ޖޭ.އެސް.ސީ ބަލިކޮށް އެމް.އެން.ޔޫ.އެސް.ޔޫ އިން ފަހިދޫ ބަހުސް މުބާރާތުގެ ފެށުން ރަނގަޅުކޮށްފި

ޕަބްލިކް ސަރވިސް މީޑިއާ (ޕީ.އެސް.އެމް)ގެ ދިވެހި ރާއްޖޭގެ އަޑުން ބާއްވާ ”ފަހިދޫ ބަހުސް މުބާރާތް 2022”ގެ ފުރަތަމަ ބަހުސް ޖުޑީޝަލް ސަރވިސް ކޮމިޝަން (ޖޭ.އެސް.ސީ)އާ ވާދަކޮށް އެމް.އެން.ޔޫ.އެސް.ޔޫ އިން ކާމިޔާބުކޮށްފިއެވެ.

ޖޫން 18 ވީ ހޮނިހިރު ދުވަހުގެ ރޭގަނޑު 08:30ގައި ދިވެހިރާއްޖޭގެ އަޑުގެ ސެނަކޯ މާލަމުގައި ކުރިއަށްދިޔަ ބަހުސް އެމް.އެން.ޔޫ.އެސް.ޔޫ އިން ކާމިޔާބުކުރީ 716.5 – 671 ގެ ނަތީޖާއަކުންނެވެ. މި ބަހުސްގެ މައުޟޫ އަކީ ”ފެންނަމުންދާ ކަންކަމަށް ރިޢާޔަތް ކުރާއިރު ދުނިޔޭގެ ބާރުގެ ތިލަފަތް ބޮޑަށް ބުރަވަނީ އޭޝިޔާއަށެވެ“. ޖޭ.އެސް.ސީ އިން މައުޟޫއާ އެއްކޮޅަށް ބަހުސް ކުރިއިރު އެމް.އެން.ޔޫ.އެސް.ޔޫ އިން ބަހުސްކުރީ މައުޟޫއާ ދެކޮޅަށެވެ. ފޯރިގަދަ މި ބަހުސްގެ އެންމެ މޮޅު ބަހުސްކުރުންތެރިޔަކަށް ހޮވިފައިވަނީ އެމް.އެން.ޔޫ.އެސް.ޔޫގެ މެންބަރު އާމިނަތު އީނާސެވެ.

އެމް.އެން.ޔޫ.އެސް.ޔޫގެ ދެ ވަނަ ބަހުސްގައި ޖޫން މަހުގެ 22 ވަނަ ދުވަހު ބައްދަލުކުރާނީ މިނިސްޓްރީ އޮފް އެޑިޔުކޭޝަންއާއެވެ.

މި މުބާރާތުގެ ޗެމްޕިއަންކަން އެމް.އެން.ޔޫއެސް.ޔޫ އިން ވަނީ ދެ އަހަރަކު ހޯދާފައެވެ. އެއީ 2016 ވަނަ އަހަރާއި 2018 ވަނަ އަހަރެވެ. އަދި 2017 ވަނަ އަހަރު އޮތް މުބާރާތުގެ ރަނަރއަޕްކަން ވަނީ ހޯދާފައެވެ.