ހޯމް މިނިސްޓްރީގެ ޔޫތު ލީޑާސް ނެޓްވޯކް (ވައި.އެލް.އެން) އިން ށ. މިލަންދޫގައި ކުރިއަށް ގެންދާ ޔޫތު ލީޑާސް ފޯރަމުގައި ބައިވެރިވުމަށް ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ ޓީމެއް މިލަންދޫއަށް ގޮސްފިއެވެ.
މި މަހުގެ 19 އިން 22 އަށް ކުރިއަށްދާ މި ފޯރަމް ފަށާފައިވަނީ ބުރާސްފަތި ދުވަހުގެ ރެޔެވެ. މި ފޯރަމުގެ މަގުސަދަކީ ހަރުދަނާ ޒުވާން އިސްވާރުންތަކެއް މުޖުތަމައަށް ނެރެދިނުމެވެ.
ފޯރަމް ހުޅުވައިދެއްވީ މިކަމަށްޓަކައި ބޭއްވުނު ހާއްސަ ރަސްމިއްޔާތެއްގައި ހޯމް މިނިސްޓަރު އިމްރާން އަބްދުﷲއެވެ.
މި ފޯރަމުގައި އެމް.އެން.ޔޫ.އެސް.ޔޫގެ ފަރާތުން 5 މެމްބަރުން ބައިވެރިވާނެއެވެ. އެއީ އެޑްވައިޒަރީ ބޯޑުގެ މެމްބަރު އަދި ކުރީގެ ރައީސް މުޙައްމަދު ޝާން އާމިރު އާއި އަލީ ޔަމީން، އަހުމަދު އިފްލާހު ސަލީމް އަދި އާމިނަތު ރަޝާ އަހުމަދުގެ އިތުރުން އާމިނަތު ޔާސިމީން މުހައްމަދެވެ.
މީގެ އިތުރުން ވައި.އެލް.އެންގައި އެމް.އެން.ޔޫ ތަމްސީލުކުރާ މެންބަރުން ކަމުގައިވާ ވައި.އެލް.އެންގެ ރައީސާ ނަޝާތު ވަހީދު، އިވެންޓް މެނޭޖަރ މަންހާ ޞާދިގު، ޚަޒާންދާރު އިބްރާހީމް މިޝަލް މޫސާ، ޕީ.އާރު މެނޭޖަރު މުހައްމަދު އަހުނަފް އަދި މެންބަރު ޒާޔާ ހަސަން ޢިމްރާންގެ އިތުރުން ވައި.އެލް.އެންގެ ކުރީގެ ރައީސާ ސަނާ ޝަފީގު ބައިވެރިވެއެވެ.
މީގެ ކުރިންވެސް އެމް.އެން.ޔޫ.އެސް.ޔޫގެ މެމްބަރުން ވަނީ ވައި.އެލް.އެންގެ އެކިއެކި ފޯރަމުތައް ރާވައި ހިންގުމުގައި ވައި.އެލް.އެން ޓީމާއެކު މަސައްކަތްކޮށްފައެވެ. މިގޮތުން ލ. ގަން، ގއ. ވިލިނގިލި, ހއ. ހޯރަފުށި، ގދ. ތިނަދޫ, އއ. މަތިވެރި އަދި ނ. ވެލިދޫގައި ބޭއްވި ފޯރަމްތައް ފާހަގަ ކުރެވެއެވެ.
