އިސްލާމިކް ޔުނިވަރސިޓީ އޮފް މޯލްޑިވްސް ސްޓޫޑެންޓް ޔޫނިއަން (އައި.ޔޫ.އެމް.އެސް.ޔޫ)ގެ ފަރާތުން އިންތިޒާމުކޮށްގެން ކުރިއަށްދިޔަ އިންޓަރ ކޮލެޖް/ޔުނިވަރސިޓީ ހޭންޑްބޯޅަ މުބާރާތުގައި އެމް.އެން.ޔޫގެ އަންހެން އަދި ފިރިހެން ޓީމުން ހޯދި ކާމިޔާބީ ކުލަގަދަ ގޮތެއްގައި ފާހަގަކޮށްފިއެވެ.
ހޮނިހިރު ދުވަހުގެ ހަވީރު އެމް.އެން.ޔޫ ބަންކެޓް ހޯލުގައި ކުރިއަށް ދިޔަ މި ހަފްލާގައި އެމް.އެން.ޔޫގެ ވައިސް ޗާންސެލަރ ޑރ. މުހައްމަދު ޝަރީފާއި އެމް.އެން.ޔޫގެ އިސްވެރިންނާއި ދެ ޓީމުގެ ކުޅުންތެރިންގެ އިތުރުން ދަރިވަރުންގެ ޔޫނިއަންގެ މެމްބަރުން ވަނީ ބައިވެރިވެފައެވެ.
މި މުބާރާތުގެ އަންހެން ޑިވިޝަނުގެ ޗެމްޕިއަންކަން އެމް.އެން.ޔޫއިން ހޯދިއިރު، ފިރިހެން ޑިވިޝަނުގެ ފެއާ ޕްލޭ ޓީމަކަށް ހޮވުނީ ވެސް އެމް.އެން.ޔޫއެވެ. މިއީ އެމް.އެން.ޔޫގެ ހޭންޑްބޯޅަ ޓީމަކަށް ލިބުނު ފުރަތަމަ ރަން މެޑަލެވެ. މި ކާމިޔާބީ ފާހަގަކޮށް ކުޅުންތެރިންނާއި، އޮފިޝަލުންނާއި އަދި ކޯޗަށް ވަނީ ހަނދާނީ ލިޔުން ހަވާލުކޮށްފައެވެ. އަދި ކުޅުންތެރިންގެ ޝަރަފުގައި ވަނީ ކެއުމެއްވެސް ބާއްވާފައެވެ.
އައި.ޔޫ.އެމް.އެސް.ޔޫ ހޭންޑްބޯޅަ ފިއެސްޓާ ކުރިއަށް ގޮސްފައިވަނީ މޭ މަހުގެ 20 ވަނަ ދުވަހުން 31 ވަނަ ދުވަހުގެ ނިޔަލަށެވެ. މި މުބާރާތުގައި އަންހެން ޑިވިޝަނުގައި 8 ޓީމު އަދި ފިރިހެން ޑިވިޝަނުގައި 7 ޓީމު ވަނީ ބައިވެރިވެފައެވެ.
