މިއަހަރުގެ ފުރަތަމަ ސެމިސްޓާގައި ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ލީޑާސް ގްރޫޕާއި ގުޅުނު ދަރިވަރުންނަށް ބޭއްވި ”ލީޑާސް ނައިޓް 2022“ ކާމިޔާބުކަމާއެކު ނިންމާލައިފިއެވެ.
ފެބުރުވަރީ 11 ވަނަ ދުވަހު އެމް.އެން.ޔޫ ޕީ.އީ ހޯލުގައި ކުރިޔަށްދިޔަ މި ހަރަކާތުގައި 100 އަށްވުރެ ގިނަ އައު ލީޑަރުން ވަނީ ބައިވެރިވެފައެވެ.
މި ހަރަކާތުގައި ލީޑާސް ގްރޫޕާ އަލަށް ގުޅުނު ދަރިވަރުންނަށް އެމް.އެން.ޔޫ.އެސް.ޔޫގެ 10 ވަނަ ދައުރުގެ ހިންގާ ކޮމެޓީ މެމްބަރުންގެ ތައާރަފެއް ވަނީ ދީފައެވެ. އަދި އެމް.އެން.ޔޫ.އެސް.ޔޫގެ އެޑްވައިޒަރީ ބޯޑުގެ މެމްބަރުންނާއި، ކުރީ ދައުރުތަކުގެ ބައެއް މެމްބަރުން ވަނީ މި ހަރަކާތުގައި ބައިވެރިވެފައެވެ.
މި ހަރަކާތުގައި ވާހަކަ ދައްކަވަމުން އެމް.އެން.ޔޫ.އެސް.ޔޫގެ ރައީސް ހުސައިން ޒައިދު ވަނީ އަލަށް ލީޑާސް ގްރޫޕާއި ގުޅުނު ދަރިވަރުންނަށް މަރުހަބާ ކިޔާފައެވެ. އަދި ކުރިޔަށް އޮތް ތަނުގައި އެމް.އެން.ޔޫ.އެސް.ޔޫގެ ހަރަކާތްތަކުން އައު ލީޑަރުން ފެނިގެންދާނެ ކަމަށް އުންމީދު ކުރައްވާ ކަމަށް ޒައިދު ވިދާޅުވިއެވެ. މީގެ އިތުރުން ޒައިދު ވަނީ ލީޑާސް ގްރޫޕްގެ ދަރިވަރުންނަށް ހުރި ފުރުސަތުތައް ކިޔާދެއްވާފައެވެ.
މި ހަރަކާތުގައި ވާހަކަ ދައްކަވަމުން ހަވަނަ ދައުރުގެ ރައީސް އަރުޝަދު އަޝްރަފް ވިދާޅުވީ، ޔޫނިއަންގެ ހަރަކާތްތަކުގައި ލީޑަރުން ބައިވެރިވުމުގެ މުހިންމުކަން ފާހަގަކުރައްވާފައެވެ. މީގެ އިތުރުން އަރުޝަދު ވަނީ ޔުނިވަރސިޓީ މާހައުލުގައި ދަރިވަރުން ކުރިމަތިލާން ޖެހޭ ގޮންޖެހުންތަކާ، އެކަންކަމުން އަރައިގަންނާނެ ގޮތް ކިޔައިދެއްވާފައެވެ.
މި ހަރަކާތުގައި ދިރާގުގެ ފަރާތުންވެސް ވަނީ ބައިވެރިވެފައެވެ. އެގޮތުން ދިރާގާއެކު ގިނަ ހަރަކާތްތަކެއް ރާވާ ޕާލޭ މޯލްޑިވްސް އާއި ދިރާގުގެ އެމްބެސަޑަރ ޒޫނާގެ ފަރާތުން ވަނީ، އައު ލީޑަރުންނާއެކު ތިމާވެއްޓާއި ގުޅޭ މައުލޫމާތުތައް ހިއްސާކޮށްފައެވެ. މީގެ އިތުރުން އެމްބެސަޑަރ ޒޫނާ ވަނީ އައު ލީޑަރުންނަށް ސްނޯކްލިންގ ދަތުރެއް ރާވައިދެއްވާނެ ކަމަށް ވިދާޅުވެފައެވެ.
މި ހަރަކާތުގައި ސްޕޮންސަރުންގެ ފަރާތުން އަގުހުރި އިނާމުތަކެއް އައު ލީޑަރުންނަށް ވަނީ ދެވިފައެވެ. އެގޮތުން މިހަރަކާތުގައި، ޓީޖެޓީ، ރެޑްބުލް މޯލްޑިވްސް، ލެވެންޑާ، ދިރާގު، ޔޫރޯ މާކެޓިންގ، ސޮލައިޓް، ކެފެއާ އަދި ކޮއްތު ހަޓުން ވަނީ ތަފާތު އެކި އިނާމުތައް ހަދިޔާކޮށްފައެވެ. މީގެ އިތުރުން މި ހަރަކާތުގައި ބައިވެރިވި ލީޑަރުންގެ ތެރެއިން ނެގުނު ގުރުއަތުން ދިމާވި ލީޑަރުންނަށް ވަނީ މަޝްހޫރު ލަވަކިޔުންތެރިޔާ ޝަލަބީ އިބްރާހީމް އާއި މަޝްހޫރު ފޮޓޯ ގްރަފަރ އަދި ވީޑިއޯ ގްރަފަރ ޝަރަފުލް އަމީރް (ކުޑަ ރިޗާޑް) ގެ ފަރާތުން ”ޑިނާ“ އަކަށް ދިޔުމުގެ ފުރުސަތު ދީފައެވެ.
އެމް.އެން.ޔޫ.އެސް.ޔޫއިން ކޮންމެ އަހަރަކުވެސް ބާއްވަމުން ގެންދާ ލީޑާސް ނައިޓަކީ އެމް.އެން.ޔޫ.އެސް.ޔޫ އިން ހިންގަމުން ގެންދާ ހަރަކާތްތައް އައު ލީޑަރުންނަށް ކިޔައިދިނުމަށާއި، އެމް.އެން.ޔޫ.އެސް.ޔޫގެ މެމްބަރުންނާއެކު އައު ލީޑަރުން މަޖާ މަހައުލެއްގައި ހޭދަކުރުމުގެ މަގުސަދުގައި ބާއްވަމުން ގެންދާ ހަރަކާތެކެވެ.
