އެމް.އެން.ޔޫ.އެސް.ޔޫ-އެސް.އެސް.އެލް ޤުރްއާން މުބާރާތް މި މަހު ބާއްވަނީ!

ދިވެހިރާއްޖޭގެ ގައުމީ ޔުނިވާރސިޓީގެ ދަރިވަރުންގެ ޔޫނިއަންއާއި، ފެކަލްޓީ އޮފް ޝަރީޢާ އެންޑް ލޯގެ ގޮފި ކަމުގައިވާ ސޮސައިޓީ އޮފް ޝަރީޢާ އެންޑް ލޯ ގުޅިގެން ބާއްވާ އެމް.އެން.ޔޫ.އެސް.ޔޫ-އެސް.އެސް.އެލް ޤުރްއާން މުބާރާތް މި ހިނގާ އެޕްރީލް މަހުގެ 15 ވަނަ ދުވަހު ފަށަން ނިންމައިފިއެވެ.

ކޮންމެ އަހަރަކުވެސް އެމް.އެން.ޔޫ.އެސް.ޔޫ އާއި އެސް.އެސް.އެލްއިން އިންތިޒާމްކޮށްގެން މިމުބާރާތް ބާއްވަމުން ގެންދާއިރު، މި މުބާރާތަކީ ދިވެހިރާއްޖޭގެ ގައުމީ ޔުނިވާރސިޓީގެ ހުރިހާ ދަރިވަރުންނަށް ހުޅުވާލައިގެން ކުރިއަށް ގެންދާ މުބާރާތެކެވެ. އެގޮތުން މި މުބާރާތުގައި ބަލައިގެން އަދި ނުބަލާވެސް ކިޔެވުމުގެ ފުރުސަތު ލިބިގެންދާއިރު، މިއަހަރުވެސް މި މުބާރާތުގައި ޖުމްލަ 74 ދަރިވަރެއްގެ ހުނަރުވެރި ހުށަހަޅުންތައް ފެނިގެންދާނެކަމަށް މުބާރަތް ހިންގާ ކޮމެޓީގެ ފަރާތުން މައުލޫމާތުދެއްވައެވެ. އެގޮތުން މުބާރާތުގެ ކޯ ޗެއަރ އަދި ސޮސައިޓީ އޮފް ޝަރީޢާ އެންޑް ލޯ (އެސް.އެސް.އެލް)ގެ ރައީސް އަޙްމަދު ސަދޫފް ފާހަގަކުރެއްވި ގޮތުގައި، މުބާރާތުގެ ހިންގާ ކޮމެޓީއިން ކެނޑިނޭޅި މަސައްކަތްކުރަމުން ގެންދަނީ މުބާރާތް ކާމިޔާބު މުބާރާތެއްގެ ގޮތުގައި ހެދުމަށްކަމަށާއި، ނިމިދިޔަ އަހަރަށްވުރެ ގިނަ ކުދިން މިއަހަރުގެ މުބާރާތުގައި ބައިވެރިވެފައިވުމަކީ އެކަމުގެ ހެއްކެއްކަމުގައި ސަދޫފް ފާހަގަކުރެއްވިއެވެ.

މި މުބާރާތް މިމަހު 15ވީ ހުކުރު ދުވަހުގެ ރޭ އެމް.އެން.ޔޫގެ ސީ.އޭ އޮޑިޓޯރިއަމްގައި ފެށިގެންދާއިރު، މިއަހަރުގެ މުބާރާތް ބަލަންވެސް ބެލެނެވެރިންނާއި އަދި ދަރިވަރުންނަށް ވަދެވޭނެއެވެ.