އިސްލާމިކް ޔުނިވަރސިޓީ އޮފް މޯލްޑިވްސްގެ ސްޓޫޑެންޓް ޔޫނިއަން (އައި.ޔޫ.އެމް.އެސް.ޔޫ) އިން ޔުނިވަރސިޓީތަކާއި، ކޮލެޖުތަކަށް ހުޅުވާލައިގެން ބާއްވާ ހޭންޑް ބޯލް މުބާރާތުގައި ބައިވެރިވާ ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ހޭންޑް ބޯލް ޓީމުތަކަށް ޖާޒީ ހަވާލުކޮށްފިއެވެ.
މި މަހުގެ 20 ވަނަ ދުވަހުފަށާ މި މުބާރާތުގައި އެމް.އެން.ޔޫ.އެސް.ޔޫގެ ޓީމު އަންހެން އަދި ފިރިހެން ޑިވިޝަނުގައި ބައިވެރިވާނެއެވެ.
މި މުބާރާތުގައި ބައިވެރިވާ އެމް.އެން.ޔޫ.އެސް.ޔޫގެ އަންހެން ހޭންޑް ބޯލް ޓީމަށް ޖާޒީ ހަވާލުކޮށްދެއްވީ، ޑީން އޮފް ސްޓޫޑެންޓް، އާޝިއާ ލީލާ އަޙްމަދެވެ. އަދި ފިރިހެން ހޭންޑް ބޯލް ޓީމަށް ޖާޒީ ހަވާލުކޮށްދެއްވީ، ޑެޕިއުޓީ ވައިސް ޗާންސެލަރ، ހުސެއިން ހަލީމެވެ.
މި މުބާރާތައް ތައްޔާރުވުމުގެ ގޮތުން އެމް.އެން.ޔޫ.އެސް.ޔޫގެ ޓީމުތަކުން ފަރިތަކުރުންތައް ފަށާފައިވަނީ، އޭޕްރީލް މަހުގެ ތެރޭގައެވެ.
މި މުބާރާތުގައި ވާދަކުރާ އެމް.އެން.ޔޫގެ ދެ ޓީމަށް އިރުޝާދު ދެއްވާނީ، މަޝްހޫރު ހޭންޑް ބޯލް ކުޅުންތެރިޔާ، މުޙައްމަދު ޝައިހާން އިބްރާހީމްއެވެ.
އެމް.އެން.ޔޫ.އެސް.ޔޫގެ ނައިބު ރައީސް (އިތުރު ހަރަކާތް) ސުޢައިދު ޔޫނުސް ވިދާޅުވީ، އެމް.އެން.ޔޫ.އެސް.ޔޫގެ ދެ ޓީމުންވެސް މި މުބާރާތަށް ނުކުންނަނީ ތައްޓަށް އަމާޒު ހިފައިގެން ކަމަށެވެ. އަދި މިވީ ކުޑަ ދުވަސްކޮޅުގެ ތެރޭގައި އެމް.އެން.ޔޫ.އެސް.ޔޫގެ ދެ ޓީމުންވެސް މި މުބާރާތަށް ވަރަށް ރަނގަޅަށް ތައްޔާރުވެފައިވާ ކަމަށް ސުޢައިދު ވިދާޅުވިއެވެ.
