1443 ވަނަ އަހަރުގެ ރަމަޟާން މަހު ކުރިޔަށް ގެންދިޔަ ހަރަކާތްތަކުގެ ނިންމުމުގެ ރަސްމިއްޔާތު ބާއްވައިފި

ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުގެ ޔޫނިއަން (އެމް.އެން.ޔޫ.އެސް.ޔޫ) އިން 1443 ވަނަ އަހަރުގެ ރަމަޟާން މަހު އެމް.އެން.ޔޫ.އެސް.ޔޫގެ ގޮފިތަކާއި ގުޅިގެން ބޭއްވި މުބާރާތްތަކުގެ ނިންމުމުގެ ރަސްމިއްޔާތު ބާއްވައިފިއެވެ.

13 މޭ 2022 ވީ ހުކުރު ދުވަހުގެ ރޭ ސީއޭ އޮޑިޓޯރިއަމްގައި ބޭއްވި މި ރަސްމިއްޔާތުގައި، ދިވެހިރާއްޖޭގެ ގައުމީ ޔުނިވަރސިޓީގެ ވައިސް ޗާންސެލަރ ޑރ. މުޙައްމަދު ޝަރީފް އާއި ފެކަލްޓީތަކުގެ ޑީނުންނާއި  ދަރިވަރުންގެ ޔޫނިއަންގެ ހިންގާ ކޮމެޓީ މެމްބަރުންނާއި، މުބާރާތްތަކުގައި އިންސާފުކުރި ޖަޖުންގެ އިތުރުން ޔޫނިއަންގެ މެންބަރުން ވަނީ ބައިވެރިވެފައެވެ.

މި ރަސްމިއްޔާތުގައި ވާހަކަދައްކަވަމުން އެމް.އެން.ޔޫ.އެސް.ޔޫގެ އެސިސްޓެންޓް ސެކްރެޓަރީ ނަޖީލާ މޫސާ ވަނީ މުބާރާތްތައް ކާމިޔަބުކަމާއެކު ނިންމާލެވުނީ ގޮފިތަކާއި އެމް.އެން.ޔޫ.އެސް.ޔޫ ލީޑާސް ގްރޫޕް މެންބަރުންގެ އިތުރުން އެޑްވައިޒަރީ ބޯޑު މެންބަރުންގެ އެއްބާރުލުމާ އެކުގައިކަން ފާހަގަކޮށް ޝުކުރު ދަންނަވާފައެވެ. އަދި އެމް.އެން.ޔޫ ދަރިވަރުންގެ ޔޫނިއަންއަކީ އަހަރަކަށްވުރެ އަހަރެއް ކުރިއެރުމަށް މަސަކަތް ކުރަމުން އަންނަ ޖަމިއްޔާއެއް ކަމަށާއި، ޔޫނިއަން އެކޭ އެއްގޮތަށް އެއް ހަރަކާތަށްވުރެ އަނެއް ހަރަކާތުގެ ފެންވަރު ރަނގަޅުކުރުމަށް ޔޫނިއަންގެ ގޮފިތަކަށް ބާރުއަޅާކަން ފާހަގަކުރިއެވެ.

މި ރަސްމިއްޔާތުގައި އެމް.އެން.ޔޫ.އެސް.ޔޫ ބީ.އެސް.އެސް.އޭ ފީފާ ޓޯނަމެންޓާއި، ތަރަހަ ތަސްވީރުން ވާހަކައިގެ އިތުރުން އެމް.އެން.ޔޫ.އެސް.ޔޫ ޝެޓްސް ކެރަމް މުބާރާތުގެ އެކި ވަނަވަނަ އަށް ދިޔަ ފަރާތްތަކަށް ވަނީ އިނާމު ދީފައެވެ. އަދި އެމް.އެން.ޔޫ.އެސް.ޔޫ ސިއާ މަދަހަ މުބާރާތް އަދި އެމް.އެން.ޔޫ.އެސް.ޔޫ އެސް.އެސް.އެލް ޤުރުއާން މުބާރާތުގެ ނަތީޖާ ފާޅުކޮށް ވަނަވަނަ އަށް ދިޔަ ފަރާތްތަކަށް އިނާމު ދީފައިވެއެވެ. މީގެ އިތުރުން މި ރަސްމިއްޔާތުގައި ވަނީ ޝެޓްސް ސުފުރާމަތި ޕްރޮގްރާމްގެ ބައިވެރިންނަށް ހަނދާނީ ލިޔުން ހަވާލުކޮށްފައެވެ. އަދި ކެރަމް މުބާރާތަށް ތައްޔާރުވުމުގެ ގޮތުން ބޭއްވި އަމްޕަޔަރ ޓްރެއިނިންގެ ފުރިހަމަކުރި ބައިވެރިންނަށް ވަނީ ކެރަމް އެސޯސިއޭޝަން އޮފް ދަ މޯލްޑިވްސްގެ ފަރާތުން ”އަމްޕަޔަރ ސީ ލައިސެންސް“ ދީފައެވެ.

