މިނިސްޓްރީ އޮފް ހޯމް އެފެއާޒް އާއި، ޔޫތު ލީޑާސް ނެޓްވޯކް (ވައި.އެލް.އެން) އިން ކޮލެޖު/ ޔުނިވަރސިޓީތަކާ ގުޅިގެން ބޭއްވި ކޮއްކޮމެންގެ ޢީދު ހަރަކާތުގައި ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.އެސް.ޔޫ) އިން ބައިވެރިވެއްޖެއެވެ.
މިހަރަކާތް ކުރިއަށް ގޮސްފައިވަނީ އަންގާރަ ދުވަހުގެ ހަވީރު ރަސްފަންނު ސަރަހައްދުގައެވެ. މިހަރަކާތުގައި އެމް.އެން.ޔޫ.އެސް.ޔޫގެ ބައެއް ގޮފިތަކުގެ އިތުރުން އެމް.އެން.ޔޫ.އެސް.ޔޫ ބޮޑުބެރު ގްރޫޕުންވެސް ވަނީ ބައިވެރިވެފައެވެ.
އެމް.އެން.ޔޫ.އެސް.ޔޫ ގޮފިތަކުގެ ތެރެއިން މިހަރަކާތުގައި ބައިވެރިވި ގޮފިތަކަކީ، ތަރަޙަ، ބިޒްނަސް ސްކޫލް ސްޓޫޑެންޓް އެސޯސިއޭޝަން (ބީ.އެސް.އެސް.އޭ)، ސޮސައިޓި ފޯރ ޝަރީޢާ އެންޑް ލޯ (އެސް.އެސް.އެލް) ސޮސައިޓީ ފޯރ ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (ޝެޓްސް)، ނިއަރެސް، ހީލާސް، މެޑިކޯސްގެ އިތުރުން ފެސްޓު އެވެ.
މީގެ އިތުރުން މި ހަރަކާތުގައި އެމް.އެން.ޔޫ.އެސް.ޔޫ ބޮޑުބެރު ގްރޫޕްގެ ފަރި ހަރަކާތްތައް ވަނީ ފެނިގެން ގޮސްފައެވެ.
އެމް.އެން.ޔޫ.އެސް.ޔޫގެ ރައީސް ހުސައިން ޒައިދު ވިދާޅުވީ، މިހަރަކާތް ކާމިޔާބުކަމާއެކު ނިންމާލެވުނީ ގޮފިތަކުގެ ބުރަ މަސައްކަތުން ކަމަށެވެ. އެހެންކަމުން ގޮފިތަކުގެ ހިންގާ ކޮމެޓީ މެމްބަރުންނަށް ޒައިދު ވަނީ ޝުކުރުދަންނަވާފައެވެ.
ޒައިދު ވަނީ އެމް.އެން.ޔޫ.އެސް.ޔޫއިން މިނިސްޓްރީތަކުން ހިންގާ މިފަދަ ހަރަކާތްތަކުގައި ކުރިއަށް އޮތް ތަނުގައިވެސް ބައިވެރިވާނެ ކަމުގެ ޔަގީންކަން ދެއްވައިފައެވެ.މީގެއިތުރުން އެހެނިހެން ކޮލެޖު /ޔުނިވަރސިޓީ ތަކާއި ގުޅިގެން އިތުރު ހަރަކާތްތައް ކުރިއަށް އޮތް ތަނުގައި ހިންގަން މަސައްކަތް ކުރައްވާނެ ކަމަށް ޒައިދު ވިދާޅުވިއެވެ.
