އިސްލާމިކް ޔުނިވަރސިޓީ އޮފް މޯލްޑިވްސްގެ ސްޓޫޑެންޓް ޔޫނިއަން (އައި.ޔޫ.އެމް.އެސް.ޔޫ) އިން ބޭއްވި ހޭންޑްބޯލް ފިއެސްޓާގެ އަންހެން ޑިވިޝަނުގެ ޗެމްޕިއަންކަން، ކްލިކް ކޮލެޖު ބަލިކޮށް ދިވެހިރާއްޖޭގެ ޤައުމީ ޔުނިވަރސިޓީން ހޯދައިފިއެވެ.
އަންގާރަ ދުވަހުގެރޭ ހޭންޑްބޯލް ކޯޓުގައި ކުޅުނު ފައިނަލް މެޗު އެމް.އެން.ޔޫ އިން ކާމިޔާބުކުރީ 14-10 ގެ ނަތީޖާއަކުންނެވެ.
މެޗު ފަށައިގެން އެމް.އެން.ޔޫގެ ފަރާތުން މޮޅު ކުޅުމެއް ފެނިގެންދިޔައިރު، މެޗުގެ ބޮޑުބައި އެމް.އެން.ޔޫއިން ކުޅެފައިވަނީ ފަސް ލަނޑުގެ ލީޑެއްގައި އޮވެގެންނެވެ. އެހެންނަމަވެސް މެޗުގެ ފަހު ފަސް މިނެޓުގެ ތެރޭގައި ކްލިކުން ވަނީ ކުޅުން ރަނގަޅުކޮށް އެމް.އެން.ޔޫގެ ހާފަށް ބާރުބޮޑުކޮށް ފަރަގު ކުޑަކޮށްފައެވެ.
މި މުބާރާތުގެ އެންމެ މޮޅު ހަތް ކުޅުންތެރިންގެ ތެރޭގައި އެމް.އެން.ޔޫގެ ފިރުޝާނާ ނަސީރު އާއި ރުނާ އިބްރާހީމް ވަނީ ހިމެނިފައެވެ. އަދި މި މުބާރާތުގެ އެންމެ މޮޅު ކުޅުންތެރިއަކީ އެމް.އެން.ޔޫގެ ފިރުޝާނާ ނަސީރުއެވެ.
މި މުބާރާތުގެ އަންހެން ޑިވިޝަނުގެ ޗެމްޕިއަންކަން އެމް.އެން.ޔޫއިން ހޯދިއިރު، ފިރިހެން ޑިވިޝަނުގެ ފެއާ ޕްލޭ ޓީމަކަށް ހޮވުނީ ވެސް އެމް.އެން.ޔޫއެވެ.
