ވިލާ ބަލިކޮށް އެމް.އެން.ޔޫ ފައިނަލަށް

އިސްލާމިކް ޔުނިވަރސިޓީ އޮފް މޯލްޑިވްސްގެ ދަރިވަރުންގެ ޔޫނިއަން (އައި.ޔޫ.އެމް.އެސް.ޔޫ) އިން އިންތިޒާމުކޮށްގެން ބާއްވަމުން އަންނަ، އައި.ޔޫ.އެމް.އެސް.ޔޫ ހޭންޑް ބޯލް ފިއެސްޓާގެ އަންހެން ޑިވިޝަނުގެ ސެމީ ފައިނަލުގައި ވިލާ ކޮލެޖު ފަސޭހަކަމާއެކު ބަލިކޮށް އެމް.އެން.ޔޫ އިން ފައިނަލަށް ދަތުރުކޮށްފިއެވެ.

ވިއްސާރައިގެ ސަބަބުން ހޮނިހިރު ދުވަހުގެރޭ ކުޅެން އޮތް ސެމީ ފައިނަލް މެޗު ކުޅެފައިވަނީ އާދީއްތަ ދުވަހުގެ ރެޔެވެ. ސެމީ ފައިނަލު މެޗުގެ ކުރިން އައި.ޔޫ.އެމް.އެސް.ޔޫ އާއި ގުޅިގެން އެމް.އެން.ޔޫ.އެސް.ޔޫގެ އިސްވާރުން ވަނީ ހޭންޑް ބޯލް ޕިޗުގައި ހެދިފައި ހުރި ފެން ހިއްކައިފައެވެ.

މި މެޗު އެމް.އެން.ޔޫ އިން ކާމިޔާބުކުރީ ފަހަތުން އަރައި 18-06 ގެ ނަތީޖާއަކުންނެވެ. މި މެޗުގެ ފުރަތަމަ ދެ ލަނޑު ޖަހާ ވިލާއިން ވަނީ ލީޑު ނަގައިފައެވެ. އެކަމަކު އެމް.އެން.ޔޫ އިން މެޗުގެ ތެރެއަށް ވަދެ ގާތް ގާތުގައި ގިނަ ލަނޑުތަކެއް ކާމިޔާބުކޮށް ލީޑު ވަނީ ނަގާފައެވެ. ހާއްސަކޮށް މެޗުގެ ދެވަނަ ހާފުގައި އެމް.އެން.ޔޫގެ ފަރާތުން ތަފާތު މޮޅު ކުޅުމެއް ފެނިގެންދިޔައެވެ.

މި މެޗުގެ މޮޅު ކުޅުންތެރިއަކަށް ހޮވިފައިވަނީ އެމް.އެން.ޔޫގެ ޖާޒީ ނަމްބަރު 12 ރުނާ އިބްރާހީމްއެވެ.

މި މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ އަންގާރަ ދުވަހުގެރެޔެވެ. ފައިނަލުގައި އެމް.އެން.ޔޫ އިން ނުކުންނާނީ ކްލިކް ކޮލެޖާއި ދެކޮޅަށެވެ. މި މުބާރާތުގެ ގްރޫޕް ސްޓޭޖުގައިވެސް އެމް.އެން.ޔޫ އިން ވަނީ ކްލިކް ކޮލެޖާއި ދެކޮޅަށް ކުޅެފައެވެ. އެ މެޗު އެމް.އެން.ޔޫ އިން ވަނީ ކާމިޔާބުކޮށްފައެވެ. ފައިނަލް މެޗު ކުޅޭނީ އަންގާރަ ދުވަހުގެރޭ 21:30 ގައެވެ.