ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އެނުއަލް ކޮމިއުނިޓީ ޓްރިޕް 2021 ގެ ބައިވެރިންނާއި އެމް.އެން.ޔޫ.އެސް.ޔޫގެ ހިންގާ ކޮމެޓީން ބައްދަލުކޮށްފިއެވެ.
މިއަހަރުގެ އެނުއަލް ޓްރިޕް ދިޔުމަށް ހަމަޖެހިފައިވަނީ ކ. ހިންމަފުއްޓަށެވެ. ކޮވިޑް-19 ގެ ސަބަބުން އެއް އަހަރުގެ މެދު ކެނޑުމަކަށްފަހު މިއަހަރު ޓްރިޕް ދިޔުމަށް ނިންމިއިރު، މީގެ ކުރިން 2018 ވަނަ އަހަރާއި 2019 ވަނަ އަހަރު އެމް.އެން.ޔޫ.އެސް.ޔޫއިން ވަނީ ކޮމިއުނިޓީ ޓްރިޕްތައް ބާއްވާފައެވެ.
ބުދަ ދުވަހު ހަވީރު ސެންޓްރަލް އޮޑިޓޯރިއަމްގައި ބޭއްވުނު ބައްދަލުވުމުގައި ވާހަކަ ދައްކަވަމުން އެމް.އެން.ޔޫ.އެސް.ޔޫގެ ރައީސް ޝަހުނީޒް ވިދާޅުވީ، ކޮމިއުނިޓީ ޓްރިޕަކީ ދަރިވަރުން އެ ޓްރިޕަކަށް އިންތިޒާރުކުރާ ޓްރިޕެއް ކަމަށާއި، އެހެންކަމުން އަހަރު ދުވަހެއްގެ މެދު ކެނޑުމަކަށްފަހު ދަތި ހާލުގައިވެސް މި ޓްރިޕް މިއަހަރު ކުރިޔަށް ގެންދިޔުމަށް ނިންމީ ކަމަށެވެ.
މި ބައްދަލުވުމުގައި ވާހަކަ ދައްކަވަމުން އެމް.އެން.ޔޫ.އެސް.ޔޫގެ އެޑްވައިޒަރީ ބޯޑުގެ ދެ މެމްބަރުން ކަމަށްވާ އަރުޝަދު އަޝްރަފް އަދި މުޙައްމަދު ޝާން އާމިރު ވަނީ ކޮމިއުނިޓީ ޓްރިޕްގައި ބައިވެރިވާ ދަރިވަރުން ސަމާލުކަންދޭންވީ ކަންކަން ވިދާޅުވެފައެވެ.
މިއަހަރުގެ ކޮމިއުނިޓީ ޓްރިޕަށް ހިންމަފުށީ ކައުންސިލްގެ ފަރާތުން ވަރަށް ބޮޑު އެއްބާރުލުމެއް ލިބެއެވެ. މީގެ އިތުރުން މިޓްރިޕްގައި ހިންމަފުށީގެ ދެޖަމިއްޔާ ކަމަށްވާ ހިންމަފުށީ ޔޫތް އެސޯސިއޭޝަނާއި މިނިވަން ފަރު ޖަމިއްޔާއިން ބައިވެރިވާނެއެވެ. އަދި ކައުންސިލާއި މި ދެ ޖަމިއްޔާއާ ގުޅިގެން ހިންމަފުށީ ގޮނޑުދޮށް ސާފުކުރުމުގެ ހަރަކާތެއް ކުރިޔަށް ގެންދިޔުމަށްވެސް ވަނީ ރޭވިފައެވެ.
އެމް.އެން.ޔޫ.އެސް.ޔޫ އިން ބާއްވާ އެނުއަލް ކޮމިއުނިޓީ ޓްރިޕަކީ ދަރިވަރުންނަށް އުފާވެރި މާހައުލެއްގައި މާލެއިން ބޭރު ރަށެއްގައި ކޮމިއުނިޓީ ހަރަކާތެއް ބޭއްވުމުގެ އިތުރުން ޓީމް ބިލްޑިންގ ހަރަކާތްތައް ބޭއްވުމުގެ މަގުސަދުގައި ބާއްވާ ދަތުރެކެވެ.
