ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އާއި ދ. ބަނޑިދޫ ކައުންސިލް ގުޅިގެން ބަނޑިދޫ ސްކޫލުގައި ކުރިއަށް ގެންދިޔަ ”ކޮންމެ ކުއްޖަކަށްވެސް ވާހަކަ ދެއްކޭނެ“ ސެޝަން ކާމިޔާބުކަމާއެކު ނިންމާލައިފިއެވެ.
ފެބުރުވަރީ މަހުގެ 10 އިން 14 އަށް ކުރިޔަށް ގެންދިޔަ މި ސެޝަން ނަންގަވައިދެއްވީ ވާހަކަ ދެއްކުމުގެ ފަންނުގެ ފުންނާބު އުސް ފަރާތެއް ކަމުގައިވާ މުޙައްމަދު ނަޝީދު (ކާނަލް)އެވެ. މީގެ އިތުރުން ފެސިލިޓޭޓަރެއްގެ ގޮތުގައި ސޮސައިޓީ ފޯރ ޝަރީއާ އެންޑް ލޯ ގެ ނައިބު ރައީސް އަޙްމަދު ސަދޫފް މޫސާ ވަނީ ބައިވެރިވެފައެވެ.
މި ސެޝަންގައި ބަނޑިދޫ ސްކޫލުގެ ގިނަ ދަރިވަރުން ވަނީ ބައިވެރިވެފައެވެ. ބަނޑިދޫ ސްކޫލުގެ ދަރިވަރުންގެ އިތުރުން އެ ރަށު ސްކޫލުގެ ޓީޗަރުންގެ އެދުމަށް އެ ސްކޫލު ޓީޗަރުންނަށްވެސް ވަނީ ހާއްސަ ސެޝަނެއް ނަންގަވައިދެއްވާފައެވެ.
މީގެ ކުރިންވެސް ވާހަކަ ދެއްކުމުގެ ސެޝަންތަކެއް އެމް.އެން.ޔޫ.އެސް.ޔޫ އިން އަތޮޅުތެރޭގެ ރަށްތަކުގެ ސްކޫލުތަކުގައިވެސް ވަނީ ހިންގައިފައެވެ.
އެމް.އެން.ޔޫ.އެސް.ޔޫގެ ނައިބު ރައީސް (އިލްމީ) އަޙްމަދު އިޔާޒް ވިދާޅުވީ، ކުރިޔަށް އޮތްތަނުގައި މާލޭގެ ސްކޫލުތަކުގެ އިތުރުން އަތޮޅުތެރޭގެ ސްކޫލުތަކުގައިވެސް މި ސެޝަން ކުރިޔަށް ގެންދިޔުމަށް ނިންމާފައިވާ ކަމަށެވެ. އަދި މި ސެޝަން ހިންގުމުގައި އެޑްވައިޒަރީ ބޯޑުގެ މެމްބަރު އަލީ އަމީރު ވެދެއްވާ އެހީތެރިކަމަށް ޝުކުރުއަދާކުރާ ކަމަށެވެ.
