އަހުރަ ގޮފީގެ ފަރާތުން އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީ ބޯޅަ މުބާރާތުގައި ބައިވެރިކުރި ގަން ކެމްޕަހުގެ ޓީމަށް އެމް.އެން.ޔޫ.އެސް.ޔޫގެ ފަރާތުން ހަނދާނީ ފިލައެއް އަރުވައިފިއެވެ.
މިގޮތުން އަހުރަ ގޮފިން ގެނައި ޓީމުގެ އަގުވަޒަންކޮށް މި ހަނދާނީ ފިލާ އަރުވާފައިވަނީ އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީ ބޯޅަ މުބާރާތުގައި އަހުރަ ޓީމުން ކުޅުނު ފަހު މެޗު ނިންމާލުމަށްފަހު އެމް.އެން.ޔޫ ޕީއީ ހޯލުގައެވެ. މި ހަނދާނީ ފިލާ އަހުރަ ޓީމަށް އަރުވާދެއްވާފައި ވަނީ ދިވެހިރާއްޖޭގެ ޤައުމީ ޔުނިވަރސިޓީގެ ވައިސް ޗާންސެލަރ ޑރ. މުޙައްމަދު ޝަރީފެވެ.
މިއަހަރުގެ އިންޓަރފެކަލްޓީ ވޮލީބޯޅަ މުބާރާތަކީ ވަރަށް ޚާއްޞަ މުބާރާތެކެވެ. މިއަހަރުގެ މުބާރާތަކީ އަތޮޅުތެރޭ ކެމްޕަހަކުން ޓީމެއް މާލެ އައިސް، މި މުބާރާތުގައި ވާދަކުރި ފުރަތަމަ ފަހަރު. މިގޮތުން މިއީ މި މުބާރާތުގެ ތާރީޚުގައި ފާހަގަކޮށްލެވޭ ވަރަށް ޚާއްޞަކަމެކެވެ. ގިނަ ގޮންޖެހުންތަކަކާއި އެކުވެސް މުބާރާތުގައި ވާދަކުރުމަށް މާލެ އައިސް މުބާރާތުގައި ބައިވެރިވެދެއްވީތީ، އެމް.އެން.ޔޫގެ މެނޭޖްމަންޓާއި މުވައްޒަފުންނާއި އެމް.އެން.ޔޫ ދަރިވަރުންގެ ޔޫނިއަންގެ ހިންގާ ކޮމިޓީ އާއި މާލޭ ކެމްޕަހުގެ ގޮފިތަކާއި ދަރިވަރުންގެ ޔޫނިއަންގެ އެންމެހާ މެންބަރުންގެ ނަމުގައި އަހުރަ ޓީމަށް ޝުކުރު އަދާކުރަމެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަކީ ދަރިވަރުންގެ ޔޫނިއަންގެ ދެވަނަ އަށް އެންމެ ބޮޑު ހަރަކާތެވެ. މި މުބާރާތް ބޭއްވުމުގެ މައިގަނޑު މަގުސަދަކީ ދަރިވަރުންގެ މެދުގައި އެކުވެރިކަން އާލާކޮށް ވޮލީބޯޅައިގެ ގަވާއިދުތަކަށް އަހުލުވެރިކޮށް ވޮލީބޯޅަ ކުޅުމުގެ ފޯރި އިތުރުކުރުމެވެ. 2015 ވަނަ އަހަރުން ފެށިގެން މެދުކެނޑުމެއްނެތި ކުރިއަށްދާ މި މުބާރާތަކީ އެމް.އެން.ޔޫގެ ފެކަލްޓީ/ސެންޓަރ/ކެމްޕަސްތަކުގައި ގާއިމު ކުރެވިފައިވާ ދަރިވަރުންގެ ޔޫނިއަންގެ ގޮފިތަކަށް ހުޅުވާލައިގެން ބާއްވާ މުބާރާތެކެވެ. މި އަހަރުގެ މުބާރާތަކީ މީގެ 7 ވަނަ މުބާރާތް ކަމަށްވާއިރު، މިއަހަރު ޖުމްލަ 15 ޓީމަކުން މުބާރާތުގައި ބައިވެރިވެފައިވެއެވެ. އެއީ ފިރިހެން ޑިވިޝަނުގައި 7 ޓީމު އަދި އަންހެން ޑިވިޝަނުގައި 8 ޓީމެވެ. މިފަހަރުގެ މުބާރާތަކީ މިހާތަނަށް ދަރިވަރުންގެ ޔޫނިއަންގެ މުބާރާތެއްގައި ފުރަތަމަ ފަހަރަށް އެމް.އެން.ޔޫގެ އަތޮޅުތެރޭ ކެމްޕަހަކުން ޓީމެއް ބައިވެރިވާ ތާރީޚީ މުބާރާތެވެ. އެގޮތުން ގަން ކެމްޕަހުގެ އަންހެން ޓީމުން މިއަހަރުގެ މުބާރާތުގައި ވަނީ ބައިވެރިވެފައެވެ.