އެމް.އެން.ޔޫ.އެސް.ޔޫ ބީ.އެސް.އެސް.އޭ ފީފާ ޓޯނަމެންޓްގެ ވަނަވަނައަށް ދިޔަ ފަރާތްތަކަށް އިނާމު ހަވާލުކޮށްދީފައިވަނީ އެމް.އެން.ޔޫ ކޮލިޓީ އެޝުއަރަންސް ކޮންޓްރޯލާ ދރ. އާމިނަތު ޝިޔާމާ އެވެ. ތަރަހަ ތަސްވީރުން ވާހަކައިގެ ބައިވެރިންނަށް ހަނދާނީލިޔުން ހަވާލުކޮށް، ވަނަވަނައަށް ދިޔަ ފަރާތްތަކަށް އިނާމު ހަވާލުކޮށްދިނީ ސެންޓަރ ފޯ ފައުންޑޭޝަން ސްޓަޑީޒްގެ ހެޑް އޮފް ސެންޓަރ އަލްފާޟިލާ ފާތިމަތު ނާސިހާ އެވެ. މީގެ އިތުރުން ޝެޓްސް ސުފުރާމަތި ޕްރޮގްރާމްގެ ބައިވެރިންނަށް ހަނދާނީ ލިޔުން ހަވާލުކޮށްދިނީ އެފް.އެޗް.ޓީ.އެސްގެ ލެކްޗަރަރ ހުސައިން ޞަބާހުކަމަށްވާއިރު ކެރަމްގެ ”ނޭޝަނަލް އަމްޕަޔަރ ސީ ލައިސެންސް“ ހަވާލުކޮށްދިނީ ކެރަމް ޤައުމީ ޓީމުގެ ކުޅުންތެރިޔާ އަޙްމަދު ޖަލާލް އަލީ އެވެ. އަދި އެމް.އެން.ޔޫ.އެސް.ޔޫ ޝެޓްސް ކެރަމް މުބާރާތުގެ ވަނަވަނައަށް ދިޔަ ފަރާތްތަކަށް އިނާމު ހަވާލުކޮށްދިނީ އެމް.އެން.ޔޫ.އެސް.ޔޫގެ ކުރީގެ ރައީސް އަލްއުސްތާޛް ޢަލީ ރަޝީދުކަމަށްވާއިރު، އެމް.އެން.ޔޫ.އެސް.ޔޫ ސިއާ މަދަހަ މުބާރާތުގެ ވަނަވަނައަށް ދިޔަ ފަރާތްތަކަށް އިނާމު ހަވާލުކޮށްދީފައިވަނީ ފެކަލްޓީ އޮފް އާރޓްސްގެ ޑީން އަލްފާޟިލް ޢާސިމް އަބްދުއްސައްތާރެވެ. އަދި އެމް.އެން.ޔޫ.އެސް.ޔޫ އެސް.އެސް.އެލް ޤުރުއާން މުބާރާތުގެ ވަނަވަނައަށް ދިޔަ ފަރާތްތަކަށް އިނާމު ހަވާލުކޮށްދީފައިވަނީ އެމް.އެން.ޔޫ ވައިސް ޗާންސެލަރ ޑރ. މުޙައްމަދު ޝަރީފެވެ.

މި ރަސްމިއްޔާތުގައި ސޮސައިޓީ އޮފް ޝަރީޢާ އެންޑް ލޯގެ ބައި އިލެކްޝަން ކާމިޔާބުކުރި މެންބަރުގެ މަޤާމު ހަވާލުކުރުންވެސް ވަނީ ކުރިއަށް ގޮސްފައެވެ.

އެމް.އެން.ޔޫ ދަރިވަރުންގެ ޔޫނިއަން އާއި މި ޖަމިއްޔާގެ ގޮފިތަކުން އަންނަނީ އަހަރެއްގެ ތެރޭގައި އެތައް ހަރަކާތްތަކެއް ރާވާ އިންތިޒާމުކުރަމުންނެވެ. އަދި ޚާއްޞަކޮށް ރަމަޟާންމަހުގެ ތެރޭގައި ތަފާތު ގިނަ ހަރަކާތްތައް ކުރިއަށް ގެންދެވެއެވެ.