ދިވެހިރާއްޖޭގެ ގައުމީ ޔުނިވަރސިޓީ (އެމް.އެން.ޔޫ) އިން ކުރިޔަށް ގެންދާ ފޮތް މައުރަޒާއި ދިމާކޮށް ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން ގޮފިތަކާއި ގުޅިގެން އެމް.އެން.ޔޫ.އެސް.ޔޫ މަލާފަތް 2021 ސްޓޯލަށް ބޮޑު ތަރުހީބެއް ލިބެމުން އެބައާދެއެވެ.
އެމް.އެން.ޔޫ ފޮތް މައުރަޒާއި ދިމާކޮށް އެމް.އެން.ޔޫ.އެސް.ޔޫއިން ސްޓޯލެއް ބެހެއްޓުމަށް ނިންމާ ގޮފިތަކަށް ހުޅުވާލި ފުރުސަތުގައި ތިން ގޮތްޕަކުން ވަނީ މިކަމުގައި ބައިވެރިވެފައެވެ. އެއީ ސޮސައިޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒްސް (ޝެޓްސް) އާއި ބިޒްނަސް ސްކޫލް ސްޓޫޑެންޓް އެސޯސިއޭޝަން (ބީއެސްއެސްއޭ) ގެ އިތުރުން ތަރަހައެވެ.
މި ސްޓޯލް ހުޅުވިފައި ހުންނާނީ އޮކްޓޯބަރ މަހުގެ 17 އިން ފެށިގެން 21 ވަނަ ދުވަހުގެ ހެނދުނު 09:00 އިން 12:00 އަށް އަދި މެންދުރު ފަހު 02:00 އިން ފެށިގެން 18:00 އަށް އަދި ރޭގަނޑު 20:00 އިން 22:00 އަށެވެ.
މި ޙަރަކާތާ ގުޅިގެން ޝެޓްސްގެ ރައީސް ޖައިޝް އަލީ ވަހީދު ވިދާޅުވީ މި ސްޓޯލުން ލިބެން ހުންނާނީ ތިން ފެކަލްޓީގެ ދަރިވަރުން ތައްޔާރުކުރި އެކި ވައްތަރުގެ ކާނާއާ ބުއިންތައް ކަމަށެވެ. އަދި ސްޓޯލް ހެދިއިރު ސިންގަލް ޔޫސް ޕްލާސްޓިކް ބޭނުން ނުކުރަން އިސްކަން ދީފައިވާނެ ކަމަށާއި، އެގޮތުން ވުޑެން ސަމްސާ، ޕޭޕާ ކަޕްސް އާއި ޕޭޕާ ބޭގްސް ބޭނުން ކުރަމުން އަންނަ ކަމަށެވެ.
ބީއެސްއެސްއޭގެ ރައީސާ މަޖުނާ އަޙްމަދު ވިދާޅުވީ، މިއީ ތަފާތު ތަޖުރިބާއެއް ކަމަށާއި، ތިން ފެކަލްޓީއެކުވެ ހިންގުނު މިހަރަކާތުގެ ސަބަބުން ގޮފިތަކުގެ ގުޅުން ބަދަހިވެފައިވާ ކަމަށެވެ.
މިއި ތިން ގޮފިއެކުވެ ހިންގަމުން އަންނަ ފަންޑް ރައިސިންގ އިވެންޓެކެވެ.
