މިހާރު ކުރިއަށްދާ އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތުގައި ފިރިހެން ޑިވިޝަނުގެ މިދިޔަ އަހަރުގެ ޗެމްޕިއަން ސެންޓަރ ފޯ ފައުންޑޭޝަން ސްޓަޑީޒް ފައިނަލަށް ދަތުރުކޮށްފިއެވެ.
ބުދަދުވަހުގެރޭ ކުޅުނު ފިރިހެން ޑިވިޝަނުގެ ފުރަތަމަ ސެމީ ފައިނަލުގައި ސްކޫލް އޮފް ނާރސިންގ އާއި ބައްދަލުކޮށް ސީ.އެފް.އެސް އިން މޮޅުވީ ސީދާ 3 ސެޓުންނެވެ. މި މެޗުގެ ފުރަތަމަ 2 ސެޓުގައި އެސް.އެން އިން ވެސް ވަނީ މޮޅު ކުޅުމެއް ދައްކާފައެވެ. ފުރަތަމަ ސެޓު ސީ.އެފް.އެސް އިން 25-19ގެ ނަތީޖާއަކުން ގެންގޮސްފައިވާއިރު، މެޗުގެ ދެވަނަ ސެޓުގެ ބޮޑުބައިގައި ލީޑުގައި އޮތީ އެސް.އެން އެވެ. ނަމަވެސް މޮޅު ކުޅުމެއް ދައްކާ ފަހަތުން އަރާ ސީ.އެފް.އެސް އިން ވަނީ މި ސެޓުވެސް 25-19ން ގެންގޮސްފައެވެ. ތިންވަނަ ސެޓު ސީ.އެފް.އެސް އިން ގެންދިޔައީ ފަސޭހަކަމާއެކު 25-14ގެ ނަތީޖާއަކުންނެވެ.
މި ނަތީޖާއާއެކު ސީ.އެފް.އެސް ފައިނަލަށް ދަތުރުކޮށްފައިވާއިރު ފައިނަލުގައި ސީ.އެފް.އެސް ވާދަކުރަން ޖެހޭނީ ހަމަ ބުދަދުވަހުގެރޭ ކުޅެން ހަމަޖެހިފައިވާ ސެމީ ފައިނަލުގެ ދެވަނަ މެޗުން މޮޅުވާ ޓީމަކާއެކެވެ. މި މެޗުގައި ބައްދަލުކުރަނީ ގްރޫޕް ބީގެ އެއްވަނަ ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (އެފް.އެޗް.ޓީ.އެސް) އަދި ގްރޫޕް އޭގެ ދެވަނަ އެމް.އެން.ޔޫ ބިޒްނަސް ސްކޫލެވެ.
މުބާރާތުގެ ފައިނަލް މެޗުތައް ކުޅުމަށް ހަމަޖެހިފައިވަނީ ބުރާސްފަތި ދުވަހެވެ. އެދުވަހުގެ ހަވީރު 04.00ގައި އަންހެން ޑިވިޝަނުގެ ފައިނަލް މެޗު ކުޅެން ހަމަޖެހިފައިވާއިރު މި މެޗުގައި ބައްދަލުކުރާނީ މިދިޔަ އަހަރުގެ ޗެމްޕިއަން ސްކޫލް އޮފް ނާރސިންގ އާއި އެމް.އެން.ޔޫ ބިޒްނަސް ސްކޫލެވެ. ފިރިހެން ޑިވިޝަނުގެ ފައިނަލް މެޗު އޮންނާނީ އެރޭ 08.00ގައެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަކީ ދަރިވަރުންގެ ޔޫނިއަންގެ ދެވަނަ އަށް އެންމެ ބޮޑު ހަރަކާތެވެ. މި މުބާރާތް ބޭއްވުމުގެ މައިގަނޑު މަގުސަދަކީ ދަރިވަރުންގެ މެދުގައި އެކުވެރިކަން އާލާކޮށް ވޮލީބޯޅައިގެ ގަވާއިދުތަކަށް އަހުލުވެރިކޮށް ވޮލީބޯޅަ ކުޅުމުގެ ފޯރި އިތުރުކުރުމެވެ. 2015 ވަނަ އަހަރުން ފެށިގެން މެދުކެނޑުމެއްނެތި ކުރިއަށްދާ މި މުބާރާތަކީ އެމް.އެން.ޔޫގެ ފެކަލްޓީ/ސެންޓަރ/ކެމްޕަސްތަކުގައި ގާއިމު ކުރެވިފައިވާ ދަރިވަރުންގެ ޔޫނިއަންގެ ގޮފިތަކަށް ހުޅުވާލައިގެން ބާއްވާ މުބާރާތެކެވެ. މި އަހަރުގެ މުބާރާތަކީ މީގެ 7 ވަނަ މުބާރާތް ކަމަށްވާއިރު، މިއަހަރު ޖުމްލަ 15 ޓީމަކުން މުބާރާތުގައި ބައިވެރިވެފައިވެއެވެ. އެއީ ފިރިހެން ޑިވިޝަނުގައި 7 ޓީމު އަދި އަންހެން ޑިވިޝަނުގައި 8 ޓީމެވެ. މިފަހަރުގެ މުބާރާތަކީ މިހާތަނަށް ދަރިވަރުންގެ ޔޫނިއަންގެ މުބާރާތެއްގައި ފުރަތަމަ ފަހަރަށް އެމް.އެން.ޔޫގެ އަތޮޅުތެރޭ ކެމްޕަހަކުން ޓީމެއް ބައިވެރިވާ ތާރީޚީ މުބާރާތެވެ. އެގޮތުން ގަން ކެމްޕަހުގެ އަންހެން ޓީމުން މިއަހަރުގެ މުބާރާތުގައި ވަނީ ބައިވެރިވެފައެވެ.
