ޕަބްލިކް ސަރވިސް މީޑިއާ (ޕީ.އެސް.އެމް)ގެ ދިވެހިރާއްޖޭގެ އަޑުން ބާއްވާ ”ފަހިދޫ ބަހުސް މުބާރާތް 2022”ގެ ދެވަނަ ބަހުސްގައި ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ)ގެ މައްޗަށް ކުޑަ ތަފާތަކުން މިނިސްޓްރީ އޮފް އެޑިއުކޭޝަންގެ ޓީމުން ކުރި ހޯދައިފިއެވެ.
ބުދަ ދުވަހުގެރޭ 08:30ގައި ދިވެހިރާއްޖޭގެ އަޑުގެ ސެނަކޯ މާލަމުގައި ކުރިއަށްދިޔަ ބަހުސް އިން އެމް.އެން.ޔޫ ބަލިވީ ކުޑަ ތަފާތަކުންނެވެ. މި ބަހުސް މިނިސްޓްރީ އޮފް އެޑިއުކޭޝަން އިން ކާމިޔާބުކުރީ 683.5 – 670.5 ގެ ނަތީޖާއަކުންނެވެ. މި ބަހުސްގެ މައުޟޫ އަކީ ” ފަތުރުވެރިކަމުގެ ނަފާ އިތުރުކުރެވޭނީ ބައިނަލް އަގުވާމީ ވައިގެ ބަނދަރުތައް ރާއްޖޭގައި އިތުރު ކުރެވިގެންނެވެ.“. މިނިސްޓްރީ އޮފް އެޑިއުކޭޝަން އިން މައުޟޫއާ އެއްކޮޅަށް ބަހުސް ކުރިއިރު އެމް.އެން.ޔޫ.އެސް.ޔޫ އިން ބަހުސްކުރީ މައުޟޫއާ ދެކޮޅަށެވެ. މި ބަހުސްގެ އެންމެ މޮޅު ބަހުސްކުރުންތެރިޔަކަށް ހޮވިފައިވަނީ މިނިސްޓްރީ އޮފް އެޑިއުކޭޝަން ޓީމުގެ މެންބަރު އަޙްމަދު މުޖާހިދެވެ.
މި ނަތީޖާއާއެކު، މި ގްރޫޕްގައި ހިމެނޭ ކޮންމެ ޓީމަކުންވެސް އެއް ބަހުސް ކާމިޔާބުކޮށް އަނެއް ބަހުސް އިން ބަލިވެފައިވާތީ ސެމީއަށް ދާނެ ޓީމުތައް ކަނޑައެޅުނީ ކޮންމެ ޓީމެއްގެ ވެސް ދެ ބަހުސްގެ ޖުމްލަ ޕޮއިންޓަށް ބަލައިގެންނެވެ. މިގޮތަށް ބަލާއިރު، ގްރޫޕްގެ އެއްވަނަ ލިބެނީ ޖުޑީޝަލް ސަރވިސް ކޮމިޝަން (ޖޭ.އެސް.ސީ)އަށެވެ. އަދި ދެވަނަ ލިބުނީ މިނިސްޓްރީ އޮފް އެޑިއުކޭޝަނަށެވެ. އެމް.އެން.ޔޫގެ ޓީމަށް ގްރޫޕްގެ 3 ވަނަ ލިބި ވަނީ މުބާރާތާ އަލްވަދާޢު ކިޔާފައެވެ.
މި މުބާރާތުގެ ޗެމްޕިއަންކަން އެމް.އެން.ޔޫއެސް.ޔޫ އިން ވަނީ ދެ އަހަރަކު ހޯދާފައެވެ. އެއީ 2016 ވަނަ އަހަރާއި 2018 ވަނަ އަހަރެވެ. އަދި 2017 ވަނަ އަހަރު އޮތް މުބާރާތުގެ ރަނަރއަޕްކަން ވަނީ ހޯދާފައެވެ.
