ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ހިންގާ ކޮމެޓީގެ ފަރާތުން މާލޭގައި ހުންނަ މަޖްދުއްދީން ދަނާލުގައި އުޅޭ ދަރިވަރުންނާ ބައްދަލުކޮށްފިއެވެ.
ހުކުރު ދުވަހުގެރޭ ސެންޓްރަލް އެޑްމިނިސްޓްރޭޝަން އޮޑިޓޯރިއަމްގައި އޮތް ބައްދަލުވުމުގައި ދަނާލުގައި އުޅޭ 25 އަށްވުރެ ގިނަ ދަރިވަރުން ވަނީ ބައިވެރިވެފައެވެ. މި ބައްދަލުވުމުގައި އެމް.އެން.ޔޫ.އެސް.ޔޫގެ ހިންގާ ކޮމެޓީގެ އިތުރުން، އެޑްވައިޒަރީ ބޯޑުގެ މެންބަރުން ވަނީ ބައިވެރިވެފައެވެ. މި ބައްދަލުވުމުގައި ވަނީ ދަނާލުގައި އުޅޭ ދަރިވަރުންގެ ކަންބޮޑުވުންތައް އެމް.އެން.ޔޫ.އެސް.ޔޫ އާ ހިއްސާކޮށްފައެވެ.
2018 ވަނަ އަހަރުން ފެށިގެން އެމް.އެން.ޔޫ.އެސް.ޔޫ އިން އަންނަނީ އެމް.އެން.ޔޫގެ އެކި ކެމްޕަސްތަކުގައި ހުންނަ ދަނާލުތަކުގައި ދިރިއުޅޭ ދަރިވަރުންނާ ބައްދަލުކުރަމުންނެވެ. އެގޮތުން 2018 ވަނަ އަހަރު ވެސް ވަނީ މަޖްދުއްދީން ދަނާލުގެ ދަރިވަރުންނާ ބައްދަލުކޮށްފައެވެ.އަދި އަތޮޅު ކެމްޕަސްތަކުގެ ގޮފިތައް އިފްތިތާހު ކުރުމަށް ކުރެވޭ ދަތުރުތަކުގައި އެ ކެމްޕަސްތަކުގެ ދަނާލުގައި ދިރިއުޅޭ ދަރިވަރުންނާ އެމް.އެން.ޔޫ.އެސް.ޔޫ އިން އަންނަނީ ބައްދަލު ކުރަމުންނެވެ.
