ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން ބާއްވާ ”އެމް.އެން.ޔޫ.އެސް.ޔޫ ބަހުސް މުބާރާތް 2022″ގެ ފުރަތަމަ ދުވަހުގެ ބަހުސްތަކުން ފެކަލްޓީ އޮފް އާރޓްސް (އެފް.އޭ) އަދި އިސްލާމިކް ޔުނިވަރސިޓީ އޮފް މޯލްޑިވްސް (އައި.ޔޫ.އެމް) ވެސް މޮޅުވެއްޖެއެވެ.
ފުރަތަމަ ދުވަހުގެ 3 ވަނަ ބަހުސްގައި އެފް.އޭ ބައްދަލުކުރީ ފެކަލްޓީ އޮފް ހެލްތު ސައިންސަސް (އެފް.އެޗް.އެސް)އާ އެވެ. ”ކުޑަކުދިންނަށް ކުރާ އަނިޔާތައް ހުއްޓުވުމަށް އެންމެ މުހިންމީ ގާނޫނުތައް ހަރުދަނާ ކުރުމެވެ.“ މި މައުޟޫއަށް ކުރި ބަހުސްގައި އެފް.އޭ ބަހުސްކުރީ މައުޟޫއާ އެއްކޮޅަށެވެ. އެފް.އޭ އިން މި ބަހުސް ކާމިޔާބު ކުރީ 753 – 621ގެ ނަތީޖާއަކުން ކަމަށްވާއިރު، މި ބަހުސްގެ އެންމެ މޮޅު ބަހުސްކުރުންތެރިޔަކަށް ހޮވިފައިވަނީ އެފް.އޭގެ އާލިމް ޢަބްދުލް ލަތީފެވެ.
ފުރަތަމަ ދުވަހުގެ ފަހު ބަހުސްގައި ބައްދަލުކުރީ އައި.ޔޫ.އެމް އާއި ފެކަލްޓީ އޮފް އެޑިއުކޭޝަން (އެފް.އީ) އެވެ. މި ބަހުސްގެ މައުޟޫ އަކީ ”ކުދި އަދި މެދު ފަންތީގެ ވިޔަފާރިތައް ފުޅާކުރުމަށް އޮތް އެންމެ ބޮޑު ގޮންޖެހުމަކީ ފައިސާގެ ދަތިކަމެވެ.“ ކަމަށްވާއިރު، އައި.ޔޫ.އެމް އިން ބަހުސްކުރީ މައުޟޫއާ ދެކޮޅަށެވެ. މި ބަހުސް އައި.ޔޫ.އެމް އިން ކާމިޔާބުކުރީ 926 – 805 ންނެވެ. އަދި އެންމެ މޮޅު ބަހުސްކުރުންތެރިޔަކަށް ހޮވުނީ އައި.ޔޫ.އެމްގެ އަލީ އަހްނަފެވެ.
ފުރަތަމަ ދުވަހުގެ ބަހުސްތައް ކުރެވުނީ ސެޕްޓެންބަރު 10ވީ ހޮނިހިރުދުވަހުގެރޭ އެމް.އެން.ޔޫ ސެންޓްރަލް އެޑްމިނިސްޓްރޭޝަން އޮޑިޓޯރިއަމްގައެވެ.
އެމް.އެން.ޔޫ.އެސް.ޔޫ ބަހުސް މުބާރާތަކީ ދިވެހި ބަސް ދިރުވައި އާލާކޮށް، ބަހުގެ ހަމަތަކާ އެއްގޮތަށް ދިވެހިބަސް ބޭނުން ކުރަން ބާރުއެޅުމަށާއި ޢިލްމީ ފެންވަރެއްގައި އުފެއްދުންތެރި ގޮތުގައި ޚިޔާލު ފާޅުކުރުމުގެ ފުރުޞަތު ފަހިކޮށްދީ، ދޫފަރިތަ، ކުޅަދާނަ ވާހަކަދެއްކުންތެރިންތަކެއް އުފެއްދުމުގެ މަޤްޞަދުގައި ބާއްވަމުން އަންނަ މުބާރާތެކެވެ. މިއަހަރު މި ބޭއްވެނީ ސިލްސިލާކޮށް ބޭއްވޭ މި މުބާރާތުގެ 9 ވަނަ މުބާރާތެވެ.
