”ކޮންމެ ކުއްޖަކަށްވެސް ވާހަކަ ދެއްކޭނެ“ ނަމުގައި އެމް.އެން.ޔޫ.އެސް.ޔޫ އިން ހުރަވީ ސްކޫލުގައި ކުރިޔަށް ގެންދިޔަ ސެޝަން ކާމިޔާބު ކަމާއެކު ނިންމާލައިފިއެވެ.
ދިވެހިބަހުން ވާހަކަ ދެއްކުމަށާއި، ދިވެހިބަހަށް ލޯބިކުރާ ދަރިވަރުންތަކެއް ބިނާ ކުރުމުގެ އަޒުމުގައި ކުރިޔަށް ގެންދިޔަ މި ސެޝަން ނަންގަވައިދެއްވީ ވާހަކަ ދެއްކުމުގެ ދާއިރާގެ ފުންނާބު އުސް ފަރާތްތަކެއް ކަމަށްވާ މުޙައްމަދު ނަޝީދު (ކާނަލް) އާއި ބަހުގެ އެކަޑަމީގެ ކުރީގެ ރައީސް އަޝްރަފް އަލީގެ އިތުރުން ޖައުޝަން ޝަރީފް އާއި ޝިފާން މުޙައްމަދެވެ.
މި ސެޝަން ކުރިޔަށް ގެންގޮސްފައިވަނީ 18 ޑިސެމްބަރު 2021 އިން ފެށިގެން 21 ޑިސެމްބަރު 2021 ގެ ނިޔަލަށެވެ.
މި ސެޝަން ފަރުމާކޮށްދެއްވީ އެމް.އެން.ޔޫ.އެސް.ޔޫގެ އެޑްވައިޒަރީ ބޯޑުގެ މެމްބަރު އަލީ އަމީރެވެ.
މީގެ ކުރިންވެސް ވާހަކަ ދެއްކުމުގެ ސެޝަންތަކެއް އެމް.އެން.ޔޫ.އެސް.ޔޫ އިން އަތޮޅުތެރޭގެ ރަށްތަކުގެ ސްކޫލުތަކުގައިވެސް ވަނީ ހިންގައިފައެވެ.
އެމް.އެން.ޔޫ.އެސް.ޔޫގެ ނައިބު ރައީސް (އިލްމީ) އަޙްމަދު އިޔާޒް ވިދާޅުވީ، ކުރިޔަށް އޮތްތަނުގައި މާލޭގެ ސްކޫލުތަކުގެ އިތުރުން އަތޮޅުތެރޭގެ ސްކޫލުތަކުގައިވެސް މި ސެޝަން ކުރިޔަށް ގެންދިޔުމަށް ނިންމާފައިވާ ކަމަށެވެ. އަދި މި ސެޝަން ހިންގުމުގައި އެޑްވައިޒަރީ ބޯޑުގެ މެމްބަރު އަލީ އަމީރު ވެދެއްވާ އެހީތެރިކަމަށް ޝުކުރުއަދާކުރާ ކަމަށެވެ.
