ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން އަދި ސްޓޫޑެންޓްސް އޮފް އިނީޝިއޭޓިވް އޮފް އާރޓްސް (ސިއާ) ގުޅިގެން 1443 ވަނަ އަހަރުގެ ރަމަޟާން މަހުގައި ބޭއްވި އެމް.އެން.ޔޫ.އެސް.ޔޫ ސިއާ މަދަހަ މުބާރާތުގެ އެއްވަނަ ސްކޫލް އޮފް މެޑިސިންގގެ ދަރިވަރު ޒައިނާ ޖުނައިދު ހޯދިއިރު، އެންމެ މޮޅު ފެކަލްޓީއަކަށް ފެކަލްޓީ އޮފް ޝަރީޢާ އެންޑް ލޯ ހޮވިއްޖެއެވެ.
ރަމަޟާން މަހު ކުރިޔަށް ގެންދިޔަ މި މުބާރާތުގެ ނަތީޖާ ފާޅުކޮށްފައިވަނީ ސީއޭ އޮޑިޓޮރިއަމުގައި ބޭއްވުނު ރަމަޟާން އިވެންޓްސް ކްލޯޒިންގ ސެރެމަނީގައެވެ.
މުބާރާތުގެ އެންމެ މޮޅު 3 ބައިވެރިން ފިޔަވައި ދެން އެންމެ މޮޅު 5 ބައިވެރިންނަށް ހޮވިފައިވަނީ ސެންޓަރ ފޯ ފައުންޑޭޝަން ސްޓަޑީޒްގެ ދަރިވަރު މައިހާ އަލީ، ފެކަލްޓީ އޮފް އެޑިއުކޭޝަންގެ ދަރިވަރު އަޙްމަދު އަރުޝަމް، ސްކޫލް އޮފް މެޑިސިންގެ ދަރިވަރު މުޙައްމަދު އަޔާޝް އަލީ، ފެކަލްޓީ އޮފް އެޑިއުކޭޝަންގެ ދަރިވަރު މުޙައްމަދު ނާބިތު އަހްމަދު އަދި ސްކޫލް އޮފް ނަރސިންގެ ދަރިވަރު މާރިޔަތު އުނޫޝާއެވެ.
މުބާރާތުގެ 3 ވަނަ ހާސިލްކޮށްފައިވަނީ ސްކޫލް އޮފް މެޑިސިންގެ ދަރިވަރު މަރިޔަމް އަރީން އީސާ އަދި 2 ވަނަ ހާސިލްކޮށްފައިވަނީ ފެކަލްޓީ އޮފް ޝަރީޢާ އެންޑް ލޯގެ ދަރިވަރު މަނާލް އަހްމަދެވެ.
ގްރުޕް މަދަހަ ކެޓަގަރީން 3 ވަނަ އަށް އެމް.އެން.ޔޫ ބިޒްނަސް ސްކޫލް ހޮވިފައިވާއިރު 2 ވަނަ ސްކޫލް އޮފް މެޑިސިން ވަނީ ހާސިލްކޮށްފައެވެ. އަދި ގްރޫޕް މަދަހަ ކެޓެގަރީން 1 ވަނަ ހާސިލުކޮށްފައިވަނީ ފެކަލްޓީ އޮފް ޝަރީޢާ އެންޑް ލޯއެވެ. މުޅި މުބާރާތުން 3 ވަނަ އަށް އެންމެ މޮޅު ފެކަލްޓީއަށް ހޮވިފައިވަނީ ފެކަލްޓީ އޮފް އެޑިއުކޭޝަނެވެ. 2 ވަނަ އަށް އެންމެ މޮޅު ފެކަލްޓީއަކަށް ހޮވިފައިވަނީ ސްކޫލް އޮފް މެޑިސިންއެވެ.
އެމް.އެން.ޔޫ.އެސް.ޔޫ ސިއާ މަދަހަ މުބާރާތް ފުރަތަމަ ބޭއްވުނީ 2013 ވަނަ އަހަރު ކަމަށްވާއިރު، ދެވަނަ މުބާރާތް ބޭއްވުނީ 2019 ވަނަ އަހަރު އަދި 3 ވަނަ މުބާރާތް ކުރިއަށް ގެންދިޔައީ 2021 ވަނަ އަހަރުއެވެ. މިއީ މި މުބާރާތް ބޭއްވުނު 4 ވަނަ ފަހަރެވެ.