ފިރިހެން ޓީމު ބަލިވިއިރު، އަންހެން ޓީމަށް ފަސޭހަ މޮޅެއް

އިސްލާމިކް ޔުނިވަރސިޓީ އޮފް މޯލްޑިވްސްގެ ސްޓޫޑެންޓް ޔޫނިއަން (އައި.ޔޫ.އެމް.އެސް.ޔޫ) އިން އިންތިޒާމުކޮށްގެން ކޮލެޖު/ޔުނިވަރސިޓީތަކަށް ބާއްވާ އައި.ޔޫ.އެމް.އެސް.ޔޫ ހޭންޑްބޯލް ފިއެސްޓާގައި ދިވެހިރާއްޖޭގެ ޤައުމީ ޔުނިވަރސިޓީގެ ފިރިހެން ޓީމު ކުޅުނު މެޗުން ބަލިވިއިރު، އަންހެން ޓީމު ކުޅުނު މެޗު ފަސޭހަކަމާއެކު ކާމިޔާބުކޮށްފިއެވެ.

ނެޝަނަލް ހޭންޑްބޯލް ގްރައުންޑްގައި ހުކުރު ދުވަހުގެރޭ ކުޅުނު ފިރިހެން ޑިވިޝަނުގެ މެޗުން އެމް.އެން.ޔޫ ބަލިވީ ވިލާ ކޮލެޖާއި ބައްދަލުކޮށް 12-7 ގެ ނަތީޖާއަކުންނެވެ. އަދި އަންހެން ޑިވިޝަނުގެ މެޗު އެމް.އެން.ޔޫ އިން ކާމިޔާބުކުރީ އެމްއައި ކޮލެޖާއި ބައްދަލުކޮށްގެން 21-1 ގެ ނަތީޖާއަކުންނެވެ.

އަންހެން ޑިވިޝަނުގެ މެޗުގައި އެމް.އެން.ޔޫގެ ޓީމުގެ ފަރާތުން މޮޅު ކުޅުމެއް ފެނިގެންދިޔައިރު، މި މެޗުގެ މޮޅު ކުޅުންތެރިއަކަށް ހޮވިފައިވަނީ، އެމް.އެން.ޔޫގެ ޖާޒީ ނަމްބަރު 11 ފިރުޝާނާ ނަސީރުއެވެ.

މި މުބާރާތުގައި އެމް.އެން.ޔޫ އިން ކުޅޭ ދެވަނަ މެޗުގައި އާދީއްތަ ދުވަހުގެ ހަވީރު 05:15 ގައި އެމް.އެން.ޔޫގެ އަންހެން ޓީމު ބައްދަލުކުރާނީ ކްލިކް ކޮލެޖާއެވެ. އަދި އަންގާރަ ދުވަހުގެ ހަވީރު 4:15 ގައި އެމް.އެން.ޔޫގެ ފިރިހެން ޓީމު ބައްދަލުކުރާނީ މެޕްސް ކޮލެޖާއެވެ.