ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން ބާއްވާ ދެވަނައަށް އެންމެ ބޮޑު މުބާރާތް ކަމަށްވާ އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތުގެ އަންހެން ޑިވިޝަނުގައި ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީސް (އެފް.އެޗް.ޓީ.އެސް) އަދި ސްކޫލް އޮފް ނާސިންގ (އެސް.އެން) ކުޅުނު މެޗުތަކުކުން މޮޅުވެއްޖެއެވެ.
ހުކުރު ދުވަހުގެރޭ ގްރޫޕް ”އޭ“ ގައި އެފް.އެޗް.ޓީ.އެސް އަދި ފެކަލްޓީ އޮފް ޝަރީއާ އެންޑް ލޯ (އެފް.އެސް.އެލް) ބައްދަލުކުރި މެޗު އެފް.އެޗް.ޓީ.އެސް އިން ކާމިޔާބުކުރީ ސީދާ ދެ ސެޓުންނެވެ. މި މެޗުގެ ސެޓުތައް އެފް.އެޗް.ޓީ.އެސް އިން ގެންދިޔައީ 25-20 އަދި 25-18 އިންނެވެ.
މި މެޗުގެ މޮޅު ކުޅުންތެރިޔަކަށް ހޮވުނީ އެފް.އެޗް.ޓީ.އެސް ގެ ޖާޒީ ނަމްބަރު 7 ނަރީމާ އިދުރީސް އެވެ.
މީގެ އިތުރުން ހުކުރު ދުވަހުގެރޭ ކުޅުނު ފަހު މެޗުގައި އެސް.އެން އަދި ގަން ކެމްޕަސް ބައްދަލުކުރިއިރު، އެސް.އެން އިން ގަން ކެމްޕަސްގެ މައްޗަށް ކުރި ހޯދީ ސީދާ ދެ ސެޓުންނެވެ. މި މެޗުގެ ސެޓުތައް އެސް.އެން އިން ގެންދިޔައީ 25-10 އަދި 25-7 އިންނެވެ.
މި މެޗުގެ މޮޅު ކުޅުންތެރިޔަކަށް ހޮވުނީ އެސް.އެންގެ ޖާޒީ ނަމްބަރު 2 މަރިޔަމް ނިސާ އެވެ.
މި މުބާރާތުގެ މެޗުތައް ހޮނިހިރު ދުވަހުވެސް ކުޅުމަށް ވަނީ ހަމަޖެހިފައެވެ. އެގޮތުން ހޮނިހިރު ދުވަހުގެ މެންދުނު 02:00 ގައި ބައްދަލުކުރާނީ ގްރޫޕް ”ބީ“ ގެ ގަން ކެމްޕަސް އަދި ސެންޓަރ ފޯރ ފައުންޑޭޝަން ސްޓަޑީޒް އެވެ. އަދި ދެވަނަ މެޗުގައި ހޮނިހިރު ދުވަހުގެ 15:30 ގައި ބައްދަލުކުރާނީ ގްރޫޕް ”ބީ“ ގެ ފެކަލްޓީ އޮފް ހެލްތު ސައިންސް (އެފް.އެޗް.އެސް) އަދި އެސް.އެން އެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަކީ ދަރިވަރުންގެ ޔޫނިއަންގެ ދެވަނަ އަށް އެންމެ ބޮޑު ހަރަކާތެވެ. މި މުބާރާތް ބޭއްވުމުގެ މައިގަނޑު މަގުސަދަކީ ދަރިވަރުންގެ މެދުގައި އެކުވެރިކަން އާލާކޮށް ވޮލީބޯޅައިގެ ގަވާއިދުތަކަށް އަހުލުވެރިކޮށް ވޮލީބޯޅަ ކުޅުމުގެ ފޯރި އިތުރުކުރުމެވެ. 2015 ވަނަ އަހަރުން ފެށިގެން މެދުކެނޑުމެއްނެތި ކުރިއަށްދާ މި މުބާރާތަކީ އެމް.އެން.ޔޫގެ ފެކަލްޓީ/ސެންޓަރ/ކެމްޕަސްތަކުގައި ގާއިމު ކުރެވިފައިވާ ދަރިވަރުންގެ ޔޫނިއަންގެ ގޮފިތަކަށް ހުޅުވާލައިގެން ބާއްވާ މުބާރާތެކެވެ. މި އަހަރުގެ މުބާރާތަކީ މީގެ 7 ވަނަ މުބާރާތް ކަމަށްވާއިރު، މިއަހަރު ޖުމްލަ 15 ޓީމަކުން މުބާރާތުގައި ބައިވެރިވެފައިވެއެވެ. އެއީ ފިރިހެން ޑިވިޝަނުގައި 7 ޓީމު އަދި އަންހެން ޑިވިޝަނުގައި 8 ޓީމެވެ. މިފަހަރުގެ މުބާރާތަކީ މިހާތަނަށް ދަރިވަރުންގެ ޔޫނިއަންގެ މުބާރާތެއްގައި ފުރަތަމަ ފަހަރަށް އެމް.އެން.ޔޫގެ އަތޮޅުތެރޭ ކެމްޕަހަކުން ޓީމެއް ބައިވެރިވާ ތާރީހީ މުބާރާތެވެ. އެގޮތުން ގަން ކެމްޕަހުގެ އަންހެން ޓީމުން މިއަހަރުގެ މުބާރާތުގައި ވަނީ ބައިވެރިވެފައެވެ.
