ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ކުޅުދުއްފުށީ ކެމްޕަހުގެ ގުރުޒު ގޮފީގެ 3 ވަނަ ދައުރުގެ ހިންގާ ކޮމެޓީ އިފްތިތާޙުކޮށްފިއެވެ.
މިގޮފީގެ ހިންގާ ކޮމެޓީ އިފްތިތާޙުކޮށްފައިވަނީ އެކަމަށްޓަކައި ކުޅުދުއްފުށީ ކެމްޕަހުގައި ހޯމަ ދުވަހުގެ ރޭ ބޭއްވުނު ޚާއްސަ ރަސްމިއްޔާތެއްގައެވެ. އަދި މަޤާމުތަކަށް އިންތިޚާބުވި ފަރާތްތަކަށް ލިޔުން ހަވާލުކޮށްދެއްވާފައިވަނީ އެ ރަސްމިއްޔާތުގެ ޝަރަފުވެރި މެހުމާން ކުޅުދުއްފުށީ ކެމްޕަހުގެ މެނޭޖަރ ޑރ ޢުމަރުއެވެ.
މި ގޮފީގެ ހިންގާ ކޮމެޓީގެ މަޤާމުތަކަށް ކުރިމަތިލުމަށް ހުޅުވާލި ފުރުސަތުގައި ކޮންމެ މަޤާމަކަށް ވެސް ކުރިމަތިލާފައިވަނީ އެއް ކެންޑިޑޭޓަށް ވުމުން، އެ ފަރާތްތައް ވަނީ އިންތިޚާބަކާ ނުލާ މަޤާމުތަކަށް ހޮވިފައެވެ.
މި ގޮފީގެ ރައީސްކަމުގެ މަޤާމަށް އިންތިޚާބުވެފައިވަނީ އަލްފާޟިލް މުޙައްމަދު ޝަހުދާންއެވެ. އަދި ނައިބު ރައީސް (އިތުރު ހަރަކާތް)ގެ މަޤާމަށް އަލްފާޟިލާ ފާޠިމަތު ސަނާ އިންތިޚާބުވީއިރު، ނައިބު ރައީސް (ޢިލްމީ)ގެ މަޤާމަށް އިންތިޚާބުވެފައިވަނީ މޫސާ އާޠިފްއެވެ. މި ގޮފީގެ ޚަޒާންދާރުގެ މަޤާމަށް އިންތިޚާބުވެފައިވަނީ މުޙައްމަދު މާހިލްއެވެ. އަދި ސެކްރެޓަރީގެ މަޤާމަށް އާމިނަތު ހުދާ އިންތިޚާބުވެފައިވާއިރު، މީޑިއާ ކޯޑިނޭޓަރުގެ މަޤާމަށް އިންތިޚާބުވެފައިވަނީ މުޙައްމަދު ޒަޔާންއެވެ.
މިއާއެކު މިދައުރުގައި ޔޫނިއަންގެ 14 ގޮފި ވެސް މިވަނީ އިފްތިތާހު ކުރެވިފައެވެ.
