އެމް.އެން.ޔޫ.އެސް.ޔޫ – އެސް.އެސް.އެލް ޤުރްއާން މުބާރާތް 1443 ފަށައިފި

ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އާއި އެމް.އެން.ޔޫ.އެސް.ޔޫގެ ގޮފި ސޮސައިޓީ ފޯރ ޝަރިޢާ އެންޑް ލޯ (އެސް.އެސް.އެލް) ގުޅިގެން ރަމަޟާން މަހު ކުރިއަށް ގެންދާ އެމް.އެން.ޔޫ.އެސް.ޔޫ – އެސް.އެސް.އެލް ޤުރްއާން ކިޔެވުމުގެ މުބާރާތް 1443 ފަށައިފިއެވެ.

އެމް.އެން.ޔޫގެ ސީއޭ އޮޑިޓޯރިއަމުގައި މި މުބާރާތް ކުރިއަށްދާއިރުމުބާރާތް ފެށުމުގެ ގޮތުން، ހުޅުވުމުގެ ރަސްމިއްޔާތެއްވެސް ވަނީ އެސް.އެސް.އެލް އިން އިންތިޒާމްކޮށްގެން ބާއްވާފައިެވެ.
އެގޮތުން މިއަހަރުގެ މުބާރަތް އިފްތިތާޙް ކުރުމުގެ ރަސްމިއްޔާތު ޝަރަފުވެރި ކޮށްދެއްވީ ދިވެހި ބަހުގެ އެކަޑަމީގެ ކުރީގެ ރައީސް އަލްފާޟިލް އަޝްރަފް އަލީއެވެ.

މި ރަސްމިއްޔާތުގައި ވާހަކަދައްކަވަމުން އަޝްރަފް އަލީ ވަނީ ކީރިތި ޤުރްއާން ކިޔެވުން ފަދަ  މުބާރާތްތައް ބޭއްވުމުގެ މުހިއްމު ކަމުގެ މައްޗަށް އަލިއަޅުއްވާފައިއެވެ. އަޝްރަފް އަލީ ފާހަގަ ކުރެއްިވި ގޮތުގައި ޤުރްއާން މުބާރަތްތަކަކީ ހަމައެކަނި މުބާރާތަކަށް ވުމުގެ އިތުރުން، އިޙްލާސްތެރިކަމާއި އެކު ކުރެވެންވާނެ މަސައްކަތްތަކެކެވެ.
އަޝްރަފްގެ އިތުރުން، މިޙަފްލާގައި ވާހަކަފުޅު ދައްކަވަމުން އެސް.އެސް.އެލްގެ ރައީސް އަދި މުބާރާތުގެ ހިންގާ ކޮމެޓީގެ ވައިސްޗެއަރ ވަނީ މުބާރާތް ހިންގުމުގައި އަދި އެނޫންވެސް ގޮތްގޮތުން އެހީތެރިކަން ދެއްވި އެންމެހާ ފަރާތްތަކަކަށް ޝުކުރުއަދާކޮށްފައިއެވެ.
އެމް.އެން.ޔޫ.އެސް.ޔޫ – އެސް.އެސް.އެލް ޤުރްއާން މުބާރާތް ހުކުރު ދުވަހުގެ ރޭ ފެށިގެން ދިޔައިރު، ފުރަތަމަ ދަންފަޅީގައިވެސް ޖުމްލަ 19 ދަރިވަރެއްގެ ހުށަހެޅުންތައް ފެނިގެން ގޮސްފައިވެއެވެ. މި މުބާރަތް ކުރިއަށް ދާނީ މިމަހު 15 އިން 17 ގެ ނިޔަލަށް، ކޮންމެ ދުވަހެއްގެ ރޭގަނޑު 20:30 ފެށިގެން އެމް.އެން.ޔޫގެ ސީއޭ އޮޑިޓޯރިއަމްގައިއެވެ. މި މުބާރާތަކީ އެމް.އެން.ޔޫ.އެސް.ޔޫއާ ގުޅިގެން އެސް.އެސް.އެލްއިން ކޮންމެ އަހަރަކުވެސް ބާއްވަމުން އަންނަ މުބާރާތެކެވެ.