ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އަދި ސޮސައިޓީ އޮފް ޝަރީޢާ އެންޑް ލޯ (އެސް.އެސް.އެލް) ގުޅިގެން 1443 ވަނަ އަހަރުގެ ރަމަޟާން މަހަށް ޚާއްސަކޮށްގެން ކުރިޔަށް ގެންދިޔަ އެމް.އެން.ޔޫ.އެސް.ޔޫ އެސް.އެސް.އެލް ޤުރުއާން މުބާރާތުން މުޅި މުބާރާތުން އެއްވަނަ ފެކަލްޓީ އޮފް އެޑިއުކޭޝަންގެ މުޙައްމަދު ނާބިތު އަޙްމަދު ހޯދިއިރު، އެންމެ މޮޅު ފެކަލްޓީއަކަށް ފެކަލްޓީ އޮފް އެޑިއުކޭޝަން ހޮވިއްޖެއެވެ.
ރަމަޟާން މަހު ކުރިޔަށް ގެންދިޔަ މި މުބާރާތުގެ ނަތީޖަ ފާޅުކޮށްފައިވަނީ ސީއޭ އޮޑިޓޯރިއަމުގައި ބޭއްވުނު ރަމަޟާން އިވެންޓްސް ކްލޯޒިންގ ސެރެމަނީގައވެ.
މުބާރާތުގެ 1 ވަނަ 2 ވަނަ 3 ވަނަ ފިޔަވައި ދެން އެންމެ މޮޅު 5 ބައިވެރިންނަކީ ސްކޫލް އޮފް ނާރސިންގެ ދަރިވަރު ހަފީޒާ ޒުބައިރު، ސެންޓަރ ފޯ ފައުންޑޭޝަން ސްޓަޑީޒްގެ ދަރިވަރު އައިޝަތު އިންޝާ އަޙްމަދު، ސްކޫލް އޮފް ނާރސިންގެ ދަރިވަރު މަރިޔަމް މަލަކާ މާހިރު، ސްކޫލް އޮފް ނާރސިންގެ ދަރިވަރު އައިޝަތު ލައިސާ ޚާލިދު އަދި ފެކަލްޓީ އޮފް ހެލްތު ސައިންސަސްގެ ދަރިވަރު ސިއާދާ އާދަމްއެވެ.
ނުބަލައި ކިޔެވުމުގެ ގޮފިން 3 ވަނަ ފެކަލްޓީ އޮފް ޝަރީޢާ އެންޑް ލޯގެ ދަރިވަރު އައިޝަތު ރަފާހު އަލީ ހޯދިއިރު 2 ވަނަ ހޯދީ ފެކަލްޓީ އޮފް އެޑިއުކޭޝަންގެ ދަރިވަރު ސަހިއްޔާ ޢަބްދުލްގަނީ އެވެ. އަދި މި ގޮފީގެ 1 ވަނަ ހޯދީ ސްކޫލް އޮފް ނާރސިންގެ ދަރިވަރު މަރިޔަމް ނާއިޝާ މަންސޫރެވެ.
މީގެ އިތުރުން ބަލައިގެން ކިޔެވުމުގެ ގޮފިން 3 ވަނަ 2 ދަރިވަރަކަށް ލިބިފައިވެއެވެ. އެއީ ފެކަލްޓީ އޮފް އެޑިއުކޭޝަންގެ ދަރިވަރު ހައްވާ ނަދާ އަދި ސެންޓަރ ފޯ ފައުންޑޭޝަން ސްޓަޑީޒްގެ ދަރިވަރު މައިޝާ މުޙައްމަދެވެ. މި ގޮފިން 2 ވަނަ އަށް ގޮސްފައިވަނި ފެކަލްޓީ އޮފް އެޑިއުކޭޝަންގެ ދަރިވަރު އަހްމަދު ނަޒީރެވެ.
މުޅި މުބާރާތުން 3 ވަނަ އަށް އެންމެ މޮޅު ފެކަލްޓީ އަކަށް ހޮވިފައިވަނީ ސެންޓަރ ފޯ ފައުންޑޭޝަން ސްޓަޑީޒެވެ. އަދި މުޅި މުބާރާތުން 2 ވަނަ އަށް އެންމެ މޮޅު ފެކަލްޓީ އަކަށް ހޮވިފައިވަނީ ސްކޫލް އޮފް ނާރސިންގ އެވެ.
މިއަހަރުގެ ޤުރްއާން މުބާރާތް އިންސާފުކުރި ފަނޑިޔާރުންނަކީ އިސް ފަނޑިޔާރު ޔޫސުފް ހުމައިން ހާޝިމް އަދި މަހުފޫޒާ ޝާކިރެވެ.
އެމް.އެން.ޔޫ.އެސް.ޔޫ ޤުރުއާން މުބާރާތަކީ 2013 ވަނަ އަހަރުން ފެށިގެން ސިލްސިލާކޮށް ބާއްވަމުން އަންނަ މުބާރާތެކެވެ. 2019 ވަނަ އަހަރުން ފެށިގެން ޤުރުއާން މުބާރާތް ބާއްވަމުން އަންނަނީ އެސް.އެސް.އެލްއާ ގުޅިގެންނެވެ. މި މުބާރާތުގެ އެންމެ ބޮޑު މަޤްޞަދަކީ އެމް.އެން.ޔޫގައި ތަޢުލީމު ޙާޞިލުކުރަމުންދާ ދަރިވަރުންގެ މެދުގައި ކީރިތި ޤުރުއާނަށާއި ޤުރުއާންގެ ޢިލްމަށް އޮތް ލޯބި އަށަގެންނެވުމެވެ.
