓީގެ މެމްބަރުން ވަނީ ބައިވެރިވެފައެވެ.
އެގޮތުން އަންހެން ޑިވިޝަނުގެ ގްރޫޕް ”އޭ“ ގައި ހިމެނިފައިވާ ޓީމުތަކަކީ އެމް.އެން.ޔޫ ބިޒްނަސް ސްކޫލް، ފެކަލްޓީ އޮފް ސަރިއްޔާ އެންޑް ލޯ، ފެކަލްޓީ އޮފް އެޑިއުކޭޝަން އަދި ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒްސް އެވެ.
ގްރޫޕް ”ބީ“ ގައި ހިމެނޭ ޓީމުތަކަކީ ގަން ކެމްޕަސް، ސްކޫލް އޮފް ނާސިންގ، ފެކަލްޓީ އޮފް ހެލްތު ސައިންސް އަދި ސެންޓަރ ފޯރ ފައުންޑޭޝަން ސްޓަޑީޒްސް އެވެ.
ފިރިހެން ޑިވިޝަނުގެ ގްރޫޕް ”އޭ“ ގައި ހިމެނޭ ޓީމުތަކަކީ ސެންޓަރ ފޯރ ފައުންޑޭޝަން ސްޓަޑީޒްސް، ފެކަލްޓީ އޮފް ހެލްތު ސައިންސް، ފެކަލްޓީ އޮފް އިންޖިނިއަރިންގ ސައިންސް އެންޑް ޓެކްނޮލަޖީ އަދި އެމް.އެން.ޔޫ. ބިޒްނަސް ސްކޫލެވެ.
ފިރިހެން ޑިވިޝަނުގެ ގްރޫޕް ”ބީ“ ގައި ހިމެނޭ ޓީމުތަކަކީ ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒްސް، ފެކަލްޓީ އޮފް ސަރިއްޔާ އެންޑް ލޯ އަދި ސްކޫލް އޮފް ނާސިންގ އެވެ.
މިއީ އެމް.އެން.ޔޫ.އެސް.ޔޫ އިން ސިލްސިލާކޮށް މި މުބާރާތް ކުރިޔަށް ގެންދާ 7 ވަނަ ފަހަރެވެ. މި މުބާރާތުގެ ފިރިހެން ޑިވިޝަނުގެ އެންމެ ފަހުގެ ޗެމްޕިއަނުންނަކީ ސެންޓަރ ފޯރ ފައުންޑޭޝަން ސްޓަޑީޒްއެވެ. އަދި މި މުބާރާތުގެ އަންހެން ޑިވިޝަނުގެ އެންމެ ފަހުގެ ޗެމްޕިއަނުންނަކީ ސްކޫލް އޮފް ނާސިންގ އެވެ.
